Zɔbə bɩrɩ də Bilədadə sáŋʋ́ tə ba yɩra zuri
26
1 Zɔbə le, ʋ wʋ́:2 «N yə̀ə́ nətʋ tə ba saŋa labwanʋ nə tamʋ!
N yə̀ə́ nətʋ tə ba nə joŋə lìù tə
ʋ vànà nə gwàrɩ̀ tamʋ!
3 N yə̀ə́ nətʋ tə ba nə kwè lìù tə
nə ba wʋbʋŋa jə tamʋ!
Nə̀ń n nə bɩrɩ n yənu nə dáá kʋ mɛ nətʋ!
4 Wàà con nə n swɩ̀n n sʋ̀ràn tə?
Wàà nə ken yìə̀n təntə n pubʋŋa wa?»
Yɩɩ nə jə yoo mama dɩ̀àn
5 «Cirə vɩvaga,
nɩ́á də tə wa wiən tə də̀ń.
6 Ciru wà Yɩɩ yáá nə səgə,
bʋʋ nəfarʋ tə kʋ də̀ń nə lu*
yɩ fee ʋ yáá con.
7 Ʋ larɩ jɩzən saparʋ woru wa,
ʋ goli tɩa tə woru wa.
8 Ʋ sun nɩ́á tə ʋ kə ʋ bakwan tə wa,
yá tə dun tə ba pɩn bakwan tə pwin.
9 Ʋ púə́ ʋ padaʋa tə yuu nə,
ʋ larɩ ʋ bakwan tə, ʋ ma pú kʋ nə.
*
10 Ʋ bɩ̀rɩ̀ fìù kəkəlub nɩ́á tə yuu wa,
kʋ va kʋ yí poni də yikunu sɩswɩan.
11 Yɩɩ nə baa lanworu ywəŋə tə nii nə,
fən yàá gən tə, tə ga sisigə.
12 Ʋ ja ʋ dɩ̀àn ʋ ma vuvugu mʋʋ tə,
ʋ ga ja ʋ yənu ʋ ma nyʋnyʋgʋ mʋʋ
wojijiru tə ba nə boŋə Rahavə*.
13 Ʋ mɩɩ vʋʋ zwarɩ lanworu tə,
yá ʋ jɩɩn zwə tɩdən tə kʋ pórí.
14 Də kʋ nətʋ nə yɩ ʋ tʋ̀tʋ̀nán tə
yoo mancɩn nə nə nə̀ń, ndə sʋ́sʋ́ná nə,
wàà nə wá wànɩ́ ʋ nì ʋ dɩ̀àn baŋʋ tə də̀ń?»