Yɩɩ yàá kàrɩ̀ ləzoni
36
1 Elihu tə swɩ̀n ʋ súrí lá, ʋ wʋ́:2 «Zuri n yɩra mancɩn,
sə à tə kàrɩ̀ mʋ́ à súrí lá.
Cɩ́gá, à tə jə yìə̀n duən,
sə à swɩ̀n à ma zɩgɩ Yɩɩ jɩrɩmʋ.
3 À wá pa lʋʋ mama na
à yənu nə dáá kʋ mɛ nətʋ,
yá à wá pa cɩ́gá Yɩɩ tə nə,
ʋ nə fwa nə ʋ kə lʋʋ wa.
4 À nii sʋ̀ràn tə yɩ cɩ́gá cɩcɩ, tə tà kʋkʋn.
Kʋ yɩ lìù tə nə yɩ təgətəgə,
ʋ ga yɩ yənu tíú nə wulə n yáá con.
5 Yɩɩ nə wulə tə mɛ yuu wa,
yá ʋ bá lìù gwə̀nì.
Ʋ wulə tə mɛ yuu wa,
kʋ twá də ʋ pubʋŋa dɩ̀àn.
6 Ʋ ba yá ʋ pɩn wʋlʋnyiən mɩɩ yanɩ lʋʋ wa,
yá ʋ bʋ̀rɩ̀ ʋ pɩn cɩ́gá zʋra nə.
7 Ʋ bá ʋ yáá viviri ʋ kəni kwa,
ʋ ga yá cɩ́gá tíú.
*
Pɛ̀gá yɩ ʋ mʋ̀ nə jə̀ní ba padaʋ yuu,
ʋ pɩn ba də́ pàrɩ̀ máŋá mama wuuu,
sə kʋ pa ba na dun.
8 Ba nə vwə ba də banzala,
ba nə jìgə̀ lɛɛ ywə́ŋə́,
9 kʋ yɩ sə ʋ ma bɩrɩ ba ba tʋtʋnɛɛ nə yɩ nətʋ,
də cʋna tə ba fwìə́ tə nə pɩn ba tʋn.
10 Ʋ yàá van ba zɩɩn nə,
ʋ ma pá ba ʋ kə cwəŋə wa,
ʋ pa ba yá yolwan fwaŋʋ nə.
11 Ba nə cʋgʋ ba ga sɛ̀ nii,
ba wá gúrí ba dɩan ywánɩ́ wa,
ba ga fwa ba fɩra,
ba mɩɩ kori kʋ zwɛ̀.
12 Yá ba nə ba cʋga,
cwiin nə wá gʋ ba,
yá ba mɩɩ wá zwɛ̀,
pubʋŋa nə mùrì ba yɩrɩ.
13 Lɩ̀à tə nə ba Yɩɩ fən dəri lɩŋa ba twɩ.
Ba ba bubwi ba kəni Yɩɩ nə, sə ʋ san ba,
máŋá tə wa ʋ nə vwə ba də banzala.
14 Ba yàá tɩ ba zandʋan wa,
ba mɩɩ yàá zwɛ̀ cwàrʋ̀ wa.
15 Yá Yɩɩ yàá twá yinənyiən
yinəgə tə tətə nə, ʋ ma jon wá,
yá càn nə nə Yɩɩ yàá twá,
ʋ ma pa ʋ zɩɩn nì yoo də̀ń.
16 Ʋ yà van n də ʋ lɩ jɩgwarʋ wa,
ʋ pa n nə̀ń n ywánɩ́,
won mama ba mʋ́ wʋwalɩ,
yá wodirən tə nə ywán yà bʋ́rɩ́ mʋ́.
17 N nə bʋ̀rɩ̀ bʋra ndə wʋlʋnyiən nə,
bʋra də cɩ́gá cwəŋə wá ja n tətə.
18 Dàn ká pa lɩŋa zənzən kə mʋ́ càn wa,
nə à yə̀ə́ sə vwiŋə gɩgarɩ mʋ́ tə dʋgʋ.
19 N jɩjə wiən tə wàá tə cɩ̀
tə pɩn jɩgwarʋ ba mʋ́ yí naaa?
N kajaŋa tə mama wàrɩ̀ mʋ́ ka saŋa.
20 Dàn ká jələ tɩtɩn tə yuu wa,
kʋ nə wá pa lɩ̀à nyʋn ba bwálɩ́ wa.
21 Cɩ̀ n tɩ̀àn nə, dàn ká viviri n yáá n kə lwanɩ con!
Cɩ́gá, mə kʋ mʋ̀ nə pɩn lɛɛ yí mʋ́.
Yɩɩ yɩ pɩ̀ʋ́ tə mɛ yuu wa
22 Cɩ́gá, Yɩɩ yɩ pɩ̀ʋ́ tə mɛ yuu wa,
kʋ twá də ʋ dɩ̀àn nəfarʋ tə.
Karnyɩna wàà nə jə kàrà yənu ndə ʋ nə?
23 Wàà nə wàá wá ʋ bɩrɩ,
ʋ tʋtʋnɛɛ nə mɛ sə tə ya nətʋ?
Wàà nə wàá ʋ swɩ̀n, ʋ wʋ́:
“N wà zəni fwa!”
24 Dàn ká swɛ̀ɛ́ sə n bʋ ʋ tʋtʋŋɩ tə nə,
ləzoni nə dɩ gwaran ba ma pɩn dun.
25 Ləzwənə mama na kʋ,
lìù mama zɩga yiŋʋnɩ ʋ balɩ kʋ.
*
26 Yɩɩ dáá zənzən, yá nə yəri.
Ʋ bɩna nii wàrɩ̀ tə gàlɩ̀.
27 Ʋ yàá van nɩ́á tə nə wulə tɩa yuu wa,
ʋ pa tə jì fanɩʋ,
yá fanɩʋ tə yàá jì dwà, ka nà.
28 Bakwan tə yàá yá tə pa dwà tə nà,
nɩ́á pàlɩ̀ ləzoni kapʋpʋ yuu wa.
29 Wàà nə yə̀ə́ nətʋ tə
bakwan tə nə yàá fwa kʋ ma larɩ,
də nətʋ tə dwà nə yàá fwa
ka ma baa lanworu tə wa?
30 Nə̀ń, ʋ ja ʋ dwà pɩpɩlʋ ʋ kɩkarɩ ʋ tɩ̀àn,
ʋ ga piri mʋʋ dəkurən yuu nə.
31 Wiən təntə nə ʋ ma bʋ̀rɩ̀ lʋʋ dwíə́ tə bʋra,
ʋ pɩn ba wodiu, ʋ pɩn kʋ bʋ́rɩ́ ba.
32 Ʋ yàá tì dwà pɩpɩlʋ ʋ kə ʋ jɩtala wa,
ʋ ga tʋn kʋ ʋ pa kʋ baa won tə ʋ nə pɩ̀à.
33 Ʋ yàá twá ʋ dwà bagʋ nə,
ʋ ma bɩrɩ də ʋ bɩ̀àn,
yá vàná də tətə yàá lwarɩ də ʋ bwə́lə́.