Elifazə bɩrɩ də Zɔbə tʋn cʋna
22
1 Elifazə, ʋ nə nan Tema tì sʋgʋ, yá ʋ swɩ̀n ʋ wʋ́:2 «Ləzwənə jə nywarɩ ʋ pa Yɩɩ nə naaa?
Lìù nə yɩ wʋbʋnyiən,
ʋ tətə nə wá də́ kʋ nywarɩ!
3 N nə yɩ cɩ́gá tíú, kʋ yɩ Yɩɩ tə
nə wulə tə mɛ yuu wa yáá naaa?
N nə yɩ təgətəgə n tʋtʋnɛɛ wa,
bɛ̀ɛ̀ nywarɩ nə ʋ na kʋ wa?
4 Kʋ yɩ n nə dəri Yɩɩ fən tə yɩrɩ nə,
ʋ pɛ́ mʋ́ ʋ kəni cwəŋə wa,
ʋ ga bʋ̀rɩ̀ n bʋra naaa?
5 Lwanɩ kapʋpʋ tə̀lə́ n yuu wa naaa?
N yolwana tə dánɩ́ máŋá wàá kʋ maŋa naaa?
*
6 N yà joŋə n nubɩa wiən n túŋə́ talɩma tʋtʋ,
n ga joŋə ba gànàn n ga yá ba swə̀lə́.
7 N yà ba nɩ́á lìù tə nə pɩn,
nanyʋnɩ nə jə wá,
n ga voŋi wodiu lìù tə nə,
niən nə jə wá.
8 Lʋʋ nii tə yà yɩ dɩ̀àn tɩ̀án nə tɩ,
yá dun tɩ̀án yà nə jəni kʋ wa.
9 N yá n pɩn kadənə pìrí
ba vìrí də jɩkʋrɩkɛ,
yá n kɛ́n bitara jɩ̀àn.
10 Kʋ mʋ̀ nə pɩn nyala kɩkarɩ mʋ́,
fən ga gən mʋ́ naa nədʋ.
11 Nə à yə̀ə́ yikunu tə pɩn n kʋ́ʋ̀ ba na,
yá nɩ́á kapʋpʋ dàń púə́ n yuu nə.
*
12 Yɩɩ tə̀lə́ lanworu tə wa, ʋ sàń tə wa naaa?
Ywàń kacɩlacɛɛ tə lanworu tə wa,
tə nə wulə baan baan nətʋ!
13 Yá n swɩ̀n n wʋ́: “Bɛ̀ɛ̀ nə Yɩɩ yə̀ə́?
Ʋ wàá yikunu bìrə̀n tə wa
ʋ twá ʋ bʋ̀rɩ̀ bʋra naaa?
14 Ʋ nə jírí lanworu tə wa,
bakwan tə yàá cɩ̀ ʋ yáá nə,
ʋ ba won mama na.”
15 Kʋ yɩ n bʋŋa sə n mɛn cwədwan tə yuu wa,
ka mʋ̀ cwəŋə tə yolwafwana nə tì naaa?
16 Ba kɛ́n ba tʋ
də ba tɩan máŋá wà yí,
yá ba dəkuu bwálɩ́ tə jìgə̀ ndə nɩ́á nə cori kʋ.
*
17 Ba yà swɩ̀n Yɩɩ con, ba wʋ́:
“Nan kwa, n ga yá nəba!
Bɛ̀ɛ̀ nə Yɩɩ tə nə wulə tə mɛ yuu wa
wàá nəba ʋ fwa?”
18 Ʋ mʋ̀ yà ga nə pɩn ba dìì sú də jɩjə wiən.
Yá Yɩɩ wá cɩ̀ sə à mʋ̀ jon wʋlʋnyɩna kwìə̀!
19 Cɩ́gá tɩ̀án wá na wʋlʋnyɩna tʋrɩ, yá ba wá jwɛ,
lìù tə nə wà yoo cʋ̀gʋ̀ də ga wá mʋn ba.
Ba wá swɩ̀n, ba wʋ́:
20 “Lɩ̀à tə yà nə zàn ba zɩga nə nə
wà lá nywɩn naaa?
Mən wà ba wiən tə nə jə nywarɩ
tə pa ba dí naaa?”
*
21 Zɔbə, à lòrì mʋ́ sə n pa
n də Yɩɩ kə duən yuu,
yá n wá na bɩcan sìə́.
N nə tʋn kʋ,
n kʋ́ʋ̀ wá pìí n də́ nywánɩ́.
22 À lòrì mʋ́ sə n sɛ̀ ʋ nii kàrà,
n ga kə ʋ sʋ̀ràn tə n bɩcan wa.
23 N nə pìí n bà Yɩɩ tə con,
ʋ nə wulə tə mɛ yuu wa,
n wá pìí n nì ywánɩ́,
yá n wá pa yìə̀n tə nə ba
cɩ́gá cwəŋə tì ya ŋʋ́nɩ́ də n sàń.
24 Dɩlɩ sɩ́án dàlá tə n dʋgʋ pùrú wa,
dɩlɩ Ofirə tɩ̀án sɩ́án tə nacoru kapana wa,
25 yá Yɩɩ tə nə wulə tə mɛ yuu wa
dàń wá ya n sɩ́án dàlá, də n wárʋ́ kikələ.
*
26 N dàń wá pa Yɩɩ tə nə wulə
tə mɛ yuu wa ja fɩra ʋ pa mʋ́,
n ga wá wànɩ́ n zɩ̀n n yáá n te ʋ con.
27 Yá n nə lòrì wá pwəpwə,
ʋ wá cʋgʋ n kori,
yá n wá wànɩ́ n tʋn n nikana tə,
n pa tə nii sú.
28 Yá n nə kúrí n tì sə n tʋn yoo,
n wá wànɩ́ n tʋn kʋ n pa kʋ nii sú,
yá poni wá ya n coŋi yuu wa.
29 Yá lɩ̀à duən nə cúə́ ba tɩ̀àn tɩa,
n wá swɩ̀n, n wʋ́: “Zaŋa yɩɩ nə!”
Cɩ́gá, Yɩɩ yàá jon lɩ̀à tə nə ziri ba yuu tɩa.
30 Ʋ yàá jon lìù tə də tətə, ʋ nə cʋ̀gʋ̀ yoo.
Cɩ́gá, n jɩn Yɩɩ nadwan nə lìù təntə yɩrɩ,
də n jɩ̀àn tə nə ba durən jə.»