Ɛsətɛrə 9

Zwida lʋʋ lɩ̀à fwi ba lɩŋa, ba dʋŋa yuu wa

1 Bɩnɩ tə fugə bələ nii cànà tə, ba nə boŋə Adarə cànà, dɩan fugə batwa nii dɩɩn tə yí, sə yoo tə pɩ̀ʋ́ nə pɩn nii kʋ yuu wa tʋn. Dɩɩn təntə nə nə, Zwida lʋʋ lɩ̀à tə dʋŋa yà bʋŋa də ba wá də́ dɩ̀àn ba yuu wa. Yá yìə̀n tə lwàń, Zwida lʋʋ lɩ̀à tə nə pìí ba də́ dɩ̀àn lɩ̀à tə yuu wa, ba yà nə culi ba. 2 Tɩan tə wa ba nə wulə, pɩ̀ʋ́ Asuerusə payuu tə nagwanɛɛ tə mama wa, Zwida lʋʋ lɩ̀à tə kun duən nə, sə ba ta lɩ̀à tə yà nə pɩ̀à sə ba kə lɛɛ ba nə. Lìù mama wà ba yáá con wànɩ́ ʋ zɩgɩ. Cɩ́gá, Zwida lʋʋ lɩ̀à tə fən yà jə lɩ̀à tə mama. 3 Payuu tə nagwanɛɛ yáá tɩ̀án tə mama, də lɩ̀à tə pɩ̀ʋ́ nə tún ʋ yuu yɩrɩ, də dun tɩ̀án tə mama, də pɩ̀ʋ́ tʋ̀tʋ̀nà tə mama nii yɩn Zwida lʋʋ lɩ̀à tə kwa. Cɩ́gá, Marədoswe fən yà jə ba. 4 Cɩ́gá, Marədoswe dàń yà jìgə̀ dun tíú pɩ̀ʋ́ sàń tə wa. Ʋ yɩrɩ yà nan nagwanɛɛ tə mama wa, yá ʋ dun dàń yà yɩ tə kwɛn tə súrí.

5 Mə kʋ zɩgɩ nə, Zwida lʋʋ lɩ̀à tə ma mà ba dʋŋa tə mama. Ba gʋa ba də kwatara sɩ̀ʋ́, ba cʋ̀gʋ̀ ba mɩ́ámɩ́án. Ba jɩn lɩ̀à tə yà nə culi ba, ba ma tʋn ba fɩra. 6 Suzə cɩcɩ wa, kʋ nə yɩ dɩ̀àn dəkuu bwálɩ́ tɩʋ, Zwida lʋʋ lɩ̀à tə gʋa lɩ̀à biənu. 7 Yá ba gʋa Parəswandata, də Daləfon, də Asəpata, 8 də Pɔrata, də Adalɩa, də Arɩdata, 9 də Parəmaswəta, də Arizayi, də Aridayi, də Vayizata. 10 Lɩ̀à fugə təntə yà yɩ Hamedata bìú Hamanə, ʋ nə yɩ Zwida lʋʋ lɩ̀à jarɩdon bɩ̀á. Yá Zwida lʋʋ lɩ̀à tə dàń nə wá won vɩrɩ.

11 Kʋ dɩɩn tə tətə nə, ba twi ba swɩ̀n pɩ̀ʋ́ tə con, lɩ̀à tə nii ba nə gʋa Suzə wa, kʋ nə yɩ dɩ̀àn dəkuu bwálɩ́ tɩʋ. 12 Pɩ̀ʋ́ tə swɩ̀n pakan Ɛsətɛrə con, ʋ wʋ́: «Suzə cɩcɩ wa, kʋ nə yɩ dɩ̀àn dəkuu bwálɩ́ tɩʋ, Zwida lʋʋ lɩ̀à tə gʋa, ba cʋ̀gʋ̀ lɩ̀à biənu mɩ́ámɩ́án, kʋ súrí Hamanə bɩ̀á fugə tə nə. Kʋ dàń wá ya nətə payuu tə nagwanɛɛ tə gɩganɩ tə wa! Yá bɛ̀ɛ̀ nə n lòrì? À wá pa kʋ mʋ́! Bɛ̀ɛ̀ nə n kʋ́ʋ̀ pɩ̀à? N wá na kʋ!» 13 Ɛsətɛrə le, ʋ wʋ́: «Də kʋ nə ywàń də mʋ́, à nyɩna pɩ̀ʋ́, sə n pa cwəŋə Zwida lʋʋ lɩ̀à tə nə, ba nə wulə Suzə wa, sə ba jwɩan tə tʋn, ndə ba zə̀n nə tʋn nətʋ, ba ga tì Hamanə bɩ̀á fugə tə tɩga tə, ba goli ywəŋə nə.» 14 Yá pɩ̀ʋ́ tə pɩn nii, sə kʋ tʋn nətʋ. Ba bòrì yoo təntə, pɩ̀ʋ́ nə nii kʋ yuu wa, Suzə wa, yá ba goli Hamanə bɩ̀á fugə tə tɩga tə, ywəŋə nə. 15 Adarə cànà tə dɩan fugə banɩa dɩɩn tə də nə, Zwida lʋʋ lɩ̀à tə nə wulə Suzə tɩʋ tə wa, kʋ́ʋ̀ kun duən nə, yá ba gʋa lɩ̀à biətwa, ba dàń nə wà won vɩrɩ.

