Ɛsətɛrə napɩrɩ vəli, sə ʋ ma wànɩ́ ʋ tún ʋ nii pɩ̀ʋ́ tə con
5
1 Nivori tə dɩan batwa nii dɩɩn tə nə yí, Ɛsətɛrə zʋa ʋ paganan, yá ʋ vəli ʋ zʋ padiə titəŋi dəwoo tə wa, ka nə wulə pɩ̀ʋ́ dìə̀ tə yáá nə. Pɩ̀ʋ́ tə ya jə̀ə́ ʋ padaʋ yuu, padiə tə wa, ʋ yáá te mimii tə. 2 Máŋá tə pɩ̀ʋ́ tə nə nɩ pakan Ɛsətɛrə, ʋ zɩga yɩɩ nə, padiə dəwoo tə wa, ʋ fwa ʋ pubwanʋ Ɛsətɛrə yɩra. Pɩ̀ʋ́ tə te ʋ sɩ́án dafɩla tə, ʋ ya nə jə ʋ jɩɩn wa, Ɛsətɛrə nə. Ɛsətɛrə twən ʋ yí lá, ʋ dwən dafɩla tə nii nə.3 Pɩ̀ʋ́ tə bwe wá, ʋ wʋ́: «Bɛ̀ɛ̀ nə jə mʋ́, pakan Ɛsətɛrə? Bɛ̀ɛ̀ nə n pɩ̀à? Kʋ nə swə kʋ yɩ payuu tə faan tətə, à wá pa kʋ mʋ́!» 4 Ɛsətɛrə le wá, ʋ wʋ́: «Də kʋ nə ywán də mʋ́, à nyɩna pɩ̀ʋ́, sə n də Hamanə bà cànà diŋə tə, à nə tanɩ sə à pa mʋ́, zə̀n kʋ tə.» 5 Pɩ̀ʋ́ ma tʋn lìù lala, ʋ pa ʋ swɩ̀n Hamanə con, sə ʋ bà sə ba va Ɛsətɛrə boŋə tə. Yá pɩ̀ʋ́ də Hamanə dàń vəli Ɛsətɛrə cànà diŋə tə. 6 Cànà wodiu tə diŋə máŋá wa, pɩ̀ʋ́ tə bwe Ɛsətɛrə, ʋ wʋ́: «Bɛ̀ɛ̀ nə n lòrì? À wá pa kʋ mʋ́! Bɛ̀ɛ̀ nə n pɩ̀à? Kʋ nə swə kʋ yɩ payuu tə faan tətə, n wá na kʋ!» 7 Ɛsətɛrə ma le, ʋ wʋ́: «Kʋ tə à nə pɩ̀à sə à lòrì tə? 8 Də à nə nɩ yuywaŋʋ à nyɩna pɩ̀ʋ́ yáá con, kʋ ga ywán də mʋ́, sə n sɛ̀ n pa nə won tə à nə lòrì tə, à tə wá lòrì mʋ́, sə n də Hamanə kʋ́ʋ̀ bà cànà diŋə tə, à nə tanɩ sə à pa aba jwɩan nə, yá à dàń wá swɩ̀n won tə à nə pɩ̀à pɩ̀ʋ́ con.»
Hamanə tanɩ yoŋi, sə ʋ ma kùrí Marədoswe
9 Hamanə nan pakan tə con, kʋ dɩɩn tə nə, də pupwən, ʋ waa ga ywán. Yá ʋ nə nan ʋ na Marədoswe pɩ̀ʋ́ sàń mimii tə nə, Marədoswe wà yɩɩ nə zàn, yá ʋ wà vɩvaga Hamanə yáá con. Kʋ dàń pɩn Hamanə lɩŋa zàn zənzən, tə fʋrɩ Marədoswe yuu wa. 10 Yá ʋ pɩ́án, ʋ ga va ʋ sàń. Ʋ tʋn, ʋ pa ba bon ʋ dabara, də ʋ kan Zerɛswə. 11 Hamanə dàń man ʋ bɩrɩ ba, ʋ jɩjə nə dáá nətʋ, də ʋ bibara nii, də nətʋ tə mama pɩ̀ʋ́ tə nə ken dun ʋ yuu wa, yá ʋ tún wá dun tɩ̀án tə, də pɩ̀ʋ́ sàń tʋ̀tʋ̀nà tə mama yuu wa. 12 Hamanə tə swɩ̀n ba con, ʋ wʋ́: «Yá kʋ tə nə dwə, kʋ yɩ à mʋ̀, kʋ tà lìù don mama nə pakan Ɛsətɛrə bon, ʋ pa à də pɩ̀ʋ́ bà cànà diŋə tə, ʋ nə tanɩ. Yá kʋ yɩ à mʋ̀ nə, ʋ kʋ́ʋ̀ bon, sə à mʋ̀ də pɩ̀ʋ́ kʋ́ʋ̀ bà, jwɩan nə. 13 Yá də kʋ mɛ, tə mʋ̀ təntə mama ba funə jə tə pa nə, də à nə na Marədoswe, ʋ mʋ̀ Zwida lʋʋ lìù təntə, ʋ jə̀ə́ pɩ̀ʋ́ sàń mimii tə nə.» 14 Ʋ kan Zerɛswə, də ʋ dabara tə mama ma swɩ̀n ʋ con, ba wʋ́: «Kʋ nə yɩ nətʋ, sə n pa ba cwɛn yoŋi, kʋ danɩ nə yí jɩvaŋɩ yiə finu, yá jwɩan jɩjʋ nə, n dàń wá lòrì pɩ̀ʋ́, sə ʋ pa ba kùrí Marədoswe kʋ yuu wa. Yá n wá wànɩ́ n va cànà diŋə tə də pupwən, n mʋ̀ də pɩ̀ʋ́. Kʋ yoo tə yɩn ywánɩ́ kʋ pa Hamanə nə, yá ʋ pɩn ba cwɛn yoŋi tə.