<<    <     Nehemi     6     >    >> 
Nehemi dʋŋa tə pɩ̀à coŋi, sə ba ma tʋn yolwan ʋ yɩra
6
1 Sanbala, də Tobɩya, də Geswɛmə, ʋ nə yɩ Arabə, də nə dʋŋa tə duən tə nì də, à pìí à lwà biritaŋʋ tə, yá kʋ yà kʋ́ʋ̀ ba lulwərən jə. Kʋ máŋá tə wa, də à yà tə wà bòrə̀n mimien tə nə ken. 2 Sanbala də Geswɛmə dàń tʋn ba swɩ̀n à con, ba wʋ́: «Bàá, n jəri nəba Kefirimə nə, Ono vara tə wa, sə nə ve.» Ba yà vʋrɩ, sə ba tʋn yolwan à yɩra. 3 Yá à tʋn tʋntʋna ba con, à le ba, à wʋ́: «À wulə à tʋŋa tʋtʋnfarʋ, kʋ pɩn, à wàrɩ̀ á con à twi. À nə yá tʋtʋŋɩ tə, à ga bà á con, kʋ wá cən kʋ zɩgɩ.»
4 Ba tʋn ba swɩ̀n kʋ sʋgʋ nədʋ təntə à con, nɛɛ banɩa. Yá kʋ liu nədʋ tə nə, à də yàá le ba. 5 Sanbala tə tʋn ʋ tʋtʋnʋ don à con, nɛɛ bonu nii nə, də kʋ sʋgʋ nədʋ tə. Ʋ tʋtʋnʋ tə yà jə sagɩ, kʋ nə súrí, ʋ jɩɩn wa. 6 Kʋ yà pʋ́pʋ́nɩ́ sagɩ tə wa, kʋ wʋ́: «Ba swɩ̀n á yoo, dwíə́ nəkaran* tə mama wa. Yá Geswɛmə də swɩ̀n də, n mʋ̀ də Zwifə-ba tə yɩ á wulə á tanɩ, sə á vɩ nii. Kʋ mʋ̀ nə pɩn, n ma pìí n lwè biritaŋʋ tə. Ba swɩ̀n də, n mʋ̀ dàń nə wá jì ba pɩ̀ʋ́. 7 Ba swɩ̀n də, n tún Yɩɩ nii sʋ̀sʋ̀nà tətə Zwerizalɛmə wa, sə ba bòrì, ba bɩrɩ də, n jìgə̀ Zwida nagwanaa tə pɩ̀ʋ́. Sɩ́ʋ́n nə, Pɛrəsə pɩ̀ʋ́ tə wá nì yìə̀n təntə. Kʋ mʋ̀ yɩrɩ, n dàń bà, sə nə vʋrɩ.» 8 À tʋn, à le wá, à wʋ́: «Lìù mama ba yìə̀n təntə yiri swɩ̀n nagwanaa tə wa. Tə yɩ kʋ̀nkʋ̀n, yá kʋ yɩ n mʋ̀ tətə nə kʋ̀nɩ̀ tə.» 9 Ba mʋ̀ lɩ̀à təntə mama yà yɩ ba pɩ̀à, sə ba fugu nəba. Ba yà bʋŋa də, ba nə fwa nətʋ, nə jɩ̀àn wá gwarɩ, yá nə kʋ́ʋ̀ bá tʋn tʋtʋŋɩ tə. À dàń jʋn Yɩɩ, à wʋ́: «Sɩ́ʋ́n nə, à tíú Yɩɩ, pa à jɩɩn dàn!»
10 Dɩɩn don nə, à vəli Delaya bìú Swemaya sàń, ʋ nə yɩ Mehetabɛlə nàʋ́, sə à na wá, ʋ yà nə wàrɩ̀ kàrá ʋ naŋa yɩrɩ. Yá ʋ dàń swɩ̀n à con, ʋ wʋ́: «Nə jərə duən Yɩɩ dìə̀ tə wa, Yɩɩ wúlú bwálɩ́ tə titəŋi wa, nə ga sun Yɩɩ dìə̀ tə mimien tə. Cɩ́gá, n dʋŋa tə bɩ̀àn, sə ba gʋ mʋ́, yá kʋ yɩ tɩtɩn nə, ba wá bà.» 11 À le wá, à wʋ́: «Bɛɛ ndə à mʋ̀ nə, mɛ sə ʋ dəri ʋ səgə naaa? Yá bɛɛ wàà, ʋ nə yɩ ndə à mʋ̀ nə, nə wàá Yɩɩ dìə̀ tə wa ʋ zwɩ, ʋ mɩɩ ga yanɩ lʋʋ waa? À bá zʋ lá!»
12 À lwarɩ də, kʋ tà Yɩɩ nə tʋn Swemaya. Kʋ yɩ Tobɩya, də Sanbala nə yə̀ wá, sə ʋ swɩ̀n sʋ̀ràn təntə à con. 13 Ba yà tʋn kʋ nətʋ, sə fən zʋ nə, à ga twá ʋ kwìə̀ tə nə, sə kʋ pa à tʋn cʋna. Yá ba dàń yà wá na cwəŋə, ba ma cʋ̀gʋ̀ à yɩrɩ nə, ba ga kə cavɩra à nə.
14 Yá à dàń jʋn Yɩɩ, à wʋ́: «À tíú Yɩɩ, lìí Tobɩya də Sanbala tʋtʋnɛɛ tə yoo. Lìí Yɩɩ nii sʋsʋnkana Nʋadɩya, də Yɩɩ nii sʋ̀sʋ̀nà tə duən tə yoo, ba yà nə pɩ̀à, sə ba kə fən à waa.»
15 Ba lwə̀ biritaŋʋ tə ba zwɛ̀, dɩan finu də bələ nii nə, Elulə cànà tə dɩan sapʋa də bonu dɩɩn nə. 16 Máŋá tə, nə dʋŋa tə mama, ba nə wulə lʋʋ níə́ tə wa, tə nə kɩkarɩ nəba, nə nì kʋ, fən zʋa ba, ba tətə ga na də, ba dí cavɩra. Yá ba dàń lwarɩ də, kʋ yɩ kʋ twá də nə Yɩɩ tə sáŋʋ́, tʋtʋŋɩ tə ma tʋn, kʋ nii sú.
17 Kʋ máŋá təntə mama wa, Zwida dwíí nəkwɩna duən, də Tobɩya pʋ́pʋ́nɩ́ saga kapʋpʋ, ba pa duən nə. 18 Cɩ́gá, Zwida dwíí tə wa lɩ̀à kapʋpʋ yà twá də durə, ba ma vwa ba tɩ̀àn Tobɩya yɩra, ʋ yà nə yɩ Ara bìú Swekanɩya tɩnbɛɛ yɩrɩ. Ʋ bìú Yohanan də yà swe Berekɩya bìú Meswulamə bʋ̀á. 19 Yá Zwida dwíí tə wa lɩ̀à təntə dàń yàá bwɩ Tobɩya nə, à yɩ́á wa, ba ga ja à nii sʋ̀ràn, ba pìí ba vəli ba swɩ̀n, ba bɩrɩ wá. Tobɩya də dàń yà tʋŋa saga à nə, sə ʋ ma kə fən à waa.