16 Zwida lʋʋ lɩ̀à tə duən tə nə wulə payuu tə nagwanɛɛ tə wa, kun duən nə, sə ba ta ba jon ba mɩɩ, ba ga wànɩ́ ba na sìə́ ba dʋŋa jɩɩn wa. Ba gʋa lɩ̀à 75 000, lɩ̀à tə wa ba yà nə culi ba, yá ba dàń nə wà won vɩrɩ. 17 Kʋ yɩn Adarə cànà tə dɩan fugə batwa dɩɩn nə. Zwida lʋʋ lɩ̀à tə sìí cànà tə dɩan fugə banɩa dɩɩn tə nə, yá kʋ jìgə̀ cànà diŋə, də pupwən dɩɩn, kʋ pa ba. 18 Yá Zwida lʋʋ lɩ̀à tə mʋ̀ nə wulə Suzə nə, kun duən nə, Adarə cànà tə dɩan fugə batwa, də fugə banɩa dɩan tə nə, ba fwi ba lɩŋa ba dʋŋa tə yuu wa, yá ba dàń sìí cànà tə dɩan fugə bonu dɩɩn tə nə, yá kʋ jìgə̀ cànà diŋə, də pupwən dɩɩn, kʋ pa ba. 19 Kʋ mʋ̀ nə pɩn, Adarə cànà tə dɩan fugə banɩa dɩɩn tə yàá yɩ pupwən, də cànà diŋə dɩɩn, kʋ pa Zwida lʋʋ lɩ̀à tə nə, ba nə wulə tɩbii wa, də tɩan wa, tə nə wà lwè tə kɩkarɩ də biritaŋʋ. Yá ba yàá pɩn zìlə́ wiən duən nə.

Purimə cànà tə dəkuu

20 Marədoswe pʋ́pʋ́nɩ́ saga, ʋ tʋn Zwida lʋʋ lɩ̀à tə mama nə, ba nə wulə pɩ̀ʋ́ Asuerusə payuu tə nagwanɛɛ tə mama wa, tə tə nə bwə́lə́, də tə tə nə ŋʋ́ná. 21 Ʋ swɩ̀n ba con, sə ba pa Adarə cànà tə dɩan fugə banɩa, də fugə bonu nii dɩan tə ya cànà diŋə dɩan, tə pa ba, bɩnɩ mama. 22 Cɩ́gá, dɩan təntə nə nə, Zwida lʋʋ lɩ̀à tə nɩ sìə́ ba dʋŋa jɩɩn. Yá cànà təntə wa nə, ba pucʋnɩ lwàń kʋ jì pupwən, ba lúə́ ga lwàń ka jì cànà. Ba yà mɛ sə ba pa dɩan təntə jì cànà diŋə, də pupwən dɩan, ba ma lìí yìə̀n təntə yoo. Ba yà mɛ sə ba pa zìlə́ wiən duən nə, ba ga də́ zìlə́ lalalŋa yuu wa. 23 Zwida lʋʋ lɩ̀à tə sɛ̀, ba pa kʋ tə ba nə sinti ba fwa tə, də yìə̀n tə Marədoswe nə pʋ́pʋ́nɩ́, ʋ pa ba tə, jì ba yofwamɩʋn.

