Ɛsətɛrə 2

Ɛsətɛrə jìgə̀ pakan

1 Yìə̀n təntə kwa nə, pɩ̀ʋ́ Asuerusə lɩŋa tʋa. Ʋ pìí ʋ lìí yoo tə Vaswəti nə tʋn tə, də nii tə ʋ nə pɩn ʋ yuu wa. 2 Pɩ̀ʋ́ tətə tʋ̀tʋ̀nà tə swɩ̀n, ba wʋ́: «Pɩ̀ʋ́, kʋ mɛ sə ba pɩ̀à kacɩan, ba tə nə yəri bara, ba ga yɩ kabwaŋa, ba ja bà ba pa mʋ́. 3 Kʋ mʋ̀ yɩrɩ, n dàń kúrí lɩ̀à n payuu tə nagwanɛɛ tə mama wa, sə ba kə kacɩan tə mama nə yəri bara, ba ga yɩ kabwaŋa, duən yáá nə, ba ja bà pɩ̀ʋ́ kana sàń tə wa, Suzə nə, kʋ nə yɩ dɩ̀àn dəkuu bwálɩ́ tɩʋ. Hege, pɩ̀ʋ́ batana tə nə cɩ̀ pɩ̀ʋ́ kana nə, wá ywàń kacɩan tə yuu, ʋ ga pa ba kana nʋturi tə nə soli yɩra, ba ma kwɛn ba tɩ̀àn. 4 Yá kacɩɩn tə nə wá sú n mʋ̀ pɩ̀ʋ́ yii, dàń wá jì pakan, ʋ jon Vaswəti yuu nə.» Sʋgʋ təntə yɩn ywánɩ́ kʋ pa pɩ̀ʋ́ nə, yá ʋ dàń pɩn nii sə kʋ tʋn nətʋ.

5 Zwida lʋʋ lìù don yà wulə Suzə wa, kʋ nə yɩ dɩ̀àn dəkuu bwálɩ́ tɩʋ, ʋ yɩrɩ nə yɩ Marədoswe. Ʋ yɩ Yayirə bìú, Yayirə yɩ Swimeyi bìú, Swimeyi yɩ Kiswə bìú, Kiswə yɩ Bɛnzwamɛn dwíí tə wa lìù. 6 Marədoswe yà yɩn lɩ̀à tə wa, Babɩlɔnə pɩ̀ʋ́ Nebukadənezarə nə jɩn Zwerizalɛmə wa, ʋ súrí Zwida pɩ̀ʋ́ Yekonɩa nə, ʋ ja va yongaʋ. 7 Marədoswe yà nə ywàŋá Adasa yuu, ʋ yɩrɩ don nə yɩ Ɛsətɛrə. Ʋ yà yɩ Marədoswe nyɩna nyánʋ́ bʋ̀á. Ʋ nyɩna də nuu mɛ yà tɩga, yá bʋ̀á təntə yà yɩ kabwaŋʋ cɩ́gá cɩ́gá. Ʋ nyɩna də ʋ nuu tɩan kwa nə, Marədoswe yà nə jon wá ʋ kʋ̀nà, ndə ʋ tətə bʋ̀á nə.

8 Máŋá tə wa ba nə bòrì sʋgʋ tə, pɩ̀ʋ́ nə nii kʋ yuu wa ba zwɛ̀, ba kúrí kacɩan kapʋpʋ, ba kə duən yáá, Suzə nə, kʋ nə yɩ dɩ̀àn dəkuu bwálɩ́ tɩʋ, ba pa Hege ywàŋá ba yuu. Mə kʋ zɩgɩ nətʋ, ba ma ja Ɛsətɛrə ba zʋ pɩ̀ʋ́ sàń tə wa, ba pa Hege nə, ʋ nə ywàŋá pɩ̀ʋ́ kana yuu. 9 Ɛsətɛrə súə́ Hege yii, yá ʋ nɩ yuywaŋʋ ʋ yáá con. Ʋ bɩbarɩ lala, ʋ pa wá won tə mama ʋ nə mɛ sə ʋ ma kwɛn ʋ tɩ̀àn, də wodiu tə ʋ nə mɛ sə ʋ də́, də tʋtʋnbwɩɩ barpɛ, ba nə kúrí pɩ̀ʋ́ sàń tə wa. Yá ʋ dàń ken Ɛsətɛrə də ʋ tʋtʋnbwɩɩ tə pɩ̀ʋ́ kana sàń dìə̀ tə wa, ka zəni nə dwə tə duən tə. 10 Ɛsətɛrə wà pɩn ba lwarɩ ʋ dwíí dəkuu, də ʋ yinaŋa bwálɩ́. Cɩ́gá, Marədoswe yà dùə̀ suu ʋ nii nə, sə ʋ dàn ká pa ba lwarɩ kʋ. 11 Dɩɩn mama, Marədoswe yàá kɩkarɩ pɩ̀ʋ́ kana sàń tə yáá con, sə ʋ ma na Ɛsətɛrə yazurə, də nətʋ tə ba nə ywáŋá ʋ yuu.

