Zɔbə bɩrɩ də Yɩɩ nə pɩn wʋlʋnyɩna fwa ba fɩra
24
1 Zɔbə swɩ̀n ʋ súrí lá, ʋ wʋ́:«Bɛ̀ɛ̀ nə pɩn Yɩɩ tə nə wulə tə mɛ
yuu wa wà máŋá lɩ ʋ tún vàn nə?
Bɛ̀ɛ̀ nə pɩn lɩ̀à tə nə yə̀ə́ wá,
ba ʋ bʋra bʋ̀rʋ̀ dɩan təntə na?
2 Wʋlʋnyɩna tə fwarɩ kárɩ́ sɩswɩan,
ba ga vɩrɩ najɩra ba joŋə ba yɩ̀rɩ̀.
3 Ba joŋə bitara bɩ̀nà ba ja vìrí,
ba ga joŋə kadənu naʋ ba túŋə́ talɩma.
4 Ba pɩn lalaŋa yori ba yá cwəŋə,
ba ga kálɩ́ lʋʋ nii tə wa
yinənyɩna tə mama, ba pɩn ba səgə.
5 Yinənyɩna naŋa ba tʋŋa
ba tʋtʋŋɩ tɩbɩlakʋnʋ wa,
ba ma pɩ̀à ba nii wodiu,
ndə gaʋ bɩ̀nɛ̀ nə, kasɔɔ lanworu wa.
Digə cɩcɩ wa nə ba na wodiu,
ba pɩn ba bìsɩ́ná nə.
*
6 Ba mɛ sə ba gan kárɩ́ gaʋ,
ba ga gun wʋlʋnyiən divɛn tɩ̀án lənə.
7 Ba yàá pə̀ń tɩtɩn nə də yatanswələ,
ba ba gànʋ̀ jə sə ba zʋ,
ba ba gansara jə sə ba ma cɩ̀ waran nə.
8 Dwà zuzuru tə nə nɛ̀ pɛɛn tə wa,
yàá mà ba, ba zuri,
yá ba dàń yàá pálɩ́ pɩ̀ràn yɩra,
ba nə ba yuu yikwala bwálɩ́ jə yɩrɩ.
9 Wʋlʋnyɩna yàá pɩ̀rɩ́ bitarʋ ba jon də dɩ̀àn,
ba ga joŋə zʋra wiən ba túŋə́ talɩma,
ba tətə jɩŋa yɩrɩ.
10 Ba vəli yatanswələ,
ba nə ba gànàn jə yɩrɩ,
ba ga zɩŋa mɩgugunə də niən.
11 Ba gà olivə tɩ̀án bɩ̀á nʋŋʋ yuu wa, ba lɩ nʋga,
ba nɩŋɩ divɛn tɩ̀án lənə gwàlʋ́ wa,
yá nanyʋnɩ pɩ̀à kʋ gʋ ba.
*
12 Tɩʋ tə wa, lɩ̀à tə nə pɩ̀à ba tɩ sìrì,
lɩ̀à tə ba nə caŋɩ, bubwi ba pɩ̀à sáŋʋ́,
yá Yɩɩ ba kʋ yolwan təntə jələ!
13 Ba mʋ̀ lɩ̀à təntə vɩga poni,
ba yəri poni coŋi tə,
ba ga vɩ sə ba va poni wa.
14 Yɩcaʋ tàà pɛ́n, də lagʋrʋ zàn,
ʋ yàá gʋ zʋrʋ də yinənyiən,
yá tɩtɩn nə, ʋ yàá yɩ ndə ŋwɩ̀àn nə.
15 Bacwarʋ yii yàá pàlɩ̀ didənbibirə nə.
Ʋ yàá swɩ̀n ʋ waa con, ʋ wʋ́:
“Lìù mama bá na nə!”
Ʋ ga tì gankɩkala, ʋ ma pú ʋ yáá nə.
16 Ŋwɩna yàá kɛ́n dìì tɩtɩn nə,
yá yɩcaʋ wa, ba ba kàrá naŋa,
kʋ pa ba yəri won tə nə yɩ poni.
17 Ba mama con, jɩjʋ yɩ tɩan yɩywara,
yá ba na tɩan yɩywara bɩcapuri kʋ wa.
*
18 Á mʋ̀ bʋŋa də wʋlʋnyiən yɩ nɩ́á nə wá jàn,
ndə won nə kʋ nə ba dù!
Zɩra wulə ʋ tori yuu wa,
yá ʋ bá tì divɛn tɩ̀án kárɩ́ cwəŋə!
19 Ciru yàá pa yolwafwanʋ nyʋn lá,
ndə dwakʋrɩ də tɩlʋŋʋ nə yàá pa
dwà nɩ́á wʋ nətʋ.
20 Pùə́ tə nə lɩrɩ wá yàá swɛ̀ɛ́ ʋ yoo,
zʋnzʋran yàá də́ wá tə fɩra,
yá lìù mama kʋ́ʋ̀ ba ʋ yoo lìí!
Yá lwanɩ dàń kɛ́n kʋ tʋ, ndə tɩ̀ʋ́ nə.
21 Ʋ ken càn kadɩŋʋ nə, ʋ nə wà bìú lɩrɩ,
ʋ ga wà zəni fwa kadənu yɩra.
22 Yá Yɩɩ tə ʋ dɩ̀àn nə jànɩ̀ dɩ̀àn tɩ̀án nə zàn yɩɩ nə,
ba mʋ̀ lɩ̀à təntə kʋ́ʋ̀ wàrɩ̀ mɩɩ yala ba janɩ.
23 Ʋ yà pɩn ba sáŋʋ́, ba nyɩ́n kʋ yuu wa,
yá ʋ yɩ́á ywàŋá ba coŋi yuu nə.
24 Ba nɩ dun máŋá mancɩn wa,
yá ba nyʋan lá.
Ba tʋa, ba yí ba yígúrə́ ndə ləzoni mama nə.
Ba kɛ́n ba tʋ ba pɩ̀nɩ̀,
ndə mɩyun nə, ba nə goŋi
ba pú duən yuu.
25 Kʋ nə tà nətʋ,
wàà nə wàá ʋ bɩrɩ də à yɩ kʋ̀nkʋ̀nʋ?
Wàà nə wàá ʋ bɩrɩ də à sʋ̀ràn tə ba də̀ń jə?»