Cʋna lìù wàá ʋ boŋə ʋ kəni Yɩɩ nə?
27
1 Zɔbə kʋ́ʋ̀ tún ʋ nii, ʋ wʋ́:2 «Yɩɩ tə nə voŋi nə cɩ́gá cwəŋə wulə!
Ʋ mʋ̀ Yɩɩ tə ʋ nə wulə tə mɛ yuu wa,
ʋ nə pɩn à jə̀rə́ tə sú də pucʋnɩ wulə!
3 À dùə̀ də máŋá tə mama
à mɩɩ nə wá ya lʋʋ wa,
Yɩɩ siŋu tə də ga wulə à mɩbʋran wa,
4 à nii bá swɩ̀n yoo tə nə ba cɩ́gá cwəŋə tì,
yá à nəndəli bá ŋʋŋwɩn kʋ̀nkʋ̀n yoo!
5 Yɩɩ wá cɩ̀ sə à pa aba cɩ́gá!
À wá zɩgɩ à təgətəgə tə yuu wa,
à mɩɩ kori kʋ zwɛ̀!
6 À zɩga à cɩ́gá cwəŋə tə yuu wa,
yá à bá lwàń à nii də mama.
À pubʋŋa wà nə wʋwalɩ
dɩɩn nədʋ tətə, à lʋʋ yanʋ tə wa.
*
7 Yɩɩ wá jələ à dʋŋʋ ndə wʋlʋnyiən nə,
ʋ ga jələ à jarɩdon ndə cʋna lìù nə!
8 Bɛ̀ɛ̀ yala nə ga lìù tə con,
ʋ nə ba Yɩɩ fən dəri,
də Yɩɩ nə pɩn ʋ kɛ́n ʋ tʋ,
ʋ ga jon ʋ mɩɩ tə?
9 Jɩgwarʋ nə yí wá,
ʋ nə bubwi ʋ kə Yɩɩ nə,
Yɩɩ yàá tan ʋ con naaa?
10 Ʋ wá sɛ̀ ʋ pa Yɩɩ tə nə wulə
tə mɛ yuu wa ya ʋ fɩra yoo naaa?
Ʋ wá sɛ̀ ʋ bon ʋ kə Yɩɩ nə máŋá mama naaa?
11 À wá kàrɩ̀ aba Yɩɩ dɩ̀àn nə mɛ nətʋ,
à bá səgə Yɩɩ tə nə wulə tə mɛ
yuu wa pubʋŋɩ tə, á yáá nə.
12 Yá á tətə mama nɩ kʋ nətʋ tə!
Bɛ̀ɛ̀ dàń nə pɩn á ma swɩ̀n sʋvɛɛ?»
Yoo tə nə dànɩ̀ ləzwənlwana
13 Nə̀ń yoo tə Yɩɩ nə tanɩ
ʋ tún ləzwənlwan nə,
tori tə wʋlʋnyiən nə wá na
Yɩɩ tə nə wulə tə mɛ yuu wa con:
14 «Ʋ bɩ̀á nə dáá, kwatara sɩ̀ʋ́ nə wá də́ ba,
yá ʋ nɩ̀án bá na wodiu ba də́ ba sú.
15 Ʋ dwíí tə kwatara sɩ̀ʋ́ də niən nə bá gʋ,
yɩ tɩan yayɩpwarʋ nə wá gùrì ba,
yá ba kadənə bá kwi ba nə.
16 Ʋ nə lwá səbiu ʋ pú duən yuu ndə pùrú nə,
ʋ nə dalɩ gànàn ʋ tún duən yuu ndə daʋ nə,
17 ʋ mʋ̀ yɩ ʋ dalɩ ʋ túŋə́,
yá cɩ́gá tíú nə wá zʋ gànàn təntə,
bɩcapon tíú nə wá də́ səbiu təntə.
*
18 Dìə̀ tə ʋ nə lwə̀ yɩ ndə twá nə lwə̀,
ka yɩ ndə vuun nə,
lìù tə nə cɩ̀ kárá nə, nə ken.
19 Jɩjə tíú yàá pə̀ń də jɩjə,
yá ʋ yàá súrí ʋ yɩ́á,
də won mama wà gɛ.
20 Bɩcapuri yàá yí wá kʋ dɩ̀ ʋ yuu,
ndə nɩ́á nə twi tə dɩ̀ lɩ̀à yuu.
Kuli yàá jàn wá tɩtɩnkwɩʋn nə.
21 Yɩɩ yipɩan con vʋʋa yàá jàn wá,
kʋ ja va yiŋʋnɩ.
Kʋ yàá mùrí wá də dɩ̀àn,
bwálɩ́ tə wa ʋ nə wulə.
22 Ba tɛ wá də cɩan, ba ba ʋ yinəgə dəri,
kʋ pa ʋ kəni dɩ̀àn ʋ dəri sə ʋ jɛ́n tə yáá nə.
23 Ba mà jɩ̀àn ʋ tʋrɩ tə yɩrɩ,
yá ba zɩgɩ bwálɩ́ tə tətə wa,
ʋ yà nə wulə, ba fɩlɩ fɩla ʋ yuu nə.»