12 Ba yà pɩn cànɩ̀ fugə də bələ kacɩan tə nə, ba nə wulə pɩ̀ʋ́ kana sàń tə wa, sə ba ma kwɛn ba tɩ̀àn, ndə kana nə mɛ sə ba kwɛn ba tɩ̀àn nətʋ. Təntən cànɩ̀ bardʋ tə wa, nʋturə, ba nə fwa də təən mala nə, ba ma tùrì ba yɩra. Yá cànɩ̀ bardʋ tə duən tə wa, ba tùrì nʋturə, ba nə fwa də wusinə, də kana nʋturi duən tə nə soli yɩra. Kʋ kwa nə, ba lìù mama dàń jə ʋ máŋá ba nə tún, sə ʋ nan pɩ̀ʋ́ Asuerusə yii nə. 13 Máŋá tə wa kacɩɩn nə naŋa pɩ̀ʋ́ kana sàń tə wa, ʋ vələ pɩ̀ʋ́ tə con, ba yàá pa wá won tə mama, ʋ nə pɩ̀à sə ʋ ja ʋ yɩra, ʋ ja zʋ padiə tə wa. 14 Kacɩɩn tə yàá zʋ pɩ̀ʋ́ tə con, didəni nə, yá kʋ tɩpʋrɩ jɩjʋ nə, ba yàá ja wá ba zʋ pɩ̀ʋ́ kana sàń don wa. Sàń təntə yɩ pɩ̀ʋ́ kabii nə wulə lá, yá Swaswəgazə, ʋ nə yɩ pɩ̀ʋ́ batana, nə ywàŋá ba yuu. Kacɩɩn nə zʋa sàń təntə wa, ʋ kʋ́ʋ̀ bá pìí ʋ twi pɩ̀ʋ́ con, də kʋ nə tà pɩ̀ʋ́ nə pɩ̀à wá, ʋ ga bɩrɩ kacɩɩn tə yɩrɩ, ʋ pa ba bon wá.

15 Máŋá nə yí, sə Marədoswe nyɩna nyánʋ́ Abihayilə bʋ̀á Ɛsətɛrə, Marədoswe yà nə ywàŋá ʋ yuu, ndə ʋ tətə bʋ̀á nə, zʋ pɩ̀ʋ́ tə con, ʋ wà won don mama yoo bwe, ʋ súrí kʋ tə nə, Hege, pɩ̀ʋ́ batana tə nə cɩ̀ pɩ̀ʋ́ kana nə, nə bɩrɩ wá. Ɛsətɛrə yà na yuywaŋʋ lɩ̀à tə mama yáá con, ba nə yàá na wá. 16 Ba twi ba ja Ɛsətɛrə ba zʋ pɩ̀ʋ́ Asuerusə con, padiə tə wa, ʋ pàrɩ̀ tə bɩna barpɛ nii bɩnɩ tə fugə nii cànà tə wa, ba nə boŋə Tebɛtə cànà. 17 Pɩ̀ʋ́ tə sóní Ɛsətɛrə, ʋ doni kana tə duən mama, yá ʋ fwa pubwanʋ də wʋywaŋʋ* ʋ yɩra, ʋ doni kacɩan tə duən tə mama. Pɩ̀ʋ́ tə púə́ payupuu Ɛsətɛrə yuu nə, yá ʋ dàń pɩn ʋ jì pakan, Vaswəti yuu nə. 18 Pɩ̀ʋ́ tə tanɩ cànà diŋə nəfarʋ Ɛsətɛrə yɩrɩ, ʋ pa ʋ dun tɩ̀án tə, də ʋ tʋ̀tʋ̀nà tə mama nə. Ʋ pɩn máŋá, sə lɩ̀à ya sìə́ wa, nagwanɛɛ tə mama wa, ʋ ga pa ba tara ʋ mʋ̀ pɩ̀ʋ́ jɩɩn zìlə́ wiən, ba pa lɩ̀à nə.

19 Ba kʋ́ʋ̀ ken kacɩan duən yáá nə, nɛɛ bələ nii nə. Kʋ máŋá tə wa, də Marədoswe də yà jə cwəŋə, ʋ twá ʋ jəni pɩ̀ʋ́ sàń mimii tə nə. 20 Ɛsətɛrə tə yà wà pɩn ba lwarɩ ʋ yinaŋa bwálɩ́, də ʋ dwíí dəkuu, ndə Marədoswe yà nə dùə̀ súú ʋ nii nə nətʋ. Ɛsətɛrə yà zìlí Marədoswe nii, ndə máŋá tə wa, Marədoswe yà nə ywàŋá ʋ yuu.

Marədoswe lwarɩ vʋ́rá yoo

21 Dɩɩn don nə, Marədoswe yà jə̀ə́ pɩ̀ʋ́ sàń mimii tə nə. Pɩ̀ʋ́ batanɩ bələ, ba nə yɩ pɩ̀ʋ́ dìə̀ mimii nəcɩra, Bigətan də Terɛswə, yà vʋrɩ sə ba gʋ pɩ̀ʋ́ Asuerusə, ba lɩŋa nə zàn ʋ yuu wa yɩrɩ. 22 Marədoswe lwarɩ yoo tə, yá ʋ swɩ̀n kʋ ʋ bɩrɩ pakan Ɛsətɛrə nə. Ɛsətɛrə dàń swɩ̀n kʋ pɩ̀ʋ́ tə con, Marədoswe yuu yɩrɩ. 23 Ba zuri ba yɩra, ba twarɩ yoo tə nɛɛ, ba na də kʋ yɩ cɩ́gá, yá ba dàń kùrí batanɩ bələ təntə, yoŋi yuu wa. Ba pʋ́pʋ́nɩ́ yoo tə pɩ̀ʋ́ yáá con, ba tún pɩ̀ʋ́ tʋ̀tʋ̀nán sagɩ wa.