24 Cɩ́gá, Hamedata bìú Hamanə, ʋ nə yɩ Agagə dwíí lìù, ʋ ga yɩ Zwida lʋʋ lɩ̀à tə mama jarɩdon, yà tanɩ sə ʋ cʋ̀gʋ̀ Zwida lʋʋ lɩ̀à tə mɩ́ámɩ́án. Ʋ yà dɩlɩ pwárʋ́ bɩ̀á tə, ba nə boŋə Purimə, sə ʋ na dɩɩn tə, ʋ nə wá kə fən nəfarʋ ba waa, ʋ ga cʋ̀gʋ̀ ba mɩ́ámɩ́án. 25 Yá máŋá tə yoo tə twi pɩ̀ʋ́ tə yáá con, ʋ pɩn ba pʋ́pʋ́nɩ́ sagɩ don, sə yolwan tə Hamanə nə tanɩ, sə ʋ tʋn Zwida lʋʋ lɩ̀à tə yɩra, pìí kʋ tʋ Hamanə tətə yuu wa! Yá pɩ̀ʋ́ tə dàń pɩn nii, sə ba kùrí Hamanə də ʋ bɩ̀á tə, ba goli yoŋi nə! 26 Kʋ mʋ̀ nə pɩn, ba boŋə cànà dɩan təntə Purimə. Kʋ nan puurə sʋnuu tə yɩra, kʋ də̀ń nə yɩ “pwárʋ́ bìú”. Yá Zwida lʋʋ lɩ̀à tə dàń taa Marədoswe sagɩ təntə wa yìə̀n tə mama yɩrɩ, də yìə̀n ba tətə yii nə dìgə̀, də tə tə nə yí ba, 27 ba tún yofwamɩʋn, ba ga sɛ̀ sə ba tətə, də ba dwíə́ tə ba nə wá kə lʋʋ wa, də lɩ̀à tə mama nə wá gùlí ba tɩ̀àn Zwida lʋʋ lɩ̀à tə wa, tʋn kʋ, kʋ dàn ká kwɛ̀, dɩan bələ təntə wa, bɩnɩ mama, ndə kʋ nə pʋ́pʋ́nɩ́ sə ba tʋn nətʋ, máŋá tə wa ba nə lɩ ba tún kʋ yɩrɩ. 28 Yá Zwida lʋʋ lɩ̀à tə dàń mɛ sə ba lìí dɩan tə yoo, máŋá də máŋá mama wuuu, ba sànɩ́ tə mama wa, nagwanaa mama wa, də tɩʋ mama wa. Purimə dɩan təntə wà mɛ sə tə kwɛ̀ Zwida lʋʋ lɩ̀à tə titəŋi wa. Ba wà mɛ sə ba swɛ̀ɛ́ tə yoo, ba pa tə jɛ́n ba dwíə́ tə wa, ba nə wá kə lʋʋ wa.

29 Pakan Ɛsətɛrə, ʋ nə yɩ Abihayilə bʋ̀á, də Marədoswe, ʋ nə yɩ Zwida lʋʋ lìù, ja pàrɩ̀ dɩ̀àn tə mama, ba nə jə, ba ma pʋ́pʋ́nɩ́ bələ nii sagɩ kʋ tə, sə ba ma nyɩ́n Purimə dɩan tə yoo yuu wa. 30 Ba pʋ́pʋ́nɩ́ sìə́, də ka ya pùə́ nədʋ sʋ̀ràn, ba kə saga wa, ba tʋn Zwida lʋʋ lɩ̀à tə mama nə, Pɩ̀ʋ́ Asuerusə payuu tə nagwanɛɛ 127 tə mama wa. 31 Ba tún Purimə dɩan təntə tə máŋá wa, sə tə lìí ba, ba nivori də pucʋnɩ sʋ̀ràn dɩan tə yoo, ndə Marədoswe, ʋ nə yɩ Zwida lʋʋ lìù, də pakan Ɛsətɛrə yà nə tún tə, ba pa ba nətʋ, yá ba də ga tún tə, ba pa ba tətə, də ba dwíə́ nə, ba nə wá kə lʋʋ wa. 32 Nii tə Ɛsətɛrə nə pɩn, yɩ Purimə yìə̀n tə yuu wa nə kʋ nyɩ́n, yá ba pʋ́pʋ́nɩ́ tə, ba tún sagɩ kʋ tə wa.