Zɔbə yinəgə tə yoo
30
1 Zɔbə swɩ̀n ʋ súrí lá, ʋ wʋ́:«Yá sɩ́ʋ́n nə, nə̀ń kʋ nə
à nyanbwalɩ tətə dàń pwɛ́ nə,
yá à yà ba ba nyɩna-ba tətə pɩ̀à,
sə à kə à vàná kukuri wa.
2 Bɛ̀ɛ̀ nywarɩ nə ba vàn dɩ̀àn yà jə kʋ pa nə?
Ba dɩ̀àn mama yà zwɛ̀.
3 Zʋrɩ də niən bibəni ba,
ba twá digə wa ba ywaŋa,
ba ma pɩ̀à won sə ba cɩ̀gà,
cʋcʋran də pucʋnɩ tɩkʋrʋ wa.
4 Ba mùrí nəkuən gaʋ tuni səpuni nə,
yá fʋfʋlon ŋʋnan yà nə yɩ ba wodiu.
5 Ba dɩŋɩ ba ba lɩ ləzoni dwíí wa,
ba wòrí ba ndə ŋwɩ̀nà nə,
6 ba ja va ba kə nacorən gungwərən wa,
də pɛɛn bʋran wa, də pɩ̀ràn kwə̀lə́ wa.
7 Ba nyɩ́n duən yuu cwalʋ wa,
ba ga wòrí tuni wa, ndə bɩ̀nɛ̀ nə.
8 Ləzwənywanan, ba nə ba dəkuu jə,
ba nə mà ba ba lɩ lʋʋ nii tə wa.
*
9 Yá sɩ́ʋ́n nə, à mʋ̀ nə ba dàń nuŋə,
à mʋ̀ dàń nə jìgə̀ ba viə yoo.
10 Ba nyáŋá nə,
kʋ pa ba va yiŋʋnɩ də nə,
yá fən ba ba jə,
sə ba cɩ́rɩ́ mɩmɩan à yáá con.
11 Cɩ́gá, Yɩɩ bwànɩ̀ nə, ʋ pa à fʋfʋlɩ,
kʋ pa ba kʋ́ʋ̀ ba nə zìlí mancɩn tətə.
12 Ba mʋ̀ jɩmurinyɩna tə zàn ba zɩga
à jɩzən yuu, sə ba pùrì à nɛɛ nə,
ba pɩ̀à coŋi, sə ba ma pa yoo yí nə.
13 Ba goŋi à yáá nə,
yá ba kəni dɩ̀àn sə ba cʋ̀gʋ̀ nə,
də lìù mama wà ba nə san.
*
14 Ba bəbəri ba bɩ̀àn,
ndə luloo nəfarʋ nə ba twá ba nan,
ba lulugə tɩran də̀ń, ba bɩ̀àn à con.
*
15 Bɩcapuri púə́ nə kʋ kə,
kʋ jànɩ̀ à dun tə ndə vʋʋ nə,
yá à ywánɩ́ tə kɛ̀ń ndə bakwan nə.
16 Sɩ́ʋ́n nə, à wulə à mɩɩ tə nə à kwɩ̀n,
yinəgə máŋá wa nə à dàń wulə.
17 Tɩtɩn nə, à kurən tə yàá yɩ̀ ndə tə wá pwin,
yá yɩŋa tə nə pɩn à də́ càn yɩ máŋá mama, sìə́ tə̀lə́.
18 Yɩɩ pùrì à gànʋ̀ nə də dɩ̀àn,
ʋ kàŋɩ̀ à gànʋ̀ bɩan nə.
19 Ʋ dɩga nə tɩtaran wa,
yá à dàń jìgə̀ ndə pùrú də tʋnan nə.
*
20 À tíú Yɩɩ, à boŋə à kəni n nə sə n san nə,
yá n ba nə le.
À zàn à zɩga yɩɩ nə,
yá n ba à con taŋa.
21 N jìgə̀ wʋlwanyiən à yɩra,
n tɛ nə də n jɩɩn dɩ̀àn mama.
22 N pɩn vʋʋ jànɩ̀ nə,
ndə à jə̀ə́ səsen yuu,
yá n pɩn à vuvugə,
ndə à wulə dwavʋʋ wa.
23 À yə̀ə́ zəni,
də kʋ yɩ n ja nə n vələ tɩan wa,
bwálɩ́ tə ləzoni mama nə vəli,
ba tɩan kwa nə.
24 Tɩan yojanʋ nə yí lìù,
kʋ tíú yàá ba ʋ jɩ̀àn te naaa?
Lɛɛ nə yí lìù,
kʋ tíú yàá ba sáŋʋ́ lòrì naaa?
25 À wà kwi à pa lɩ̀à tə nə,
basarʋ nə yí ba naaa?
À pùə́ wà cʋ̀gʋ̀ yinənyɩna yɩrɩ naaa?
26 À yà jə ywánɩ́ yala,
yá càn nə pìí tə bà.
À yà dànɩ̀ poni,
yá yikunu nə pìí kʋ bà.
*
27 À lʋran cʋrɩ tə ba zɩga.
À wulə yinəgə máŋá wa.
28 À yɩ à vəli yikunu wa,
à ba yɩcɔɔ poni na!
À nyɩ́n à zàn kunə wa,
à bubwi à pɩ̀à sáŋʋ́.
29 À jìgə̀ cirəkuri nubiu,
tɛɛtɛɛ twadon.
30 À tànʋ̀ beri kʋ kwalɩ à yɩra,
yá yalɩŋa pɩn à kurən wiri.
31 À kwànʋ́ dàń yɩ lúə́ gwaran nə kʋ dɩ,
à wúə́ ga kwé lɩ̀à tə nə nuŋə də ba kwi.»