Kʋ jìgə̀ kálʋ́, sə Hamanə zìlí Marədoswe
6
1 Kʋ tɩtɩn tə nə, pɩ̀ʋ́ yà wàrɩ̀ ʋ dwɛ̀. Ʋ dàń ma pa ba tì sagɩ tə, ba nə pʋ́pʋ́nɩ́ pɩ̀ʋ́ yìə̀n ba tuŋə kʋ wa, ba ja bà, ba kàrɩ̀ kʋ wa yìə̀n tə, ba bɩrɩ wá. 2 Yá ba nɩ də, kʋ yà pʋ́pʋ́nɩ́ sagɩ tə wa, kʋ swɩ̀n də, Marədoswe nə swɩ̀n ʋ bɩrɩ də, Bigətan də Terɛswə, pɩ̀ʋ́ batanɩ bələ, ba yà nə yɩ pɩ̀ʋ́ dìə̀ mimii nəcɩra, yà tanɩ sə ba gʋ pɩ̀ʋ́ Asuerusə. 3 Pɩ̀ʋ́ tə ma swɩ̀n, ʋ wʋ́: «Bɛ̀ɛ̀ won nə ba fwa ba pa Marədoswe nə, ba ma kə dun ʋ yuu wa, kʋ yɩrɩ?» Pɩ̀ʋ́ tətə tʋ̀tʋ̀nà tə ma le, ba wʋ́: «Ba wà won mama fwa ba pa wá». 4 Pɩ̀ʋ́ ma bwe, ʋ wʋ́: «wàà nə wulə pɩ̀ʋ́ sàń dəwoo tə wa?» Kʋ yà yɩ Hamanə nə twi, ʋ zʋ pɩ̀ʋ́ sàń kàrá con dəwoo tə wa, sə ʋ lòrì, sə pɩ̀ʋ́ pa ba kùrí Marədoswe, yoŋi tə yuu wa, ʋ yà nə tanɩ ʋ zɩgɩ ʋ nə. 5 Pɩ̀ʋ́ tʋ̀tʋ̀nà tə ma le, ba wʋ́: «Kʋ yɩ Hamanə nə zɩga dəwoo tə wa.» Pɩ̀ʋ́ tə ma swɩ̀n, ʋ wʋ́: «Ʋ zʋ!». 6 Hamanə zʋa, yá pɩ̀ʋ́ tə bwe wá, ʋ wʋ́: «Bɛ̀ɛ̀ nə ba mɛ sə ba fwa ba pa lìù nə, pɩ̀ʋ́ nə pɩ̀à sə ʋ kə dun ʋ yuu wa?» Hamanə swɩ̀n ʋ waa con, ʋ wʋ́: «Wàà don yuu wa nə pɩ̀ʋ́ wá kə dun, də kʋ nə tà à mʋ̀?» 7 Hamanə ma le pɩ̀ʋ́ tə, ʋ wʋ́: «À nyɩna pɩ̀ʋ́ nə pɩ̀à sə ʋ kə dun lìù yuu wa, 8 sə ʋ pa ba pa wá pɩ̀ʋ́ gànʋ̀, pɩ̀ʋ́ tətə yà nə zwɩ, də səsən, pɩ̀ʋ́ tətə yà nə dɩ̀, ba ga nàn ka yuu, də pɩ̀ʋ́ səsən wonanan. 9 Sə à nyɩna pɩ̀ʋ́ ga kə pɩ̀ʋ́ gànʋ̀ tə, də səsən tə ʋ dun tɩ̀án tə lìù don jɩɩn wa, ʋ nə jə dun. Kʋ tíú wá ja pɩ̀ʋ́ gànʋ̀ tə, ʋ ma zʋ bɛɛ tə, pɩ̀ʋ́ nə pɩ̀à sə ʋ kə dun ʋ yuu wa, ʋ pa bɛɛ tə dɩ̀ səsən tə yuu wa, yá ʋ ja wá ʋ va tɩʋ tə kanporu tə wa, ʋ ya ʋ yáá, ʋ swɩ̀n, ʋ wʋ́: “Nəŋə kʋ tə ba nə fwa, ba pa bɛɛ tə nə, pɩ̀ʋ́ nə pɩ̀à sə ʋ kə dun ʋ yuu wa!”»10 Pɩ̀ʋ́ tə ma swɩ̀n Hamanə con, ʋ wʋ́: «Tì gànʋ̀ tə lala, n ga ja səsən tə, ndə n nə swɩ̀n nətʋ, yá n tʋn nətʋ Marədoswe yɩra, Zwida lʋʋ lìù tə, ʋ nə jəni pɩ̀ʋ́ sàń mimii tə nə. Dàn ká lɩ yoo nəmaa tətə, kʋ tə n nə swɩ̀n tə wa, n dʋgʋ vàn nə.» 11 Hamanə tì gànʋ̀ tə, ʋ ga ja səsən tə. Ʋ ja gànʋ̀ tə ʋ zʋ Marədoswe, ʋ pa ʋ dɩ̀ ʋ jə̀ə́ səsən tə yuu wa. Ʋ yɩn səsən tə yáá, ʋ ja Marədoswe ʋ jírí tɩʋ tə kanporu tə wa, ʋ ga swɩ̀n, ʋ wʋ́: «Nəŋə kʋ tə ba nə fwa, ba pa bɛɛ tə nə, pɩ̀ʋ́ nə pɩ̀à sə ʋ kə dun ʋ yuu wa!» 12 Kʋ kwa nə, Marədoswe pìí ʋ va pɩ̀ʋ́ sàń mimii tə nə, yá Hamanə mʋ̀ yɩ ʋ bɩbarɩ, ʋ vələ ʋ sàń də lúə́ pucʋnɩ nəfarʋ, cavɩra ga pa ʋ ja gànʋ̀ ʋ pú ʋ yuu nə. 13 Hamanə man kʋ tə mama nə yí wá, ʋ bɩrɩ ʋ kan Zerɛswə, də ʋ dabara tə mama nə. Ʋ wʋbʋnyɩna tə nə pɩn wá kwìə̀, də ʋ kan Zerɛswə ma swɩ̀n ʋ con, ba wʋ́: «Də Marədoswe təntə, ba nə sinti ba muŋə mʋ́ ʋ yáá con, cɩ́gá nə yɩ Zwida lʋʋ lìù, lwarɩ də n bá wànɩ́ ʋ yáá con n zɩgɩ. Ba wá mun mʋ́ ʋ yáá con mɩ́ámɩ́án.» 14 Ba tə yà wulə Hamanə con ba swɩ̀n, də pɩ̀ʋ́ batanɩ tə yí. Ba bɩbarɩ Hamanə ba lɩ, ba ja nan ba va cànà diŋə tə, Ɛsətɛrə nə tanɩ.