ZƆBƏ ŊƲŊWƖAN
(29—31)
Zɔbə pìí ʋ lìí ʋ dɩ̀ɩ̀n ywánɩ́ tə yoo
29
1 Zɔbə kʋ́ʋ̀ tún ʋ nii, ʋ wʋ́:2 «Ooo! À yà nə wàá à dɩ̀ɩ̀n ywánɩ́ tə à pìí à nɩ,
à yà nə wàá à pìí à yanɩ ndə
máŋá tə wa Yɩɩ yà nə cɩ̀ à nə,
3 ʋ nə ken ʋ cànʋ́ tə à yuu con,
yá kʋ poni pɩn à vəli yikunu wa!
4 À yà nə wàá à pìí à yanɩ ndə,
à yà nə yɩ nətʋ,
máŋá tə wa à yà nə dà,
máŋá tə wa Yɩɩ yà nə ywàŋá
à dìə̀ yuu, ndə à dabɛɛ nə!
5 Máŋá təntə, Yɩɩ tə nə wulə
tə mɛ yuu wa yà tə nə wulə də nə,
yá à bɩsɩmabarɩ kɩkarɩ nə tɩa mama!
6 Máŋá təntə, à yà nə jə vàná kapʋpʋ,
tə pɩn nə nayɩlɩ nʋga,
nʋga ga pàlɩ̀ à nʋga gwàlán wa, ndə nacoŋi nə!
*
7 À yà nə naŋa à vələ tɩʋ tə mimiia nə,
sə à jə̀ń à yijaa nə, tɩʋ tɩ̀án púlí wa,
8 ləzwəndʋn tə nə nɩ nə,
ba yàá ywəri ba yá cwəŋə,
yá bazʋnan zaŋa ba zɩga yɩɩ nə.
9 Tɩʋ tɩ̀án yàá yá ba viə nə,
ba ga ja ba nii nə.
10 Yáá tɩ̀án yàá pú ba nii,
ba nəndəli ga kwalɩ ba nipaa nə.
*
11 Cɩ́gá, zɩɩn tə kʋ nə nì à sʋgʋ,
yàá swɩ̀n də à yɩ pupwən lìù,
yá yii tə kʋ nə nɩ nə, yàá bʋ à nə.
12 Cɩ́gá, à yà yàá jon zʋrʋ tə,
ʋ nə bubwi ʋ pɩ̀à sáŋʋ́,
də bɩtarʋ tə, lìù mama nə ba saŋa.
13 Lìù tə nə wulə ʋ tɩ yàá lòrì Yɩɩ,
sə ʋ fwa zəni à yɩra.
À yà pɩn kadənu bɩcan swí də pupwən.
14 Cɩ́gá cwəŋə yà yɩ ndə ganzɩʋ nə, à nə zwɩ,
yá à nə zìlí kʋ tə nə yɩ mənəmənə tə
yà yɩ ndə à ganzɩfarʋ də yubarʋ nə.
15 À yɩn liliu yɩ́á,
à ga ya gwànʋ́ nɛɛ.
16 À yɩn lalaŋa nyɩna,
yá à zəŋə vee yoo zəni.
17 À yà lwe gɩgɩrɩnyiən nipaa,
à ga lɩ ʋ gɩgɩra wodiu ʋ yelə wa.
*
18 À dàń yà swɩ̀n à waa con, à wʋ́:
“À wá na bɩna kapʋpʋ lʋʋ wa, ndə kasɩlʋ nə,
à mɩɩ dàń ga zɩgɩ lá kʋ zwɛ̀ à pwalʋ wa.
19 À ŋʋnan wá tɩɩn tə va nɩ́á con,
yá nyʋ̀nʋ̀ wá vwa à naywalan yuu wa, tɩtɩn nə.
20 À dun wá pìí tə bwin,
yá à twan wá pìí ka ja dɩ̀àn, à jɩɩn wa.”
*
21 Kʋ máŋá tə wa, lɩ̀à yà cʋga à sʋgʋ.
Ba yàá zɩgɩ sənbwen, ba dànɩ̀ sə ba nì à kwìə̀.
22 À nə swɩ̀n à zwɛ̀, lìù mama ba tʋ́tʋ̀nɩ́,
yá à sʋ̀ràn tə dàń yà zwɩ ba mama zɩan.
23 Ba yàá dànɩ̀ nə,
ndə ba nə dànɩ̀ dwà nətʋ,
ba yàá súrí ba nii,
ndə ba pɩ̀à ba ma lòní talɩkwa dwà.
24 Ba pùə́ nə cʋ̀gʋ̀,
à yàá poli à yáá ba yuu wa,
yá kʋ yàá gwárɩ́ ba,
ba yà nə ba kʋ nətʋ tə yala jə yɩrɩ.
25 À mʋ̀ yà nə wulə ba yáá,
à bɩrɩ ba cwəŋə,
yá à dàń yà jìgə̀ ndə pɩ̀ʋ́ nə,
ʋ kwatara púlí titəŋi wa,
à yà jìgə̀ ndə lìù nə,
ʋ nə kwè lɩ̀à tə pucʋnɩ nə yí ba.»