Nehemi 5

Nehemi zwɛ̀ gɩgɩrɩ yìə̀n tə, Zwifə-ba pwə́rə́ wa

1 Lalʋʋ tə wa lɩ̀à duən, də ba kana, nyɩ́n ba zàn, ba ŋʋŋwɩn, ba zɩgɩ ba nubɩa Zwifə-ba duən nə. 2 Ba duən yà swɩ̀n, ba wʋ́: «Nə də nə bibara, də nə bikana dáá zənzən. Nə pɩ̀à mɩna, sə nə də́, nə ma yà lʋʋ wa.» 3 Ba duən də swɩ̀n, ba wʋ́: «Nə kárɩ́, də nə divɛn tɩ̀án kárɩ́, də nə dìì nə, nə yàá tún talɩma, nə ga jon mɩna, niən máŋá wa.» 4 Yá ba duən də swɩ̀n, ba wʋ́: «Nə yàá jɩŋa səbiu, nə kə nə kárɩ́, də nə divɛn tɩ̀án kárɩ́ də̀ń nə, sə nə ma ŋwɩ́n pɩ̀ʋ́ lanpo tə. 5 Yá nə də nə nubɩa tə mɛ yɩ dwíí nədʋ. Nə bɩ̀á tə, də ba bɩ̀á tə mɛ yɩ won nədʋ. Yá kʋ yàá yɩ kálʋ́, kʋ pa nəba, sə nə kə nə bibara də bikana, yontʋtʋnan wa. Nə bikana tə zʋnɩ manwarɩ ba jì ywə́ŋə́. Nə kʋ́ʋ̀ ba won mama jə, yá nə kárɩ́, də nə divɛn tɩ̀án kárɩ́ dàń jìgə̀ lɩ̀à duən nyiən.»

6 Máŋá tə, à nə nì ba ŋʋŋwɩan tə, də sʋ̀ràn təntə, à lɩŋa zàn zənzən. 7 À ken sírí, sə à caga nəkwɩna tə, də tʋ̀tʋ̀nán yun tɩ̀án tə nii nə. À swɩ̀n ba con, à wʋ́: «À jɩŋa tə yuu nywarɩ dáá zənzən, á nə kəni á dwíí tɩ̀án tə yuu!» Yá à dàń bon ba, jə́rə́ nəfarʋ wa. 8 À swɩ̀n ba con, à wʋ́: «Nə tətə pìí nə yə̀ nə nubɩa Zwifə-ba tə, ba yà nə yoli ba tɩ̀àn dwíə́ nəkaran* tə yuu wa, nə jon, ndə nə dɩ̀àn nə mɛ nətʋ. Yá sɩ́ʋ́n nə, á tətə dàń pìí, á kalɩ á nubɩa tə, á pɩn ba yoli ba tɩ̀àn, nə mʋ̀ ba dwíí tɩ̀án tə yuu wa!»

Ba púə́ ba nii, ba nə wà yoo mama nɩ, sə ba le yɩrɩ. 9 Yá à tə swɩ̀n, à súrí lá, à wʋ́: «Kʋ tə á nə tʋŋa tə, ba ziən. Á yà mɛ, sə á dəri nə Yɩɩ tə fən, sə á dàn ká də́ cavɩra, dwíə́ nəkaran tə yáá con, ba nə yɩ nə dʋŋa. 10 À də tətə, də à nubɩa tə, də à tʋ̀tʋ̀nà tə jɩŋɩ ba səbiu, də mɩna. Sɩ́ʋ́n nə, nə dàń yágá jɩŋɩ təntə, nə pa ba. 11 Á pìrə́ á pa ba, ba kárɩ́ tə, də ba divɛn tɩ̀án kárɩ́ tə, də ba olivə* tɩ̀án tə, də ba dìì tə, zə̀n mama. Á yágá nywarɩ tə də, á yàá nə kalɩ ba, sə ba ŋwɩ́n, ba súrí səbiu tə nə, nə à yə̀ə́ mɩna tə nə, nə à yə̀ə́ divɛn tə nə, nə à yə̀ə́ nʋga tə nə, ba nə jɩŋɩ á con.» 12 Ba le, ba wʋ́: «Nə wá tʋn kʋ tə n nə swɩ̀n. Nə wá pìí nə pa ba, ba wiən tə, yá nə bá bwe won mama bwie, nə súrí lá.»

