Zɔbə bɩrɩ də ʋ wà yoo cʋ̀gʋ̀
31
1 Zɔbə kʋ́ʋ̀ swɩ̀n ʋ súrí lá, ʋ wʋ́: «À yà tún nimarʋ də à yɩ́á,
də à wá cɩ̀ à tɩ̀àn nə,
à dàn ká ywàń kacɩɩn,
sə ʋ fɩra zʋ nə də mama.
2 Bɛ̀ɛ̀ yà nə wá ya à tori,
Yɩɩ nə wá zɩgɩ lanworu tə wa, ʋ pa nə?
Bɛ̀ɛ̀ nə Yɩɩ tə nə wulə tə mɛ yuu wa
yà wá zɩgɩ lanworu tə wa,
ʋ tʋn à nə, sə kʋ ya à tori?
3 Lɛɛ tà cʋna lɩ̀à nə tə yàá yí,
basarʋ ga yí wʋlʋnyɩna naaa?
4 Kʋ tà Yɩɩ nə ywàŋá à napɩrɩ vəli yuu,
ʋ ga gàlɩ̀ à nagalan tə mama naaa?
*
5 Də à nə yɩn lìù tə à nə sóní kʋ̀nkʋ̀n,
à naa ga bɩbarɩ ka tì gɩgɩra cwəŋə,
6 sə Yɩɩ kəri nə cɩ́gá səkəri yuu wa,
yá ʋ wá na də à yɩ təgətəgə!
7 Də à naa nə yori ka yá
cwəŋə tə nə yɩ mənəmənə nə,
à bɩcan nə twá à yɩ́á fɩra yìə̀n nə,
durən yìə̀n nə tà à jɩ̀àn,
8 sə à dù à pa lìù don nə ʋ də́,
nə à yə̀ə́ sə ba mùrí à kárá wiən mama!
*
9 Də kan fɩra nə zʋa à bɩcan wa,
à nə pálɩ́ à jəndon mimii nə,
à ma dànɩ̀ ʋ kan,
10 sə à kan gà mun ʋ ma kʋna bɛɛ don,
sə bara duən ga pə̀ń wá də dɩ̀àn!
11 Cɩ́gá, kʋ yɩ yobalwarʋ, yolwan,
bʋra lɩ̀à nə kəni lɩ̀à càn wa kʋ yɩrɩ.
12 Kʋ yɩ ndə mən nə,
tə nə də́ tə vəli tə yí ciru,
yá kʋ yà wá də́ à jɩɩn won mama,
kʋ cʋ̀gʋ̀ mɩ́ámɩ́án.
*
13 À də à tʋtʋnbiu,
nə à yə̀ə́ də à tʋtʋnbʋa nə van duən,
à nə wà kʋ tə nə mɛ də ba nii zìlí,
14 nətə nə à wá fwa,
máŋá tə Yɩɩ nə zàn ʋ zʋ kʋ wa?
Yá ʋ nə bwe nə, nətə nə à wá le?
15 Kʋ tà lìù tə nə ma nə à nuu pùə́ wa,
nə ma ba də naaa?
Kʋ tà Yɩɩ nədʋ tə nə fwa nəba,
ʋ kə nə lìù mama nuu pùə́ wa naaa?
*
16 À voŋi lalaŋa kʋ tə ba yà nə pɩ̀à,
à ga pa kadənu kwɩ̀n ʋ yala nə naaa?
17 À cɩcɩ dí à wodiu,
à ga yá bɩtarʋ naaa?
18 Kʋ nə zɩgɩ à zandʋan mama,
ʋ yɩn à səpuni nə ʋ bori,
ndə bisɩmaa nə, ʋ nyɩna səpuni nə.
À lʋʋ wúlú tə mama,
à yɩn kadənu sáŋʋ́.
19 À tə nɩ yinənyiən də ʋ bá gànàn jə,
nə à yə̀ə́ zʋrʋ də ʋ bá gansara jə,
20 də à wà à pəbii bɔɔ gantwan ma piri ba,
ba ga kə à lɛ̀ɛ̀ də ba waa mama naaa?
