Ɛsətɛrə 1

Ɛsətɛrə

Pɩ̀ʋ́ Asuerusə tanɩ cànà diŋə nəfarʋ, ʋ pa ʋ lʋʋ lɩ̀à nə

1 Ɛsətɛrə yoo tə yɩn pɩ̀ʋ́ Asuerusə pàrɩ̀ tə máŋá wa. Asuerusə təntə yà də́ pàrɩ̀ nagwanɛɛ 127 yuu wa, kʋ nə zɩgɩ Ɛndə lʋʋ nii wa, kʋ va kʋ yí Kuswə lʋʋ nii. 2 Kʋ máŋá tə wa, pɩ̀ʋ́ Asuerusə yà jə̀ə́ padaʋ tə yuu, Suzə nə, kʋ nə yɩ dɩ̀àn dəkuu bwálɩ́ tɩʋ. 3 Ʋ pàrɩ̀ tə bɩna batwa nii bɩnɩ tə wa, ʋ tanɩ cànà diŋə nəfarʋ, ʋ pa ʋ payuu tə dun tɩ̀án tə, də ʋ tʋ̀tʋ̀nà mama nə. Ʋ bon Pɛrəsə də Medi tɩ̀án kwatara tə, də ʋ lʋʋ nii tə dun tɩ̀án tə, də ʋ nagwanɛɛ yáá tɩ̀án tə, ʋ pa ba bà ʋ yáá con. 4 Ʋ twá cànà tə diŋə nə, ʋ ma bɩrɩ jɩjə tə nə pɩn ʋ payuu tə jə dun, də ʋ pàrɩ̀ tə nə jə fɩra, kʋ ga pa ʋ jə dun zənzən nətʋ. Ba dí cànà tə, kʋ dán zənzən: Kʋ dán dɩan 180. 5 Dɩan təntə kwa nə, pɩ̀ʋ́ tə kʋ́ʋ̀ tanɩ cànà diŋə don, pɩ̀ʋ́ sàń tɩ̀án kárá tə wa, ʋ pa ʋ lalʋʋ tə jɩjə tɩ̀án, də kʋ lalaŋa mama nə, ba nə wulə Suzə wa, kʋ nə yɩ dɩ̀àn dəkuu bwálɩ́ tɩʋ. Ba dí cànà təntə dɩan barpɛ. 6 Ba yà tɩrɩ bɔɔ ŋoni nəsɩnan mwin wárʋ́ valɩ nə, ba ma vwa gantwɛn pʋ̀pʋ̀nàn, tə nə yɩ ganbʋa gantwɛn, də gunən gantwɛn, də gantwɛn nəlinu, ba goli pɩ̀ràn ywəŋə yɩra. Ba tún gwələ nəfaran, ba nə fwa də sɩ́án də wárʋ́, bwálɩ́ nə, ba nə ja cɩ́nʋ́, də pɩ̀ʋ̀ kapan, də pɩra, də pɩ̀ʋ̀ kapazonu, ba ma kwɛn. 7 Ba yà kəni sana sɩ́án wùrú zwɩ̀ɩ́n yirə yirə kapʋpʋ wa, ba pɩn lɩ̀à tə nə, ba nywɩn. Yá pɩ̀ʋ́ yà pɩn ba tarɩ payuu tə divɛn tə, ba pɩn lɩ̀à tə nə, ba nywɩn ba fɩra. 8 Lìù mama yà yɩ kʋ tə ʋ nə pɩ̀à nə ʋ nywɩn, ba ba kalɩ. Cɩ́gá, pɩ̀ʋ́ yà pɩn nii, sə tʋ̀tʋ̀nà tə mama nə wulə ʋ sàń tə wa, fwa kʋ tə lìù mama yà nə pɩ̀à, ba pa wá. 9 Pakan Vaswəti də vàn con, ʋ tanɩ cànà diŋə, ʋ pa kana tə nə, pɩ̀ʋ́ Asuerusə sàń tə wa.

