Zɔbə 25

Bilədadə bɩrɩ də ləzwənə wà mɛ sə ʋ tʋ́tʋ̀nɩ́ də Yɩɩ

1 Bilədadə, ʋ nə nan Swua, kʋ́ʋ̀ tì sʋgʋ, yá ʋ swɩ̀n ʋ wʋ́:

2 «Yɩɩ pàrɩ̀ tə ba kamandon jə,

ʋ ga jə bɩcapuri zənzən.

Ʋ pɩn sìə́ wulə lanworu wa.

3 Ʋ kwatara púlə́ tə wàá tə gàlɩ̀ naaa?

Wàà yuu wa nə ʋ yɩcaʋ tə ba pɛ́n?

4 Nətə nə ləzwənə wàá cɩ́gá tíú

ʋ yanɩ Yɩɩ yáá con?

Nətə nə lìù tə kan nə lɩrɩ

wá wànɩ́ ʋ cɩ̀ ʋ tɩ̀àn nə,

ʋ dàn ká jì durən lìù?

5 Cànà tə tətə dàń taa nə ba poni jə,

kacɩlacɛɛ tə də ga tà wiən

tə nə ba durən jə ʋ yáá con,

6 mə ləzwənə ʋ nə yɩ ndə kasɩlatanpanɩ nə,

ʋ mʋ̀ lìù tə nə yɩ ndə zʋnzʋgʋ nə!»