Zɔbə bɩrɩ də wʋlʋnyɩna yà wà mɛ sə ba də́ ywánɩ́
21
1 Zɔbə le, ʋ wʋ́:2 «Á cʋga, à lòrì aba sə á cʋgʋ à sʋgʋ tə,
mə kʋ mʋ̀ cɩcɩ nə, á wá ma kòrì nə.
3 Á pɩan nə cwəŋə sə à swɩ̀n, yá kʋ kwa nə,
n mʋ̀ Sofarə dàń wàá nə n ma də́ bɩyɩrɩ.
4 Kʋ yɩ ləzwənə nə nə, à ŋʋŋwɩn à zɩga naaa?
Kʋ mʋ̀ yɩrɩ, à ba cɩ́gá jə sə à lɩŋa zàn naaa?
5 Á vivirə á yáá á kə à con,
kʋ wá gwárɩ́ aba, á ga ja á nii nə.
6 À tətə nə bʋ́n kʋ yoo,
fən yàá gən nə, à yɩra ga didigi.
*
7 Bɛ̀ɛ̀ nə pɩn wʋlʋnyɩna mɩɩ wulə lʋʋ wa?
Bɛ̀ɛ̀ nə pɩn ba kwɩn, yá ba dɩ̀àn pìí tə súrí?
8 Ba də ba dwíí dəkuu zwɩ tɩa ba yáá con,
yá ba nɩ̀án bori ba yɩ́á yuu.
9 Ba mʋ̀ jə bɩcan sìə́,
yoo mama fən ba ba jə.
Yɩɩ dàʋ̀ tə ba ba mʋ̀ mà.
10 Ba nabɩran ba dɩ̀, də tə wà pùə́ ken,
ba nakana lɩrɩ, tə ba càrɩ̀.
11 Ba yá ba pɩn ba bisɩmabarɩbii
fwa ba fɩra, ndə vanmɩnɩ nə,
ba bɩ̀á ga làrɩ̀.
12 Ba nuŋə, də ba dwí mənkwərə də bànʋ́,
ba ga wúrí wii, ba ma fwa pupwən.
13 Ba mɩɩ zwɛ̀ ywánɩ́ wa,
yá ba yàá va ciru,
ndə yii nə púə́ kʋ ga súrí nə.
*
14 Yá ba swɩ̀n Yɩɩ con, ba wʋ́:
“Nan kwa, n ga yá nəba,
nə ba pɩ̀à sə nə lwarɩ n coŋi tə!
15 Yɩɩ tə nə wulə tə mɛ yuu wa nə yɩ wàà,
nə ma tʋŋa nə pɩn wá?
Nə ka ja ʋ nadwan nə nywarɩ
nə yɩ bɛ̀ɛ̀ kʋ pa nəba?”
16 Cɩ́gá, ba ba ba ywánɩ́ tə dɩ̀àn jə.
Yɩɩ wá cɩ̀ sə à twá à tʋn wʋlʋnyɩna pubʋŋa yìə̀n tə!
17 Wʋlʋnyɩna də cànʋ́ yàá də̀ŋə̀ naaa?
Cʋcʋran yàá tʋ ba də yuu wa naaa?
Yɩɩ lɩŋa tə yàá pwàrɩ́ ba də naaa?
18 Ba yàá yɩ ndə ywərən nə, vʋʋ nə jànɩ̀,
nə à yə̀ə́ ndə wopulə nə kuli nə tì naaa?
*
19 Kʋ yɩ wʋlʋnyiən bɩ̀á yɩrɩ nə,
Yɩɩ tanɩ càn ʋ tún naaa?
Kʋ yɩ ʋ tətə nə Yɩɩ yà mɛ sə ʋ kə càn wa,
sə kʋ pa ʋ yəni yoo də̀ń!
20 Ʋ yɩ́á yà mɛ sə tə na ʋ tətə yinəgə.
Ʋ mʋ̀ yà nə mɛ sə ʋ nyʋn Yɩɩ tə
nə wulə tə mɛ yuu wa lɩŋa tə.
21 Cɩ́gá, ʋ yáá kʋ́ʋ̀ wa yə̀n də yoo tə
nə wá yí ʋ dìə̀ lɩ̀à ʋ tɩan kwa nə,
máŋá tə wa ʋ mɩɩ tə cànɩ̀ nii nə wá cé?
22 Ba bɩrɩ yənu Yɩɩ nə naaa,
ʋ mʋ̀ Yɩɩ tə nə bʋ̀rɩ̀ malɩkɛ bʋra?
*
23 Lìù don yàá tɩ də ʋ yɩra tə zurə,
yá won mama yoo ba wá wʋwalɩ.
24 Ʋ yàá nu, ʋ tún səpunkwələ,
ʋ kurən ga sú də nʋga.
25 Yá lìù don də yàá də́ yinəgə,
ʋ kori ʋ tɩ, də ʋ wà ywánɩ́ dí.
26 Ba mama yàá pə̀ń pùrú wa,
yá zʋnzʋran yàá pú ba yuu nə.
27 À yə̀ə́ á pubʋŋa tə zəni,
də yìə̀n tə á nə jə á bɩcanɩ wa, á ja zɩga à nə.
28 Á swɩ̀n, á wʋ́: “Dun tíú tə dìə̀ wa yə̀n nə?
Gansili tə wʋlʋnyɩna yà nə wulə lá wa yə̀n nə?”
*
29 Á wà cwəvələ bwe naaa?
Á wà cɩ́gá pɩn ba nii sʋgʋ tə nə naaa?
30 Cʋcʋran dɩɩn nə, yoo ba wʋlʋnyiən yí,
lɩŋa fwiu dɩɩn nə, ʋ yàá na yuu yikwala bwálɩ́.
31 Wàà nə kwàá ʋ nii nə ʋ caga,
ʋ tʋtʋnɛɛ tə yɩrɩ, ʋ yɩ́á wa?
Wàà nə wàá yolwan tə ʋ nə tʋn jɩŋɩ
ʋ ŋwɩ́n ʋ yɩra?
32 Ʋ nə tɩga, ba yàá ja wá ba va
ba gùrì, ba ga cɩ̀ ʋ libəri nə.
33 Libəri tɩran tə ywán tə pa wá.
Lɩ̀à zənzən nan ba pú ʋ tɩgɩ tə kwa,
lɩ̀à kapʋpʋ duən də ga wulə ʋ yáá.
*
34 Kʋ twá nətə, á mʋ̀ à dabara tə
ma kòrì nə kòrù, kʋ nə ba yɩra zuri?
Cɩ́gá tə̀lə́ á liu tə wa!»