Yɩɩ yàá twá càn nə, ʋ ma cɩ́cágá ləzwənə nii nə
33
1 Elihu swɩ̀n ʋ súrí lá, ʋ wʋ́:«Sɩ́ʋ́n nə, Zɔbə, cʋgʋ kʋ tə à nə wá swɩ̀n,
guni n zɩɩn n cʋgʋ à sʋ̀ràn tə mama zəni!
2 Nə̀ń, à súrí à nii,
yá à nəndəli wá swɩ̀n à nipaa wa.
3 Kʋ yɩ də bɩcapon nə à pɩ̀à sə à swɩ̀n sʋ̀ràn təntə,
yá kʋ yɩ yənu sʋ̀ràn cɩ́gá cɩ́gá nə à nii wá swɩ̀n.
4 Yɩɩ Siŋu* tə nə ma nə,
yá Yɩɩ tə nə wulə tə mɛ yuu wa
vʋʋ tə nə pɩn nə mɩɩ.
5 N nə wàá sə n le nə, kə n sírí,
n nan n zɩgɩ à yáá, n tʋ́tʋ̀nɩ́ nə!
6 Yɩɩ yáá con, à də yɩ ndə n nə,
à də yɩ daʋ nə Yɩɩ ma fwa nə.
7 Kʋ mʋ̀ yɩrɩ, à nə jə fən tə
wàrɩ̀ bɩcapuri n nə kʋ kəni,
nii tə à nə jə ma wàrɩ̀ mʋ́ kʋ fɩfɩn.
*
8 Yá sʋ̀ràn tə n nə swɩ̀n,
ŋʋwanɩ à zɩan wa.
9 N swɩ̀n n wʋ́: “À mʋ̀ wà yoo cʋ̀gʋ̀,
sə ba ma caga à nii nə,
à ba lwanɩ jə,
yolwan mama tə̀lə́ à yɩra.
10 Yá Yɩɩ tə na yìə̀n à mɩɩ wa,
ʋ nə zɩga à nə, tə yɩrɩ,
yá ʋ dàń jələ nə ndə ʋ dʋŋʋ nə.
11 Ʋ ken banzala à nɛɛ nə,
ʋ ga mɩ̀nɩ̀ à tʋtʋnɛɛ mama!”
12 Zɔbə, à wá bɩrɩ mʋ́
də kʋ nətʋ tə wa, n bá cɩ́gá jə.
Cɩ́gá, Yɩɩ dáá zənzən ʋ doni ləzwənə.
13 Bɛ̀ɛ̀ nə pɩn n pɩ̀à n tʋ́tʋ̀nɩ́ də Yɩɩ?
Cɩ́gá, lìù wàrɩ̀ ʋ pɩn ʋ túŋə́ ʋ nii,
yìə̀n tə mama yɩrɩ ʋ nə tʋŋa.
*
14 Yɩɩ yàá twá yìə̀n yirə yirə nə ʋ ma swɩ̀n,
yá ləzwənə ba tə mɩ̀nɩ̀.
15 Yɩɩ yàá twá pandwɩa nə,
nə à yə̀ə́ tɩtɩn nɩʋn nə, ʋ ma swɩ̀n,
máŋá tə wa dwiən nə jə ləzoni,
yá ba tígə́ ba sàrɩ́ wa, ba dwɛ̀ lɩ́gɩ́.
16 Yɩɩ dàń yàá bɩrɩ yìə̀n ləzoni nə,
ʋ ga kə ʋ kàrà tə mɩmɩnʋ ba bɩcanɩ wa.
17 Yɩɩ yàá fwa kʋ nətʋ tə,
sə ʋ ma lɩ ləzwənə ʋ tʋtʋnɛɛ tə wa,
ʋ ga cɩ̀ dɩ̀àn tíú nə də fwìə́,
18 sə ləzwənə jə̀rə́ tə dàń ká zʋ bʋʋ wa,
ʋ ga cɩ̀, sə cwiin dàn ká cʋ̀gʋ̀ ʋ mɩɩ tə.
*
19 Yɩɩ yàá twá yɩŋa də nə,
ʋ ma van ləzwənə zɩɩn nə, sara wa,
ʋ pa ʋ kurən tə vɩvaga, kʋ ba zwɛ̀.
20 Yá ʋ waa dàń yàá nan wodiu,
də ʋ fɩra wodirən də tətə.
21 Ʋ yàá bwànɩ́ yɩ́á wa,
yá ʋ kurən tə ba yà nə ba na,
dàń yàá nan tə nyɩn poni nə.
22 Ʋ jə̀rə́ tə bwə́lə́ bʋʋ nii,
yá ʋ mɩɩ tə wulə tɩan malɩkɛ jɩɩn wa.
23 Yá Malɩka* nə wulə,
ka nə janɩ Yɩɩ nadwan nə, ʋ yuu yɩrɩ,
malɩka nədʋ cɩcɩ, malɩkɛ mʋ̀rʋ̀ wa,
sə ka bɩrɩ ləzwənə nə,
kʋ tə ʋ nə mɛ sə ʋ tʋn,
24 malɩka təntə wá dəri ʋ yinəgə,
ka ga swɩ̀n Yɩɩ con, ka wʋ́:
“Jon wá, sə ʋ dàn ká zʋ bʋʋ wa,
à nɩ ʋ yuu ŋwɩ́rán!”
*
25 Yá ʋ yatana tə dàń yàá pìí
ka na ka zandwan yazurə tə,
ʋ ga pìí ʋ yɩ ndə máŋá tə wa,
ʋ yà nə yɩ bisɩmaa.
26 Ʋ lòrì Yɩɩ,
yá Yɩɩ sɛ̀ ʋ fwa pubwanʋ ʋ yɩra.
Ʋ dàń twi Yɩɩ yáá con də pupwən cə̀rí,
Yɩɩ nə kʋ́ʋ̀ jələ wá ndə lìù nə,
ʋ nə wulə cɩ́gá cwəŋə wa yɩrɩ.
27 Ʋ nuŋə ləzoni yáá con, ʋ swɩ̀n ʋ wʋ́:
“À yà tʋn cʋna, à dwá cɩ́gá cwəŋə,
yá Yɩɩ wà nə càn wa ken
ndə kʋ yà nə mɛ də nə nətʋ.
28 Yɩɩ jon à jə̀rə́ tə,
sə ka dàn ká zʋ bʋʋ wa,
yá à mɩɩ tə dàń wá na poni.”
*
29 Nə̀ń kʋ tə mama Yɩɩ nə tʋŋa,
nɛɛ bələ, nɛɛ batwa, ʋ pɩn ləzwənə nə,
30 sə ʋ ma lɩ ʋ jə̀rə́ tə bʋʋ wa,
ʋ ga pɩ̀rɩ̀ wá də poni tə nə pɩn mɩɩ.
31 Guni n zɩɩn n cʋgʋ à con, Zɔbə!
Pú n nii, n ga yá n pa à mʋ̀ nə swɩ̀n!
32 N nə jə yoo sə n ma le nə, sə n swɩ̀n!
Swɩ̀ń! Cɩ́gá, à swə sə à pa mʋ́ cɩ́gá.
33 Kʋ nə tà nətʋ, sə n mʋ̀ cʋgʋ nə!
Pú n nii, yá à wá kàrɩ̀ mʋ̀ wʋbʋŋa.»