Hamanə cavɩra də ʋ tɩan yoo
7
1 Pɩ̀ʋ́ də Hamanə vəli sə ba də́ pakan Ɛsətɛrə cànà diŋə tə. 2 Bələ nii dɩɩn təntə də nə, cànà wodiu tə diŋə máŋá wa, pɩ̀ʋ́ tə kʋ́ʋ̀ bwe pakan Ɛsətɛrə, ʋ wʋ́: «Bɛ̀ɛ̀ nə n lòrì, pakan Ɛsətɛrə? À wá pa kʋ mʋ́! Bɛ̀ɛ̀ nə n pɩ̀à? Kʋ nə swə kʋ yɩ payuu tə faan tətə, n wá na kʋ!» 3 Pakan Ɛsətɛrə le, ʋ wʋ́: «Də à nə nɩ yuywaŋʋ à nyɩna pɩ̀ʋ́ yáá con, yá kʋ ga twá à nyɩna pɩ̀ʋ́ fɩra nə, à lòrí tə yɩ, sə n jon à tətə mɩɩ tə n kə lʋʋ wa. Yá won tə à nə pɩ̀à yɩ, sə n jon à dwíí tə mɩɩ n kə lʋʋ wa! 4 Cɩ́gá, ba yoli nəba, à mʋ̀ də à dwíí tə. Ba pɩ̀à ba gʋ nəba, ba cʋ̀gʋ̀ nəba mɩ́ámɩ́án! Kʋ yà tə nə yɩ ba yoli nəba, sə nə ya ywə́ŋə́ də tʋtʋnbwɩɩ, à yà bá swɩ̀n yoo mama. Yá zɩgʋ kʋ tə wa, nə jarɩdon tə wàrɩ̀ cʋcʋran tə, ʋ nə tʋn pɩ̀ʋ́ yɩra, ʋ ŋwɩ́na. 5 Pɩ̀ʋ́ Asuerusə bwe pakan Ɛsətɛrə, ʋ wʋ́: «Wàà nə yɩ kʋ tíú, yá ʋ wulə yə̀n nə, ʋ mʋ̀ lìù tə ʋ bɩcan nə súə́ də pubʋŋɩ təntə yiri?» 6 Ɛsətɛrə le ʋ wʋ́: «Nə jarɩdon tə, nə dʋŋʋ tə nə yɩ Hamanə, ləzwənlwan wà tə!» Hamanə dàń súə́ də fən, pɩ̀ʋ́ tə də pakan tə yáá con. 7 Pɩ̀ʋ́ tə lɩŋa zàn tə pupwin, yá ʋ zàn cànà diŋə tə bwálɩ́ nə, ʋ nan ʋ va pɩ̀ʋ́ sàń tɩ̀án kárá tə wa. Hamanə nɩ də pɩ̀ʋ́ tə ken sírí, sə ʋ gʋ wá, yá ʋ dàń mɛn pakan Ɛsətɛrə con, ʋ lòrì wá pwəpwə, sə ʋ jon ʋ mɩɩ, ʋ kə lʋʋ wa. 8 Pɩ̀ʋ́ tə yà pìí ʋ nan pɩ̀ʋ́ sàń tɩ̀án kárá tə wa, ʋ bɩ̀àn cànà diŋə dìə̀ tə wa, də Hamanə sori ʋ tʋ ganpurə gólí nəfarʋ tə yuu, Ɛsətɛrə yà nə tígə́ lá. Pɩ̀ʋ́ tə ma cə̀rí, ʋ wʋ́: «Yá də kʋ nətʋ mɛ, ʋ yɩ ʋ tə pɩ̀à sə ʋ tʋn dɩ̀àn pakan tə yɩra, à yɩ́á wa, à dìə̀ tə wa naaa?» Sʋgʋ təntə tàà nan pɩ̀ʋ́ tə nii wa, də ba ja gànʋ̀ ba pú Hamanə yáá nə. 9 Arəbona, pɩ̀ʋ́ batanɩ tə wa lìù don dàń zɩgɩ pɩ̀ʋ́ tə yáá con, ʋ swɩ̀n, ʋ wʋ́: «Tə zən duən kwà tə sá duən! Hamanə tətə yà cwɛn yoŋi ʋ sàń nə, sə ʋ ma kùrí Marədoswe, bɛɛ tə nə swɩ̀n, ʋ ma jon pɩ̀ʋ́ mɩɩ, ʋ kə lʋʋ wa. Yoŋi tə danɩ yɩ jɩvaŋɩ yíə́ finu!» Pɩ̀ʋ́ tə ma swɩ̀n, ʋ wʋ́: «Á kùrə́ Hamanə tətə kʋ yuu wa!» 10 Ba kùrí Hamanə yoŋi tə yuu wa, ʋ yà nə tanɩ Marədoswe yɩrɩ. Yá pɩ̀ʋ́ lɩŋa tə yà nə pupwin, dàń tʋa.