Dʋŋɩ Hamanə də Marədoswe pwə́rə́ wa
3
1 Yìə̀n təntə kwa nə, pɩ̀ʋ́ Asuerusə ken dun Hamedata bìú Hamanə yuu, ʋ nə yɩ Agagə dwíí lìù. Ʋ zɩ̀n wá, ʋ kə ʋ duən dun tɩ̀án tə mama yuu wa. 2 Pɩ̀ʋ́ sàń tʋ̀tʋ̀nà tə mama yà nə jəni pɩ̀ʋ́ sàń mimii tə nə, yàá kwá tɩa, ba tʋ ba nadwana yuu, Hamanə yáá con, ba pa wá dun, ndə pɩ̀ʋ́ tətə yà nə pɩn nii nətʋ. Yá Marədoswe mʋ̀ yà ba ʋ nadwana yuu twɩ, ʋ ma ba tɩa kwɛ́, ʋ pɩn dun Hamanə nə. 3 Pɩ̀ʋ́ sàń tʋ̀tʋ̀nà tə yà nə jəni pɩ̀ʋ́ sàń mimii tə nə, ma bwe Marədoswe, ba wʋ́: «Bɛ̀ɛ̀ nə pɩn, n mʋ̀ ma vɩ pɩ̀ʋ́ nii tə?» 4 Ba yàá bwe wá bwiə təntə dɩɩn mama, yá Marədoswe ba ba con taŋa. Ba ma swɩ̀n kʋ Hamanə con, sə ba jə́n, də Marədoswe nə wá zɩgɩ ʋ sʋ̀ràn tə yuu wa. Cɩ́gá, ʋ yà swɩ̀n ba con, də ʋ yɩ Zwida lʋʋ lìù. 5 Hamanə nɩ də Marədoswe cɩ́gá ba tɩa kwɛ́, yá ʋ ba ʋ nadwana yuu twɩ, ʋ yáá con, ʋ pɩn wá dun, yá Hamanə dàń súə́ də lɩŋa. 6 Ba yà swɩ̀n Hamanə con, də Marədoswe yɩ Zwida lʋʋ lìù. Kʋ mʋ̀ yɩrɩ, ʋ yà ba pɩ̀à sə ʋ gʋ Marədoswe cɩcɩ. Ʋ dàń yà pɩ̀à sə ʋ gʋ Marədoswe də ʋ dwíí lɩ̀à tə, Zwida lʋʋ lɩ̀à tə mama, ba nə wulə pɩ̀ʋ́ Asuerusə payuu tə mama wa. 7 Pɩ̀ʋ́ Asuerusə parɩ tə bɩna fugə bələ nii bɩnɩ tə wa, təntən cànà tə wa, ba nə boŋə Nɩsan cànà, Hamanə pɩn ba dɩlɩ pwárʋ́ bɩ̀á tə, ba nə boŋə purimə, ʋ yáá con. Ba pwárɩ́ dɩɩn mama yuu wa, kʋ nə zɩgɩ təntən cànà tə nə, kʋ va kʋ yí fugə bələ nii cànà tə, ba nə boŋə Adarə cànà.Hamanə tanɩ sə ʋ gʋ Zwida lʋʋ lɩ̀à tə
8 Hamanə swɩ̀n pɩ̀ʋ́ Asuerusə con, ʋ wʋ́: «Dwíí don wulə yəbə, kʋ nə yɩ kʋ cɩcɩ. Ba wulə lalʋʋ tə wa, bwálɩ́ mama nə, n payuu tə nagwanɛɛ tə mama wa. Ba yofwamɩnan də lalʋʋ don mama yofwamɩnan ba duən nyən, kʋ pa ba ba pɩ̀ʋ́ nii yìə̀n tə nə twá. Kʋ bá sáŋʋ́ jə kʋ pa mʋ́, sə n yá n pa ba ya lʋʋ nii tə wa də sìə́! 