ELIHU NII SƲGƲ
(32—37)
32
1 Bara batwa tə púə́ ba nii, ba kʋ́ʋ̀ ba Zɔbə le, ʋ nə jələ ʋ tɩ̀àn ndə cɩ́gá tíú nə yɩrɩ. 2 Yá Barakeyɛlə bìú Elihu, ʋ nə yɩ Buzə dwíí, ʋ ga yɩ Ramə sàń tə wa lìù, lɩŋa dàń kwé ndə mən nə, tə pupwin Zɔbə yuu wa, ʋ nə na də Zɔbə jələ ʋ tɩ̀àn ndə cɩ́gá tíú nə, ʋ doni Yɩɩ yɩrɩ. 3 Ʋ lɩŋa kwé ʋ dabara batwa tə yuu wa, ba nə wà yoo nɩ sə ba ma le Zɔbə yɩrɩ, yá də kʋ nətʋ mɛ, ba tə swɩ̀n ba zɩga ʋ nə. 4 Elihu twaduən tə mɩɩ yà nə kʋ wá tə yɩrɩ, ʋ dàn ʋ pa ba dí yáá ba swɩ̀n, ʋ dàń ga zɩgɩ lá ʋ swɩ̀n Zɔbə con. 5 Yá Elihu nə nɩ də bara batwa təntə yà kʋ́ʋ̀ ba yoo jə ba nii wa, ba nə wá ma le Zɔbə, ʋ lɩŋa kwé ndə mən nə.Elihu bɩrɩ won tə nə pɩn ʋ mɛ sə ʋ swɩ̀n
6 Barakeyɛlə bìú Elihu, ʋ nə yɩ Buzə dwíí lìù tì sʋgʋ, yá ʋ swɩ̀n ʋ wʋ́:
«À mʋ̀ yɩ bisɩmaa, à dɩan ba dáá,
yá á mʋ̀ yɩ bazʋnan,
kʋ mʋ̀ nə pɩn à vɩvaga, à ga dəri fən,
sə à man kʋ tə à nə yə̀ə́, à bɩrɩ aba.
7 À yà swɩ̀n à waa con də
nəkwɩa nə mɛ sə ʋ swɩ̀n,
bɩna kapʋpʋ tíú nə yə̀ə́ wʋbʋŋa sʋ̀ràn!
8 Yá cɩ́gá mama,
Yɩɩ tə nə wulə tə mɛ yuu wa siŋu* tə,
kʋ nə wulə ləzwənə wa,
nə pɩn ləzwənə lwarɩ yoo də̀ń.
9 Kʋ tà bɩna kapʋpʋ nə pɩn wʋbʋŋa,
kʋ ma tà bazʋnan cɩcɩ nə yə̀ə́
kʋ tə nə tì cɩ́gá cwəŋə.
10 Kʋ mʋ̀ nə pɩn à lòrì aba,
sə á cʋgʋ à con,
sə à də man kʋ tə à nə yə̀ə́, à bɩrɩ aba!
*
11 À dàn, à cʋgʋ á sʋ̀ràn tə,
á kori á swɩ̀n á zwɛ̀.
À guni à zɩɩn, à cʋgʋ kʋ tə mama,
á nə lilini á na, ʋ sʋ̀ràn tə wa.
12 À zuri à yɩra à cʋgʋ á sʋ̀ràn tə zəni,
yá á lìù mama wà wànɩ́ ʋ swɩ̀n,
ʋ dɩ Zɔbə.
Á lìù mama wà wànɩ́ ʋ le yoo,
ʋ sʋ̀ràn tə wa.
13 Á cɩa á tɩ̀àn nə,
á dànà ká sɩnɩ á swɩ̀n á wʋ́:
Nə nɩ də ʋ jə wʋbʋŋa!
Yɩɩ nə wàá wá ʋ swɩ̀n ʋ dɩ,
kʋ tà ləzwənə!”
14 Zɔbə wà swɩ̀n ʋ te nə,
à ma bá nyɩ́n á sʋ̀ràn tə yuu wa,
à ma le wá.
*
15 À twaduən tə jɩ̀àn gwàrɩ̀, ba kʋ́ʋ̀ wàrɩ̀ ba le!
Ba kʋ́ʋ̀ yəri yoo tə ba nə wá swɩ̀n!
16 À dàn, yá ba kʋ́ʋ̀ ba yoo swɩ̀n.
Yá ba dàń nə zɩga, ba kʋ́ʋ̀ ba le tə yɩrɩ,
17 máŋá dàń yí sə à də le!
À də wá man kʋ tə à nə yə̀ə́, à bɩrɩ.
18 Cɩ́gá, yìə̀n súə́ à waa, à nə jə sə à swɩ̀n,
yá won wulə à waa,
kʋ yigə nə sə à swɩ̀n tə.
19 À waa tə yɩ ndə divɛn nə pupwin,
yá ba sun tə nii nə,
ba kə púrə́ nədʋra wa,
tə pɩ̀à sə tə pwin.
20 À wá swɩ̀n,
sə à wànɩ́ à na à tɩ̀àn,
à wá súrí à nii à le.
21 À ba dəri lìù mama yii,
à ma bá gɩgarɩ ləzwənə.
22 Cɩ́gá, à yəri ka gɩgarɩ lìù.
À yà nə yɩ lìù tə à nə gɩgarɩ lɩ̀à,
Yɩɩ tə nə fwa nə ʋ kə tɩa yuu wa,
yà wá lɩ à mɩɩ lala.»