Ləzwənə wàrɩ̀ cɩ́gá tíú ʋ yanɩ Yɩɩ yáá con
35
1 Elihu tə swɩ̀n ʋ súrí lá, ʋ wʋ́:2 «N bʋŋa də n jə cwəŋə,
sə n swɩ̀n də n jə cɩ́gá
n doni Yɩɩ naaa?
3 Cɩ́gá, n swɩ̀n, n wʋ́:
“À nə cɩ̀gà à tɩ̀àn nə,
à dàn ká tʋn cʋna tə
nywarɩ nə yɩ bɛ̀ɛ̀ kʋ pa nə?
Yá kʋ bɛ̀ɛ̀ nə wʋwalɩ Yɩɩ?”
4 À mʋ̀ nə wá le kʋ à pa mʋ́,
n mʋ̀ də n dabara tə mɛ.
5 Ywàń lanworu tə n jə́n!
Ywàń bakwan tə n jə́n,
tə nə wulə n yuu con nətʋ!
6 N nə tʋŋa cʋna,
kʋ bɛ̀ɛ̀ nə wʋwalɩ Yɩɩ?
Yá n nə vɩ nii máŋá mama,
bɛ̀ɛ̀ nə kʋ wá fwa wá?
7 N nə yɩ cɩ́gá tíú, bɛ̀ɛ̀ nə n pɩn wá?
Bɛ̀ɛ̀ nə ʋ wá jon n con kʋ wa?
8 N wʋlʋŋʋ tə yɩ n don ləzwənə nə
nə kʋ wàá kʋ zwɩ,
yá n cɩ́gá cwəŋə tə yɩ ləzoni nə nə
ka jə funə ka pa.
*
9 Lɩ̀à bubwi,
wʋlʋnyɩna nə fɩfɩn ba zənzən yɩrɩ,
ba boŋə ba pɩ̀à sáŋʋ́,
dɩ̀àn tɩ̀án nə kəni ba càn wa yɩrɩ.
10 Yá lìù mama ba swɩ̀n, ʋ wʋ́:
“Yɩɩ tə nə fwa nə, wulə yə̀n nə?
Ʋ mʋ̀ Yɩɩ tə ʋ nə kəni gwaran
pubʋŋa wa tɩtɩn nə wulə yə̀n nə?
11 Ʋ mʋ̀ Yɩɩ tə ʋ nə kàrɩ̀ nəba,
ʋ doni tɩa yuu vàná tə,
ʋ ga pɩn nəba wʋbʋŋa,
ʋ doni lanworu zuŋi tə wulə yə̀n nə?”
12 Ba bubwi ba kəni Yɩɩ nə,
ba pɩ̀à sáŋʋ́, yá ʋ ba le,
yolwafwana fwìə́ tə yɩrɩ.
13 Cɩ́gá mama, kʋ yɩ tʋtʋ, Yɩɩ ba cʋga!
Yɩɩ tə nə wulə tə mɛ yuu wa ba lá taŋa!
*
14 N nə swə n swɩ̀n də n ba Yɩɩ na,
n yoo wulə ʋ yáá con, dàn wá!
15 Yá sɩ́ʋ́n nə, Yɩɩ lɩŋa tə wà zàn,
yá ʋ fwa ndə ʋ yəri də
ləzoni swɩ̀n sʋlwana kapʋpʋ.
16 Kʋ mʋ̀ nə pɩn Zɔbə súrí ʋ nii,
ʋ ma swɩ̀n sʋvɛɛ,
də sʋ̀ràn tə nə ba də̀ń jə.»