Ɛsətɛrə 8

1 Kʋ dɩɩn tə tətə nə, pɩ̀ʋ́ Asuerusə jɩn Zwida lʋʋ lɩ̀à jarɩdon Hamanə dìə̀ tə, ʋ ma də́ zìlə́ pakan Ɛsətɛrə yuu wa, yá Marədoswe dàń twi pɩ̀ʋ́ tə yáá con. Cɩ́gá, Ɛsətɛrə yà swɩ̀n kʋ tə Marədoswe nə yɩ ʋ pa wá, ʋ bɩrɩ pɩ̀ʋ́ tə nə. 2 Pɩ̀ʋ́ tə lɩ jɩtuŋu jɩfɩlɩ tə, ʋ yà nə pìí ʋ jon Hamanə con, ʋ pa Marədoswe nə. Yá Ɛsətɛrə də tún Marədoswe, sə ʋ ya Hamanə dìə̀ tə yuu wa.

Pɩ̀ʋ́ pɩn nii, Zwida lʋʋ lɩ̀à tə sáŋʋ́ yɩrɩ

3 Ɛsətɛrə kʋ́ʋ̀ pìí ʋ swɩ̀n pɩ̀ʋ́ tə con. Ʋ tʋa ʋ nɛɛ nə, ʋ lòrì wá pwəpwə, də ʋ kwi, sə pɩ̀ʋ́ tə cɩ̀ Hamanə, ʋ nə yɩ Agagə dwíí lìù, yolwan tə yáá nə, ʋ nə tanɩ sə ʋ tʋn Zwida lʋʋ lɩ̀à tə yɩra. 4 Pɩ̀ʋ́ tə te ʋ sɩ́án dafɩla tə Ɛsətɛrə nə, yá Ɛsətɛrə dàń nyɩ́n ʋ zàn, ʋ zɩgɩ pɩ̀ʋ́ tə yáá con. 5 Ʋ swɩ̀n pɩ̀ʋ́ tə con, ʋ wʋ́: «À nyɩna pɩ̀ʋ́, n nə nɩ də kʋ ywàń də mʋ́, yá à na yuywaŋʋ n yáá con, yoo tə nə twá n waa nə, yá n ga swə nə, à lòrì mʋ́ sə ʋ pa ba pʋ́pʋ́nɩ́ saga, ba ma kwɩ̀án Agagə dwíí lìù, Hamedata bìú Hamanə saga tə, ʋ nə pʋ́pʋ́nɩ́, sə ʋ ma pa ba cʋ̀gʋ̀ Zwida lʋʋ lɩ̀à tə mɩ́ámɩ́án, à nyɩna pɩ̀ʋ́ payuu tə nagwanɛɛ tə mama wa. 6 Nətə nə à wá fwa, à pɩ́án á ywàń lɛɛ tə nə wá yí à lɩ̀à tə? Nətə nə à wá fwa, à pɩ́án à ywàń à dwíí tɩ̀án tə, yá ba gwɩ ba mama?»

7 Pɩ̀ʋ́ tə swɩ̀n pakan Ɛsətɛrə də Marədoswe con, ʋ nə yɩ Zwida lʋʋ lìù, ʋ wʋ́: «Nə̀ń à pɩn Hamanə dìə̀ tə Ɛsətɛrə nə, yá ba kùrí Hamanə mʋ̀ yoŋi yuu wa, ʋ nə zɩ̀n ʋ jɩɩn, ʋ zɩgɩ Zwida lʋʋ lɩ̀à tə nə yɩrɩ. 8 Sɩ́ʋ́n nə, á də tətə dàń pʋ́pʋ́ná kʋ tə nə ywàń də aba, á kə saga wa, á pa Zwida lʋʋ lɩ̀à tə nə, à yuu yɩrɩ, á ga mà pɩ̀ʋ́ jɩtuŋu jɩfɩlɩ tə, tə yuu wa, á ma sun tə nii. Cɩ́gá, ba nə pʋ́pʋ́nɩ́ sagɩ pɩ̀ʋ́ yɩrɩ yuu wa, ba ga mà pɩ̀ʋ́ jɩtuŋu jɩfɩlɩ tə kʋ yuu wa, ba ma sun kʋ nii, sagɩ təntə kʋ́ʋ̀ wàrɩ̀ kʋ kwànɩ́.»

