37
1 Kʋ mʋ̀ nə pɩn à bɩcan vuvugə,kʋ faŋa kʋ naŋa kʋ bwálɩ́ nə.
2 Á cʋga, á cʋga Yɩɩ bagʋ kori,
zizigu tə nə naŋa ʋ nii wa!
3 Ʋ yàá pa zizigu tə sú lanworu tə mama,
ʋ dwà pɩpɩlʋ tə pɩrɩ tɩa tə mama,
kʋ va kʋ yí ka nii yígúrə́ wa.
4 Kʋ kwa nə, Yɩɩ dàń yàá baa də kobɩa.
Yá ʋ nə baa nətʋ,
ʋ yàá kʋ́ʋ̀ ba dwà pɩpɩlʋ tə nə cɩ̀.
5 Yɩɩ yàá baa də kobɩa, yá kʋ jə fɩra!
Ʋ tʋŋa yofaran,
nə nə wàrɩ̀ tə də̀ń nə lwarɩ.
*
6 Ʋ yàá pa nii waran fìú nə, ʋ wʋ́:
«Cú tɩa yuu ndə dwà zuzuru nə!»
Ʋ yàá pa dwà nà, dwɛ nəfaran tətə.
7 Yá ʋ dàń yàá pa ləzwənə mama
jɩɩn tʋtʋŋɩ cən kʋ zɩgɩ,
sə kʋ pa ləzoni mama lwarɩ də,
ba yɩ ʋ mʋ̀ Yɩɩ jɩɩn tʋtʋŋɩ.
8 Ganaŋʋ yàá zʋ
kʋ tígə́ kʋ yipaa bwálɩ́ nə.
9 Vʋʋ nəfarʋ naŋa jɩgwiə saparʋ con,
yá jɩzən saparʋ con vʋʋ ja waran kʋ twi.
10 Yɩɩ mɩɩ vʋʋ yàá pa nɩ́á zuri,
tə cilə tə kə duən nə.
Ʋ yàá pa buun nɩ́á kəri.
*
11 Ʋ yàá kə zuni bakwan tə wa,
ʋ yàá laga bakwan tə nə pɩpɩlɩ.
12 Ʋ mʋ́ nə pɩn tə viviri tɩa mama,
tə vəli bwálɩ́ tə ʋ nə pɩn tə nii sə tə va,
tə tʋn kʋ tə ʋ nə pɩn tə nii sə tə tʋn.
13 Tə mʋ̀ nə Yɩɩ ma tʋŋa ʋ fɩra tɩa yuu wa,
ʋ ma kəni ləzoni càn wa,
nə à yə̀ə́ ʋ ma fwa zəni ba yɩra.
*
14 Zɔbə, guni n zɩɩn,
n ma cʋgʋ yìə̀n təntə!
Zɩgɩ n bálɩ́ Yɩɩ yogwaran tə,
sə n nì tə də̀ń!
15 N yə̀ə́ nətʋ tə Yɩɩ nə kəni tə cwəŋə nə,
də nətʋ tə ʋ nə pɩn poni pɩpɩlɩ ʋ bakwan tə wa?
16 N yə̀ə́ nətʋ tə bakwan tə nə fwa
tə ma zɩga, tə ba vuvugə?
Yogwaran təntə yɩ lìù tə,
ʋ yənu nə bá tʋ́tʋ̀ná jə nyiən.
17 N mʋ́ lìù tə n gànàn nə yàá lɩŋɩ,
máŋá tə wa jɩgwiə saparʋ con vʋʋa
nə fuli tɩa tə yuu wa,
18 n wàá Yɩɩ nə n saŋa,
n larɩ bakwan tə nə lirə,
ndə lugu zəŋə nə naaa?
*
19 Bɩrɩ nəba kʋ tə nə nə mɛ sə nə swɩ̀n Yɩɩ con!
Nə kʋ́ʋ̀ wàrɩ̀ yoo mama nə swɩ̀n,
nə pubʋŋa nə wulə yikunu wa yɩrɩ.
20 À nə pɩ̀à sə à swɩ̀n,
kʋ mɛ sə à dí yáá à pa Yɩɩ yəni naaa?
Ləzwənə wá sɛ̀ ʋ lòrì sə Yɩɩ gʋ wá naaa?
21 Sɩ́ʋ́n nə, bakwan kwálɩ́ yɩcɔɔ tə nə,
nə kʋ́ʋ̀ ba kʋ poni na,
yá vʋʋ yàá bà kʋ laga tə.
22 Yá poni tə nə tùŋə̀ ndə sɩ́án nə,
dàń naŋa jɩzən saparʋ con kʋ bɩ̀àn.
Dun tə nə kɩkarɩ Yɩɩ ba kamandon jə!
23 Nə wàrɩ̀ Yɩɩ tə nə wulə tə mɛ yuu wa yɩra nə yí.
Ʋ dɩ̀àn tə, də ʋ cɩ́gá cwəŋə tə,
də ʋ nə twá cɩ́gá nə,
ndə kʋ nə mɛ nətʋ tə bɩrɩ
ʋ nə dáá zənzən nətʋ.
Ʋ bá lìù tə nə vəli cɩ́gá cwəŋə wa wʋwalɩ.
24 Kʋ mʋ̀ nə pɩn ləzoni mɛ sə ba dəri ʋ fən.
Ʋ yáá tə̀lə́ də lɩ̀à tə
nə bʋŋa də ba yɩ wʋbʋnyɩna.