À dàń bon Yɩɩ joŋwana tə, à pa lɩ̀à tə dù ba yáá con, də ba wá twá sʋgʋ tə nii nə, ba nə swɩ̀n. 13 Kʋ kwa nə, à pupugu à gasɔɔ tə gànjɩgɩ, à ga swɩ̀n, à wʋ́: «Mə nətʋ nə, Yɩɩ wá pupugu lìù tə mama, ʋ nə bá twá durə tə nii nə, ʋ nə dùə̀. Yɩɩ wá pa kʋ tíú kwɩ̀n ʋ dìə̀, də ʋ jɩjə wiən nə mɩ́ámɩ́án.» Lalʋʋ tə púlí tə mama le, ba wʋ́: «Amɩɩna!» ba ga bʋ Ba-Yígúrə́-Jə-Tiu nə. Yá kʋ kwa nə, lalʋʋ tə sɛ̀, ba twá durə tə nii nə, ba nə dùə̀.

14 Kʋ nə zɩgɩ dɩɩn tə nə, pɩ̀ʋ́ Arətasɛrəsɛsə nə tún nə, sə à ya Zwifə-ba yáá tíú, Zwida nagwanaa tə wa, ʋ pàrɩ̀ tə bɩna sapʋa bɩnɩ tə wa, kʋ bà kʋ yí kʋ bɩna fɩtwa də bələ bɩnɩ tə, kʋ jə bɩna fugə də bələ. Yá kʋ máŋá təntə mama, à mʋ̀, nə à yə̀ə́ à nubɩa tə lìù mama wà nagwanaa yáá tíú wiən tə dí. 15 Təntən nagwanɛɛ yáá tɩ̀án tə, ba nə yɩn lá, də à tə wà twi, yà kəni càn lalʋʋ tə nə. Ba yà joŋə wodirən, də divɛn, lalʋʋ tə con, yá ba tə yàá jon wárʋ́ səbilurən sapwɩlə, ba súrí lá. Ba tʋ̀tʋ̀nà tə də tətə yà də́ pàrɩ̀, lalʋʋ tə yuu wa. Yá à mʋ̀ wà nətʋ tʋn, à nə dəri Yɩɩ fən yɩrɩ. 16 Kʋ tə nə dwə, à tətə tʋn biritaŋʋ kʋ tə lwiu wa. À də à tʋ̀tʋ̀nà tə mama nə yàá kun duən nə, nə ma tʋŋa, yá nə wà kárá mama jon nə yə̀. 17 À də bara bíí də finu yà nə də́ wodiu. Ba yà yɩ Zwifə-ba, də tʋ̀tʋ̀nán yun tɩ̀án, kʋ dàń súrí lɩ̀à tə nə, ba nə naŋa lʋʋ níə́ tə wa, tə nə kɩkarɩ nəba, ba twi. 18 Dɩɩn mama, à yàá pa, ba gʋ naʋ, də pee bardʋ, tə yɩra nə zurə, də cə̀ń. Yá dɩan fugə mama, à yàá pa, ba ja divɛn tə nə dáá, ba bà, ba pa nə. Yá də kʋ mɛ, à wà nagwanaa yáá tíú wiən tə bwiə bwe, tʋtʋŋɩ tə də tətə yà nə yɩ lalʋʋ tə yuu zɩlɩ yɩrɩ.

19 À jʋn Yɩɩ, à wʋ́: «À tíú Yɩɩ, lìí à yoo, n ga tʋn zəni à yɩra, yìə̀n tə mama yɩrɩ, à nə tʋn, à pa lalʋʋ kʋ tə nə!»