21 À nə zɩ̀n à jɩɩn à zɩgɩ bɩtarʋ nə,
à nə na də bʋra lɩ̀à nii wulə à kwa yɩrɩ,
22 sə à vàn pɩrɩ kʋ nan à vapɔɔ yɩra,
sə à jɩvaŋɩ ga pɩrɩ kʋ nan à jɩ̀tɔ́ɔ́ nə,
kʋ ga kɛ́n!
23 Cɩ́gá, à dəri lɛɛ tə fən,
Yɩɩ nə wá pa tə yí nə,
yá à wàrɩ̀ won mama à fwa,
ʋ pàrɩ̀ dun tə yáá con.
*
24 À jələ sɩ́án yuu wa naaa?
À swɩ̀n sɩ́án tə nə ba durən jə con,
à wʋ́: “N mʋ́ dɩ̀àn nə à jə” naaa?
25 À fwa pupwən à jɩjə wiən kapʋpʋ yɩrɩ,
à jɩɩn nə tʋn kʋ na naaa?
26 À nə ywàń yɩcaʋ tə poni tə,
máŋá tə wa kʋ nə tùŋə̀,
də cànà tə, máŋá tə wa ka nə pɩ̀rɩ̀,
27 à bɩcan nə twá tɩa tɩa,
kʋ yá kʋ pa tə fɩra zʋ kʋ,
à nə ken à jɩɩn à nii nə, à mu,
sə à ma pa tə dun ndə yɩa nə,
28 kʋ də kʋ́ʋ̀ yɩ yolwan,
kʋ nə mɛ sə ba bʋ̀rɩ̀ à bʋra,
ba kə nə càn wa kʋ yɩrɩ.
Yá də à cɩ́gá nə tʋn yoo təntə,
kʋ bɩrɩ də à vɩga Baan Yɩɩ!
*
29 À jwɛ yojanʋ nə yí à dʋŋʋ yɩrɩ naaa?
À fan də pupwən lɛɛ nə yí wá yɩrɩ naaa?
30 À wà yá à pa à nəndəli tʋn cʋna,
sə kʋ zɩrɩ kʋ kə à dʋŋʋ nə,
sə Yɩɩ gʋ wá.
31 À dìə̀ lɩ̀à tə də tətə swɩ̀n, ba wʋ́:
“Wàà nə nə Zɔbə wà nàŋʋ́ pɩn, ʋ də́ ʋ sú?”
32 Vee yà ba kàrá wa jwɩ,
à yàá súrí à mimii à pa cwəvəlu nə.
*
33 À səgə à cʋna tə ndə ləzwənə mama nə,
à ga cɩ̀ à yolwana tə, à kə à waa naaa?
34 Kʋ tə lalʋʋ tə nə wá swɩ̀n fən yà jə nə naaa?
Sànɩ́ tɩ̀án yà wàá nə ba swì də fʋfʋlʋ,
kʋ pɩn à pwí à nii,
à ga ba à mimii wa naŋa naaa?
*
35 Ooo! Wàà nə wá san nə,
sə à na lìù ʋ nə wá cʋgʋ à con?
Nə̀ń à talɩkwa yoo:
Yɩɩ tə nə wulə tə mɛ yuu wa wá le nə!
Yoo tə à jarɩdon nə pʋ́pʋ́nɩ́,
ʋ ja zɩga à nə,
36 à bá zɩn kʋ à pàrà wa naaa?
À bá vwa kʋ à yuu nə, ndə payupuu nə naaa?
37 À wá yí Yɩɩ yɩra, ndə yáá tíú nə,
à tún à nagalan tə mama nii ʋ yáá con.
*
38 À nə vɩrɩ kárá,
kʋ pa ka bubwi ka zɩga à nə,
à nə pɩn ka bɩnbɩran tə lwá yɩnɩa,
39 à nə dí ka lənə tʋtʋ,
à ga cʋ̀gʋ̀ ka tɩ̀án pùə́ nə,
40 sə casʋran də gakʋkwɩʋn
nə pɛ́n kárá tə wa,
kʋ dàn ká ya dipɛn mɩna,
də dipɛn mɩna yiri don!»
*
Zɔbə sʋ̀ràn tə yígúrə́ nə yəbə.