9 Kʋ dɩɩn təntə tətə nə, ba bon lɩ̀à tə nə pʋ́pʋ́nɩ́ pɩ̀ʋ́ saga tə, ba bà. Kʋ yɩn bɩnɩ tə batwa nii cànà tə, ba nə boŋə Sivan cànà, dɩan sapʋa də batwa dɩɩn nə. Yá ba dàń pʋ́pʋ́nɩ́ kʋ tə mama, Marədoswe nə pɩn nii kʋ yuu wa, Zwida lʋʋ lɩ̀à tə yɩrɩ, ba pa lɩ̀à tə nə, pɩ̀ʋ́ nə tún ʋ yuu yɩrɩ, də payuu tə dun tɩ̀án tə nə, də nagwanɛɛ 127 yáá tɩ̀án tə nə, kʋ nə zɩgɩ Ɛndə lʋʋ nii wa, kʋ va kʋ yí Kuswə lʋʋ nii. Ba pʋ́pʋ́nɩ́ tə ba tʋn nagwanaa mama wa, də nagwanaa tə sʋgʋ pʋpʋnbɩa, də dwíí mama nə, də dwíí tə nəndəli sʋgʋ, də Zwida lʋʋ lɩ̀à tə nə, də ba sʋgʋ pʋpʋnbɩa, də ba nəndəli sʋgʋ. 10 Ba pʋ́pʋ́nɩ́ saga tə pɩ̀ʋ́ Asuerusə yɩrɩ yuu wa, ba mà pɩ̀ʋ́ jɩtuŋu jɩfɩlɩ tə yuu wa, ba ma sún tə nii, yá ba ja tə ba tʋn tʋntʋna tə nə dɩ̀ səsen, ba nə kúrí pɩ̀ʋ́ səsen tə wa, tə nə pàrɩ̀ zənzən. 11 Pɩ̀ʋ́ tə yà pɩn nii Zwida lʋʋ lɩ̀à tə nə, tɩʋ mama wa, sə ba kun duən nə, ba ta ba jon ba mɩɩ, ba cʋ̀gʋ̀ mɩ́ámɩ́án, yá ba gʋ lɩ̀à tə mama, ba nə wá nan dwíí yiri mama wa, nə à yə̀ə́ nagwanaa mama wa, ba ta ba. Pɩ̀ʋ́ tə pɩn nii Zwida lʋʋ lɩ̀à tə nə, sə ba cʋ̀gʋ̀ lɩ̀à təntə də ba kana, də ba bɩ̀á mama mɩ́ámɩ́án, ba ga vɩrɩ ba wiən. 12 Kʋ nətʋ tə mɛ sə kʋ tʋn dɩɩn nədʋ cɩcɩ, pɩ̀ʋ́ Asuerusə payuu tə nagwanɛɛ tə mama wa, bɩnɩ tə fugə bələ nii cànà tə, ba nə boŋə Adarə cànà, dɩan fugə batwa dɩɩn nə. 13 Nagwanaa mama wa, ba yà mɛ sə ba kàrɩ̀ sagɩ tə, ba bòrì ba pa lalʋʋ tə mama yəni də kʋ yɩ nii, pɩ̀ʋ́ nə pɩn, sə Zwida lʋʋ lɩ̀à tə ga tanɩ ba tɩ̀àn, ba ma dàn dɩɩn təntə, ba nə lɩ ba tún, sə ba ma fwi ba lɩŋa, ba dʋŋa yuu wa. 14 Tʋntʋna tə nə dɩ̀ səsen tə, ba nə kúrí pɩ̀ʋ́ səsen tə wa, tə nə pàrɩ̀ zənzən, bɩbarɩ lala, ba pàrɩ̀ ba nan ba vìí, ndə pɩ̀ʋ́ nə pɩn nii, sə ba tʋn nətʋ. Yá ba dàń bòrì nii tə ba bɩrɩ Suzə wa, kʋ nə yɩ dɩ̀àn dəkuu bwálɩ́ tɩʋ.

15 Marədoswe zàn pɩ̀ʋ́ tə yáá con, ʋ nan də pɛ̀gá ganmʋlɩ nəlinu də nəpon, də bɔɔ ganfarʋ, də gansɩan mwin, də sɩ́án payupuu nəfarʋ, ʋ yuu nə. Lɩ̀à yà jwɛ, ba ga mà pupwən cə̀rí, Suzə tɩʋ tə mama wa. 16 Zwida lʋʋ lɩ̀à tə yà súə́ də pupwən nəfarʋ, kʋ pa ba jwɛ, dun nəfarʋ tə yɩrɩ, pɩ̀ʋ́ tə nə ken ba yuu wa. 17 Nagwanaa mama wa, də tɩʋ mama wa, bwálɩ́ tə mama yoo tə pɩ̀ʋ́ nə pɩn nii kʋ yuu wa tə nə yí lá, kʋ yɩn pupwən nəfarʋ, kʋ pa Zwida lʋʋ lɩ̀à tə nə, yá ba jwɛ. Kʋ yɩn cànà dɩɩn, yá ba tanɩ cànà diŋə. Lʋʋ nii tə wa lɩ̀à kapʋpʋ ja ba tɩ̀àn ba fwa Zwida lʋʋ lɩ̀à, Zwida lʋʋ lɩ̀à tə fən nə jə ba yɩrɩ.