Yɩɩ ba yolwan tʋŋa
34
1 Elihu swɩ̀n ʋ súrí lá, ʋ wʋ́:2 «Wʋbʋnyɩna, á cʋga à sʋ̀ràn tə!
Á mʋ̀ lɩ̀à tə nə jə yənu,
á gunə á zɩan á kə à con!
3 Cɩ́gá, zɩɩn yàá lilini sʋ̀ràn,
ndə nipaa nə yàá dídə́n wodiu nətʋ.
4 Kʋ mʋ̀ yɩrɩ, nə kúrə́ cɩ́gá cwəŋə nə tì,
nə lwara kʋ tə nə ziən nə pwə́rə́ wa!
*
5 Zɔbə yà wʋ́: “À yɩ cɩ́gá tíú,
yá Yɩɩ voŋi nə kʋ tə nə mɛ də nə.
6 À jə cɩ́gá, yá à jìgə̀ kʋ̀nkʋ̀nʋ,
Cɩan caŋɩ nə tə pa tɩan nə,
yá à wà cʋna tʋn.”
7 Bɛɛ wulə, ʋ nə nyən ndə Zɔbə nə,
ʋ nə də́ bɩyɩrɩ ndə ʋ nə nywɩn nɩ́á,
8 ʋ də cʋna lɩ̀à nə jə nimarʋ,
ʋ də wʋlʋnyɩna ga vəli də duən naaa?
9 Cɩ́gá, ʋ swɩ̀n ʋ wʋ́:
“Kʋ ba nywarɩ jə kʋ pa ləzwənə nə,
sə ʋ kə ʋ fɩra Yɩɩ nə!”
*
10 Á dàń cʋga à con,
á mʋ̀ lɩ̀à tə nə yə̀ə́ yoo də̀ń!
Yɩɩ ba wʋlʋŋʋ tʋŋa,
Yɩɩ tə nə wulə tə mɛ yuu wa
ba yoo tʋŋa, kʋ nə ba cɩ́gá cwəŋə tì!
11 Ʋ ŋwɩ́n kʋ tə nə mɛ də
ləzwənə tʋtʋnɛɛ, ʋ pɩn wá,
yá ʋ ŋwɩ́n lìù mama,
kʋ tə nə mɛ də ʋ napɩrɩ vəli.
12 Cɩ́gá mama, Yɩɩ ba wʋlʋŋʋ tʋŋa,
Yɩɩ tə nə wulə tə mɛ yuu wa
ba yoo tə nə tì cɩ́gá cwəŋə lwànɩ́.
13 Wàà nə pɩn wá nii,
sə ʋ ywàń tɩa tə yuu nə?
Wàà nə ken lʋʋ tə mama ʋ jɩɩn wa?
14 Də Yɩɩ yà nə yɩ ʋ tətə yoo nə ʋ bʋŋa,
ʋ yà wá jon ʋ Siŋu tə nə pɩn mɩɩ,
15 wonəŋə mama yà wá twá duən tə tɩ,
yá ləzwənə yà wá pìí ʋ zʋ pùrú wa.
*
16 N nə jə pubʋŋa, sə n cʋgʋ yoo kʋ tə!
Guni n zɩɩn, n cʋgʋ sʋ̀ràn tə à nə wá swɩ̀n!
17 Cɩ́gá mama, lìù tə nə culi
cɩ́gá cwəŋə wàá pàrɩ̀ ʋ də́ naaa?
N wá sɛ̀ n swɩ̀n n zɩgɩ Cɩ́gá Tíú tə nə,
ʋ dɩ̀àn nə dwə tə mɛ naaa?
18 Ba yàá swɩ̀n pɩ̀ʋ́ con də
ʋ yɩ bakʋkwanyiən,
ba ga swɩ̀n tɩʋ tɩ̀án con də
ba yɩ wʋlʋnyɩna naaa?
19 Yɩɩ ba yáá tɩ̀án dun ywàŋá,
ʋ ma ba jɩjə tíú jələ ʋ doni zʋrʋ,
ba mama nə yɩ ʋ mʋ̀ jɩɩn nə fwa yɩrɩ.
20 Ba yàá tɩ tɩtɩkwɩʋn nə,
ndə yii nə púə́ kʋ ga súrí nə.
