Wʋbʋŋa yosəgu
28
1 Bwálɩ́ wulə ba nə kwɩ wárʋ́ ba lɩ lá,bwálɩ́ ga wulə ba nə kwɛn sɩ́án,
ba lɩ kʋ durən.
2 Lugu yɩ ba kwɩ ba lɩ tɩa pùrú wa,
yá ba nyɩŋa kapan ba lɩ cɩnɩan kʋ wa.
3 Sɩankʋra pɩn yikunu jɛ́n tɩa də̀ń,
ba yàá gwìń tɩa tə,
ba cú ba ja ka tɩpɩrɩta nə,
ba ma pɩ̀à kapana tə nə səgə
yikunu bìrə̀n wa, tɩan yɩywara wa.
4 Ba kwɩ bʋran tɩa tə də̀ń,
ba ja vəli yiŋʋnɩ də bwálá tə ləzoni nə wulə,
yá ba nɛɛ kʋ́ʋ̀ wàrɩ̀ ba tə saŋa.
Ba yɩ ba gwə ŋoni nə,
ba sìlì woru wa,
ba ga ŋʋ́ná də ləzoni.
5 Wodiu naŋa tɩa tə yuu wa,
yá ka də̀ń nyɩan ndə mən nə dí ka.
6 Ka kapana jə kapan cɩ́nʋ́
cɩcɩlʋ bʋla, də sɩ́án mun.
7 Zənpuu yəri cwəŋə tə nə vəli lá,
yá cii yii də ga wà bwálɩ́ təntə dì.
8 Ganaŋa nəfaran tə nə jə dɩ̀àn
nədʋ mama naa wà lá nɩŋɩ,
gəru tə wà lá twá kʋ kɛ̀ń də mama.
9 Ləzwənə yàá lwa kapataʋ tə,
ʋ gwìń pɛɛn tə ʋ ja tə dəkurən nə.
10 Ʋ yàá tún coŋi pɩ̀ràn tə wa,
yá ʋ yɩ́á na won tə mama nə jə funə.
11 Ʋ yàá sùń tɩa də̀ń nabuliyɩa tə,
yá ʋ ja won tə nə səgə,
ʋ nan poni nə.
*
12 Yá wʋbʋŋa mʋ̀ wa yə̀n nə?
Sə pubʋŋa mʋ̀ sàń wulə yə̀n nə?
13 Ləzwənə yəri ka kwənə,
ba ba ka nɩ ləzwənəŋə lʋʋ wa.
14 Bʋʋ nəfarʋ* tə kʋ də̀ń nə lu
swɩ̀n, kʋ wʋ́: «Ka tə̀lə́ à con!»
Yá mʋʋ tə də swɩ̀n, kʋ wʋ́:
«Ka tə̀lə́ à con!»
15 Ba wàrɩ̀ sɩ́án tə nə ba durən jə,
ba ma lárɩ́ wʋbʋŋa,
ba ma wàrɩ̀ wárʋ́ ba kəri,
ba ma yə̀ ka.
16 Wʋbʋŋa də kapana tə nə jə funə,
wàrɩ̀ duən tə maŋa səkəri yuu wa.
Tə kapana təntə nə swə tə yɩ Ofirə tɩ̀án sɩ́án,
nə à yə̀ə́ kapan cɩ́nʋ́ cɩcɩlʋ bʋrʋnɩa pʋ̀pɔ́,
nə à yə̀ə́ kapan cɩ́nʋ́ cɩcɩlʋ bʋla.
17 Ka funə dwə sɩ́án də buteli zənzən,
yá ka kwənə dwə zʋŋa tə
ba nə fwa də sɩ́án tə nə ba durən jə.
18 Bwanzɩla də zanan mʋ̀ yoo kʋ́ʋ̀ wàrɩ̀ kʋ swɩ̀n.
Wʋbʋŋa jə funə zənzən ka doni bwanzɩla.
19 Ka funə dwə Kuswəa tɩ̀án
kapan cɩ́nʋ́ cɩcɩlʋ səmun tə zənzən,
yá ka də sɩ́án tə nə ba durən jə,
wàrɩ̀ duən tə maŋa səkəri yuu wa.
*
20 Yá yə̀n nə wʋbʋŋa nan mʋ̀ tətə?
Sə pubʋŋa mʋ̀ sàń wulə yə̀n nə?
21 Wʋbʋŋa səgə wonəŋu mama yáá nə,
lanworu zuŋi tə də tətə ba ka na.
22 Tɩan də ciru swɩ̀n tə wʋ́:
«Nə zɩan nì ka yoo də ba swɩ̀n.»
23 Yɩɩ nə yə̀ə́ wʋbʋŋa cwəŋə,
ʋ mʋ̀ cɩcɩ nə yə̀ə́ ka sàń bwálɩ́.
24 Cɩ́gá, ʋ mʋ̀ nə ywàŋá
ʋ na tɩa nii yigurə,
yá ʋ na kʋ tə mama
nə wulə lanworu tə də̀ń nə.
25 Yɩɩ nə bɩrɩ vʋʋ tə dɩ̀àn máŋá,
ʋ ga tún nɩ́á tə dánɩ́ nii máŋá.
26 Ʋ mʋ̀ nə pɩn nii dwà nə,
ʋ ga bɩ̀rɩ̀ cwəŋə ʋ pa
dwà pɩpɩlʋ də dwà bágʋ́ nə.
27 Kʋ máŋá tə wa nə ʋ nɩ wʋbʋŋa,
ʋ ga bɩrɩ ka.
Yá ʋ dàń tún ka dəkuu,
ʋ ga balɩ ka.
28 Yá ʋ dàń swɩ̀n ləzwənə con, ʋ wʋ́:
«Nə̀ń, ka dəri Yuu-Tiu fən nə yɩ wʋbʋŋa!
Yá ka pwɛ̀ tɩ̀àn ka lɩ lwanɩ yɩra, yɩ pubʋnzəŋu!»