9 Də kʋ nə ywán də mʋ́, à nyɩna pɩ̀ʋ́, sə n pa ba pʋ́pʋ́nɩ́ sagɩ, n tún n jɩɩn kʋ yuu wa, kʋ nə pɩn nii, sə ba gʋ dwíí təntə lɩ̀à tə. Yá à mʋ̀ dàń wá kəri wárʋ́ səbilurən tɔnə biətwa, à kə tʋ̀tʋ̀nà tə jɩɩn wa, ba nə tʋŋa tʋtʋŋɩ tə, sə ba ja bà ba kə pɩ̀ʋ́ səbiu daka tə wa.» 10 Pɩ̀ʋ́ tə lɩ jɩtuŋu jɩfɩlɩ tə ʋ jɩfwa nə, ʋ pa Hamedata bìú Hamanə nə, ʋ nə yɩ Agagə dwíí lìù, Zwida lʋʋ lɩ̀à tə jarɩdon. 11 Pɩ̀ʋ́ tə swɩ̀n Hamanə con, ʋ wʋ́: «À pɩn mʋ́ səbiu tə, yá à ken dwíí təntə n jɩɩn wa. Ja ba n ma fwa kʋ tə nə ywán də mʋ́!» 12 Bɩnɩ tə təntən cànà tə dɩ̀àn fugə batwa dɩɩn nə, ba bon lɩ̀à tə nə pʋ́pʋ́nɩ́ pɩ̀ʋ́ saga, ba pa ba pʋ́pʋ́nɩ́ yìə̀n tə mama, Hamanə nə pɩn nii tə yuu wa, ba kə saga wa, ba pa lɩ̀à tə nə, pɩ̀ʋ́ nə tún ʋ yuu yɩrɩ. Ba pʋ́pʋ́nɩ́ tə ba tʋn nagwanaa mama wa, də nagwanaa tə sʋgʋ pʋpʋnbɩa, də dwíí mama nə, də dwíí tə nəndəli sʋgʋ. Saga təntə yɩ ba pʋ́pʋ́nɩ́ pɩ̀ʋ́ Asuerusə yɩrɩ yuu wa, yá pɩ̀ʋ́ jɩtuŋu nə, ba ma sun tə nii. 13 Ba ja saga tə ba tʋn tʋntʋna payuu tə nagwanɛɛ tə mama wa. Ba yà mɛ, sə ba cʋ̀gʋ̀ Zwida lʋʋ lɩ̀à tə mɩ́ámɩ́án, ba gʋ ba, kʋ nə zɩgɩ balandʋrʋ, kʋ va kʋ yí bazʋnʋ, də bìsɩ́ná də kana, ba ga vɩrɩ ba wiən. Dɩɩn nədʋ cɩcɩ nə lagʋrɩ təntə mɛ sə kʋ tʋn, bɩnɩ tə fugə bələ nii cànà tə, ba nə boŋə Adarə cànà, dɩan fugə batwa dɩɩn nə. 14 Nagwanaa mama wa, ba yà mɛ sə ba kàrɩ̀ sagɩ tə, ba bòrì ba pa lalʋʋ tə mama yəni də kʋ yɩ nii, pɩ̀ʋ́ nə pɩn, sə ba ga tanɩ ba tɩ̀àn, ba ma dàn dɩɩn təntə, ba nə lɩ ba tún. 15 Tʋntʋna tə bɩbarɩ ba nan lala, ndə pɩ̀ʋ́ nə pɩn nii, sə ba tʋn nətʋ. Yá ba dàń bòrì nii tə ba bɩrɩ Suzə wa, kʋ nə yɩ dɩ̀àn dəkuu bwálɩ́ tɩʋ. Pɩ̀ʋ́ tə də Hamanə dàń jə̀ə́ sə ba nyʋn, yá Suzə tɩʋ tə wulə viviru wa.