Lalʋʋ yàá zàn ba zɩgɩ yáá tɩ̀án nə,
yá yáá tɩ̀án tə yàá nyʋn lá.
Ba yàá lɩ dɩ̀àn tíú də tətə,
ba kə vàn nə mwálɩ́ mwálɩ́.
21 Cɩ́gá, Yɩɩ yɩ́á wulə ləzwənə coŋi yuu,
yá ʋ ywàŋá ʋ napɩrɩ vəli mama.
22 Yikunu, nə à yə̀ə́ tɩan yuywara tə̀lə́,
lɩ̀à tə nə tʋŋa yìə̀n tə nə ba cɩ́gá cwəŋə tì,
nə wàá lá ba səgə.
*
23 Yɩɩ ba máŋá zənzən pɩ̀à,
sə ʋ ma mɩ̀àn ləzwənə,
sə ʋ dàń ga zɩgɩ lá
ʋ bʋ̀rɩ̀ bʋra, ʋ zɩgɩ ʋ nə.
24 Ʋ yàá nyʋnyʋgʋ ladɩra
də ʋ wà twarɩ sə ʋ jə́n
də ba nə cʋ̀gʋ̀ yoo,
ʋ ga tún ba duən ba bwálɩ́ nə.
25 Cɩ́gá, ʋ yə̀ə́ ba tʋtʋnɛɛ tə.
Tɩtɩn nədʋ wa nə ʋ yàá dɩ ba,
yá ba yàá tʋ ba pʋpʋgʋ.
26 Ʋ mà ba ndə wʋlʋnyɩna nə,
bwálɩ́ nə lìù mama nə wàá ba ʋ nɩ.
27 Kʋ yɩ ba nə yori ba yá wá,
ba ga wà ʋ coŋi tə mɩ̀àn ba lwarɩ tə nə pɩn.
28 Ba pɩn lalaŋʋ bubwiə dɩ̀ ka yí Yɩɩ,
ʋ mʋ̀ Yɩɩ tə ʋ nə nə̀ń yinənyɩna bubwiə.
*
29 Ʋ nə ba lá taŋa,
wàà nə wá swɩ̀n ʋ wʋ́ ʋ liitee?
Ʋ nə səgə ʋ yáá lʋʋ nii,
nə à yə̀ə́ ləzwənə yáá nə,
wàà nə wàá wá ʋ nɩ?
30 Yɩɩ ba sɛ̀ ʋ pɩn lɩ̀à tə
nə ba ʋ fən dəri də́ pàrɩ̀,
sə ba dàn ká kə lalʋʋ tə cʋna wa.
31 Lìù nə swɩ̀n Yɩɩ con, ʋ wʋ́:
“À pɩ́án à càn tə,
à kʋ́ʋ̀ bá tʋn yolwan.
32 Bɩrɩ nə à cʋna tə à nə yəri.
À nə tʋn lwanɩ à kʋ́ʋ̀ bá pìí à bwɛ́.”
33 Yɩɩ mɛ sə ʋ bwe mʋ́, ʋ na n pubʋŋa,
ʋ ma bʋ̀rɩ̀ bʋra ʋ zɩgɩ lìù nə naaa?
N mʋ̀ lìù tə n nə swə tʋ́tʋ̀ná,
n mʋ̀ nə wá kúrí n tì, kʋ tà à mʋ̀.
N dàń swɩ̀n kʋ tə n nə yə̀ə́.
*
34 Lɩ̀à tə nə yə̀ə́ yoo də̀ń,
də wʋbʋnyɩna tə nə cʋgʋ nə,
wá swɩ̀n, ba wʋ́:
35 “Zɔbə swɩ̀n sʋvɛɛ,
ʋ sʋ̀ràn tə ba də̀ń jə.
36 Zɔbə mɛ sə Yɩɩ bʋ̀rɩ̀ ʋ bʋra,
kʋ va kʋ yí kʋ yígúrə́,
ʋ nə le ndə yolwanfwana nə yɩrɩ.
37 Cɩ́gá, ʋ tʋn yolwan nəfarʋ,
ʋ súrí ʋ cʋna tə nə:
Ʋ tʋ́tʋ̀nɩ́ nə nii wa,
ʋ ga swɩ̀n ʋ zɩga Yɩɩ nə.”»