Zɔbə bɩrɩ də Yɩɩ ba tʋ́tʋ̀ná pɩ̀à
23
1 Zɔbə le, ʋ wʋ́:2 «Də zə̀n mama, à yɩ à ŋʋŋwɩn
à zɩga Yɩɩ nə,
yá à ja à jɩɩn à kàŋà à nii nə,
sə à kori dàn ká nan.
3 À yà nə yə̀ə́ bwálɩ́ tə à nə wá na wá,
à yà nə wàá bwálɩ́ tə ʋ nə wulə tə à yí,
4 à yà wá pɩ̀à sʋ̀ràn à sú à nii,
à ja va à tún à nii ʋ yáá con.
5 À wá yəni sʋ̀ràn tə,
ʋ nə wá ma le nə,
yá à wá nì yoo tə də̀ń,
ʋ nə wá swɩ̀n à con!
6 Ʋ wá kə ʋ kajaŋa mama,
ʋ swɩ̀n ʋ zɩgɩ à nə naaa?
Ɔn ɔn, à bʋŋa də ʋ wá zuri ʋ yɩra,
ʋ cʋgʋ à con!
7 Ʋ wá lwarɩ də lìù tə nə swɩ̀n də wá, yɩ mənəmənə,
yá à wá jon à tɩ̀àn lìù tə jɩɩn wa,
ʋ nə bʋ̀rɩ̀ à bʋra, máŋá mama wuuu.
*
8 Yá à nə vəli yɩɩ yipɩan con, ʋ tə̀lə́ lá,
à wà wá mɩ̀àn à na yɩɩ yizwɩa con.
9 Ʋ yɩ ʋ tʋŋa jɩzən saparʋ con naaa?
À ba wá lá na!
Ʋ yɩ ʋ səgə jɩgwiə saparʋ con naaa?
À ba wá na lá də!
10 Yá ʋ yə̀ə́ cwəŋə tə wa à nə wulə.
Ʋ nə dídə́n nə ʋ wá na də,
à wá nan ndə sɩ́án nə,
tə nə ba durən jə.
11 À vəli ʋ nabwɩɩ wa,
à twá ʋ cwəŋə tə,
à wà ywəri à yá ka.
12 À wà yìə̀n tə lwàń,
ʋ nə pɩn nii tə yuu wa.
À sɛ̀ à dɩ à tɩ̀àn tɩa,
à twá ʋ nii sʋ̀ràn tə nə.
*
13 Yá ʋ mʋ̀ pubʋŋa yɩ nədʋ!
Ʋ nə kúrí ʋ tì sə ʋ tʋn yoo,
wàà nə wàá ʋ pɩn ʋ lwànɩ́?
Kʋ tə ʋ tətə nə swə nə ʋ tʋŋa!
14 Ʋ wá tʋn yoo tə
ʋ nə pɩn nii kʋ yuu wa à yɩrɩ,
ʋ pa kʋ nii sú,
yá ʋ tə wá tanɩ tə duən à yɩrɩ, ʋ súrí lá.
15 Kʋ mʋ̀ nə pɩn fən gən nə, ʋ yáá con,
yá à nə bʋ́n kʋ yoo,
ʋ fən yàá kwɛn tə jə nə.
16 Yɩɩ pùrì à bɩcan,
Yɩɩ tə nə wulə tə mɛ yuu wa
pɩn fən gən nə.
17 Ʋ pɩn yikunu pú à yuu nə,
yá kʋ dàń nə tà kʋ mʋ̀ nə wá pa à kə sííí.»