Marədoswe lòrì Ɛsətɛrə, sə ʋ san Zwida lʋʋ tə nə
4
1 Máŋá tə wa Marədoswe nə lwarɩ kʋ tə mama, kʋ nə wulə kʋ tʋŋa, ʋ cɩrɩ ʋ gànàn, ʋ ga tì ganlɔɔ gànʋ̀ ʋ zʋ, ʋ lwá tʋntʋnan ʋ yuu wa, yá ʋ dàń zʋa tɩʋ tə wa, ʋ mà pucʋnɩ bubwiə. 2 Ʋ nə yí pɩ̀ʋ́ sàń tə mimii nə, ʋ mɛ lá ʋ zɩga. Cɩ́gá, lìù mama yà wàrɩ̀ galɔɔ gànʋ̀ ʋ zwɩ, ʋ ja zwɩ pɩ̀ʋ́ sàń tə wa. 3 Nagwanaa mama wa, bwálɩ́ tə mama pɩ̀ʋ́ nii tə, də yoo tə ʋ nə bɩrɩ sə kʋ tʋn nə yí lá, kʋ yàá yɩ lúə́ nəfarʋ, kʋ pa Zwida lʋʋ lɩ̀à tə nə. Ba vwə ba nii, ba kwi, ba ga swɩ̀n pucʋnɩ sʋ̀ràn. Ba zʋnɩ yà tígə́ ganlwɛɛ gànàn, də tʋntʋnan wa.4 Pakan Ɛsətɛrə tʋtʋnbwɩɩ tə, də ʋ batanɩ tə twi ba swɩ̀n kʋ ʋ con, yá ʋ pùə́ cʋ̀gʋ̀ zənzən. Ʋ pɩn gànàn, sə ba ja va ba pa Marədoswe nə, sə ʋ lɩ ganlɔɔ gànʋ̀ tə ʋ nə zʋa, ʋ ga lwàń ʋ zʋ gànàn təntə, yá Marədoswe wà sɛ̀ ʋ jon tə. 5 Ɛsətɛrə dàń bon Hatakə, ʋ nə yɩ batanɩ tə wa lìù don, pɩ̀ʋ́ tə yà nə ken ʋ səpuni nə, sə ʋ tʋn ʋ pa wá. Ʋ tʋn wá, sə ʋ va ʋ bwe Marədoswe, ʋ na yoo tə nə wulə, də won tə nə pɩn kʋ yɩ nətʋ. 6 Hatakə nan ʋ va Marədoswe con, tɩʋ tə kanporu tə wa, pɩ̀ʋ́ sàń mimii tə yáá con. 7 Marədoswe tún yoo tə mama nii, kʋ nə wulə kʋ tʋŋa, ʋ bɩrɩ wá, də səbiu tə nii Hamanə nə kàn nii, sə ʋ kəri ʋ kə pɩ̀ʋ́ səbiu daka wa, sə ba ga cʋ̀gʋ̀ Zwida lʋʋ lɩ̀à tə mɩ́ámɩ́án. 8 Marədoswe pɩn wá sagɩ tə də nyɩnyɩga, ba nə bòrì ba bɩrɩ Suzə tɩʋ tə wa, də pɩ̀ʋ́ nə pɩn nii, sə ba gʋ Zwida lʋʋ lɩ̀à tə, sə ʋ ja va ʋ bɩrɩ Ɛsətɛrə nə. Hatakə yà mɛ sə ʋ tún kʋ nii, ʋ bɩrɩ Ɛsətɛrə nə, ʋ ga pa wá nii, sə ʋ va pɩ̀ʋ́ tə con, ʋ tʋ ʋ nadwana nə, ʋ lòrì wá pwəpwə, sə ʋ fwa pubwanʋ, ʋ dwíí lɩ̀à tə yɩra. 9 Hatakə twi ʋ tún Marədoswe sʋ̀ràn tə, ʋ bɩrɩ Ɛsətɛrə nə. 10 Yá Ɛsətɛrə dàń swɩ̀n sʋ̀ràn tə tə Hatakə con, ʋ ga pa wá nii, sə ʋ va ʋ tún tə ʋ bɩrɩ Marədoswe nə. Ʋ swɩ̀n, ʋ wʋ́: 11 «Pɩ̀ʋ́ sàń tʋ̀tʋ̀nà tə mama, də lalʋʋ tə mama nə wulə payuu tə nagwanɛɛ tə mama wa yə̀ə́ də, lìù tə mama ʋ nə zʋa padiə titəŋi dəwoo tə wa, ʋ nə yɩ bɛɛ, nə à yə̀ə́ kan, də kʋ tà pɩ̀ʋ́ nə bon wá, ba wá gʋ kʋ tíú, ndə nii tə nə wulə yoo təntə yuu wa, nə bɩrɩ nətʋ. Kʋ tíú mɩɩ wàá lʋʋ wa kʋ yanɩ, də pɩ̀ʋ́ nə te ʋ sɩ́án dafɩla tə kʋ tíú nə. Kʋ yɩ nii, lɩ̀à tə mama nə mɛ sə ba zìlí. Yá kʋ dɩan fɩtwa nə nətən, pɩ̀ʋ́ nə wà à mʋ̀ bon, sə à zʋ ʋ con.» 12 Ba ja Ɛsətɛrə sʋ̀ràn tə, ba va ba swɩ̀n Marədoswe con. 13 Yá Marədoswe pɩn ba swɩ̀n Ɛsətɛrə con, ʋ wʋ́: «Dàn ká bʋ́n də, n nə wulə pɩ̀ʋ́ sàń wa yɩrɩ, n mʋ̀ cɩcɩ wá wànɩ́ n jon n tɩ̀àn, Zwida lʋʋ lɩ̀à tə mama wa. 14 N nə vɩga, sə n súrí n nii nə, n swɩ̀n sʋgʋ yoo kʋ tə wa, Zwida lʋʋ lɩ̀à tə sáŋʋ́ wá nan bwálɩ́ don, yá n mʋ̀ də n nyɩna dìə̀ tə wá cʋ̀gʋ̀ mɩ́ámɩ́án. Yá wàà nə yə̀ə́, də kʋ nə tà yoo nətən yiri yɩrɩ nə, n jìgə̀ pakan?» 15 Ɛsətɛrə pɩn ba pìí ba va ba swɩ̀n Marədoswe con, ʋ wʋ́: 16 «Vəli n kə Zwida lʋʋ lɩ̀à tə mama, ba nə wulə Suzə nə, duən yáá. Á vwiə á nii à yɩrɩ, á dànà ká də́, á dànà ká nyʋn, tɩtɩn də yɩcaʋ mɛ, kʋ ja va dɩan batwa. À də wá vwa à nii, à də à tʋtʋnbwɩɩ tə. Yá kʋ kwa nə, à dàń wá va pɩ̀ʋ́ con, yá à yə̀ə́ də kʋ yɩ culu tə mɛ. Ba nə wá gʋ nə, sə ba gʋ!» 17 Marədoswe dàń vəli, ʋ tʋn kʋ tə mama, Ɛsətɛrə nə pɩn wá nii sə ʋ tʋn.