Pakan Vaswəti kwɩ̀n ʋ dun nə

10 Cànà tə diŋə barpɛ nii dɩɩn tə nə, divɛn tə yà dɩ̀gà pɩ̀ʋ́ tə, kʋ pa ʋ waa ywán. Yá ʋ dàń bon Mehuman, də Bizəta, də Harəbona, də Bigəta, də Abagəta, də Zetarə, də Karəkasə, ʋ sàń batanɩ barpɛ tə nə wulə ʋ nii nə, ba tʋŋa ba pɩn wá, ʋ swɩ̀n ba con, 11 sə ba pa pakan Vaswəti bà ʋ mʋ̀ pɩ̀ʋ́ yáá con, də ʋ pakan yupuu tə ʋ yuu nə. Ʋ yà pɩ̀à sə ʋ lʋʋ lɩ̀à tə, də ʋ lʋʋ nii tə yáá tɩ̀án tə na Vaswəti nə yɩ kabwaŋʋ nətʋ. Cɩ́gá, ʋ yà yɩ kabwaŋʋ cɩ́gá cɩ́gá. 12 Yá pakan Vaswəti vɩga, sə ʋ bà ʋ sɛ̀ pɩ̀ʋ́ boŋə tə, ʋ nə tʋn batanɩ tə, ʋ pa ba bon wá. Kʋ pɩn pɩ̀ʋ́ tə lɩŋa zàn zənzən, tə fʋrɩ. 13 Pɩ̀ʋ́ tə ve də wʋbʋnyɩna tə, ba nə jə jwɩan yoo yənu. Cɩ́gá, mə nətʋ nə pɩ̀ʋ́ tə yàá kwɛn ʋ yìə̀n: Yoo nə twi, ʋ yàá kə kʋ lɩ̀à tə mama yáá con, ba nə yə̀ə́ yoo yáá lɩʋ, sə kʋ twá cɩ́gá cwəŋə nə, ndə kʋ nə mɛ nətʋ. 14 Pɩ̀ʋ́ kwenə tə wa, ba nə bwə́lə́ ʋ yɩra, ʋ də Pɛrəsə də Medi dun tɩ̀án barpɛ tə yà nə mɩ̀n duən zəni. Ba mʋ̀ nə yɩ Karəswena, də Swetarə, də Adəmata, də Tarəsisə, də Merɛsə, də Marəsena, də Memukan. Ba yà wulə təntən bwálɩ́ nə, payuu tə wa. 15 Pɩ̀ʋ́ tə swɩ̀n ba con, ʋ wʋ́: «À mʋ̀ pɩ̀ʋ́ Asuerusə tʋn à batanɩ tə pakan Vaswəti con, yá ʋ vɩga à nii. Bɛ̀ɛ̀ nə, nə lʋʋ nii tə nii yìə̀n tə bɩrɩ, sə nə ma tʋn pakan Vaswəti?»

16 Memukan ma swɩ̀n pɩ̀ʋ́ də dun tɩ̀án tə yáá con, ʋ wʋ́: «Yolwan tə pakan Vaswəti nə tʋn, tà pɩ̀ʋ́ cɩcɩ yɩra nə ʋ tʋn kʋ, kʋ yɩ dun tɩ̀án tə mama yɩra, də lalʋʋ tə mama yɩra, ba nə wulə pɩ̀ʋ́ Asuerusə payuu tə nagwanɛɛ tə mama wa. 17 Cɩ́gá, kana tə mama wá lwarɩ də pakan tə vɩga nii, yá ba wá gwìə̀n ba bana, máŋá tə wa ba nə wá man ba bɩrɩ ba, də pɩ̀ʋ́ pɩn nii, sə ba pa pakan Vaswəti bà ʋ yáá con, yá ʋ vɩga sə ʋ bà! 18 Zə̀n tətə, Pɛrəsə də Medi dun tɩ̀án tə kana tə wá nì də pakan tə vɩga nii, yá ba də wá tʋn kʋ yoo təntə pɩ̀ʋ́ dun tɩ̀án tə mama yɩra, yá kʋ nətʋ wá ja yigwənə də lɩŋa kʋ bà! 19 Də kʋ nə ywán də mʋ́, à nyɩna pɩ̀ʋ́, sə n pa nii, kʋ nə wàrɩ̀ kʋ kwànɩ́, sə ba bòrì, ba ga pʋ́pʋ́nɩ́ ba tún Pɛrəsə də Medi tɩ̀án nii yìə̀n sagɩ tə wa, də Vaswəti kʋ́ʋ̀ bá ya pakan, ʋ nan pɩ̀ʋ́ Asuerusə yáá con, yá pɩ̀ʋ́ wá jon Vaswəti dun tə, ʋ pa ʋ don kan nə, ʋ nə kʋkwa wá. 20 Máŋá tə ba nə wá nì pɩ̀ʋ́ nii təntə, ʋ payuu nəfarʋ tə mama wa, kan mama wá zìlí ʋ barɩ, ʋ nə swə ʋ yɩ ləzwənfarʋ, nə à yə̀ə́ lalaŋʋ.»

21 Sʋgʋ təntə yɩn ywánɩ́ kʋ pa pɩ̀ʋ́, də ʋ dun tɩ̀án tə nə, yá pɩ̀ʋ́ dàń tʋn ndə nətʋ tə nə, Memukan nə swɩ̀n. 22 Ʋ tʋn saga payuu tə nagwanɛɛ tə mama wa. Ba pʋ́pʋ́nɩ́ tə ba tʋn nagwanaa mama wa, də nagwanaa tə sʋgʋ pʋpʋnbɩa, də dwíí mama nə, də dwíí tə nəndəli sʋgʋ. Ba swɩ̀n sə bɛɛ mama ya ʋ dìə̀ tíú, ʋ ga swɩ̀n ʋ nəndəli sʋgʋ.