Sofarə bɩrɩ də wʋlʋnyɩna dɩ̀àn diŋə ba dánɩ́
20
1 Sofarə, ʋ nə nan Naama tì sʋgʋ, yá ʋ swɩ̀n ʋ wʋ́:2 «Twara wulə à pubʋŋa wa, tə yigə nə,
sə à le, yá à kʋ́ʋ̀ wàrɩ̀ à tɩ̀àn à janɩ.
3 À nə̀ń sʋ̀ràn, ba nə swɩ̀n ba ma twɩn nə,
yá à pubʋŋa wá bɩrɩ nətʋ tə, à nə wá le.
4 N yəri də kʋ nə zɩgɩ máŋá tə mama,
Yɩɩ nə fwa ləzwənə ʋ kə tɩa yuu wa,
5 wʋlʋnyɩna dɩ̀àn diŋə dánɩ́ ba yáá yí,
yá lìù tə nə ba Yɩɩ fən dəri pupwən ba dánɩ́ naaa?
*
6 Ləzwənlwan danɩ nə swə kʋ dɩ̀ kʋ yí lanworu wa,
yá ʋ yuu dwen bakwan nə də,
7 ʋ tə wá nyʋn lá mɩ́ámɩ́án, ndə ywərən nə,
yá lɩ̀à tə yà nə na wá, wá bwe ba wʋ́:
“Ʋ wa yə̀n nə?”
8 Ʋ wá nyʋn lá, ndə pandwɩa nə,
yá ba kʋ bá na wá.
Ʋ wá jɛ́n, ndə tɩtɩn nɩʋn nə.
9 Yii tə yà nə ywàŋá wá,
kʋ́ʋ̀ bá ywàń wá,
bwálɩ́ tə, ʋ yà nə wulə kʋ wa,
kʋ́ʋ̀ bá na wá.
10 Ʋ bɩ̀á wá lòrì
sə lalaŋa fwa pubwanʋ ba yɩra,
yá ʋ wá ŋwɩ́n jɩjə wiən tə ʋ nə vɩrɩ,
ʋ pa tə tɩ̀án nə.
11 Ʋ yɩra yà zurə, ndə ləzwəndʋn nə,
yá yazurə təntə wá twá ʋ nə, tə zʋ pùrú wa.
*
12 Yolwan nə ywán ʋ nii wa,
ʋ nə səgə kʋ ʋ nəndəli də̀ń,
13 ʋ nə cɩ̀gà kʋ ʋ tún, ʋ vɩ sə ʋ dʋgʋ kʋ,
ʋ nə cɩ̀gà kʋ ʋ kə ʋ nipaa wa,
14 ʋ wodiu tə wá lwən ʋ lʋran wa,
kʋ wá jì dəkwaa cwan ʋ pùə́ wa.
15 Ʋ liri jɩjə wiən, yá ʋ wá tʋnɩ tə,
Yɩɩ wá kòrí tə ʋ pùə́ wa.
16 Ʋ mwi dəkwaa cwan,
yá kapaa wá za wá ka gʋ.
*
17 Ʋ kʋ́ʋ̀ bá na nacoŋi tə, də mʋnɛɛ tə,
də nacorən tə nə súə́ də tʋ̀ràn, də nayɩla dɩndarʋ!
18 Ʋ wá kwɩ̀án wiən tə ʋ nə nɩ tə, ʋ pa,
ʋ kʋ́ʋ̀ bá də́ tə.
Ʋ kʋ́ʋ̀ ba də́ ʋ yolu nywarɩ.
19 Cɩ́gá, ʋ tʋn dɩ̀àn labwana yɩra,
ʋ ga vɩ ba ʋ dʋgʋ.
Ʋ vɩrɩ dìì, ʋ yà nə mɛ sə ʋ lwà.
20 Ʋ wʋkoru tə pɩn ʋ ba sìə́ jə,
ʋ yii nə zʋa lìù won,
kʋ ba ʋ yáá nə jɛ́n.
21 Won mama yà ba ʋ pəŋi tə yáá nə jɛ́n,
kʋ mʋ̀ nə pɩn, ʋ bá də́ ywánɩ́ ʋ dán.
*
22 Jɩgwarʋ wá yí wá,
máŋá tə wa wiən nə bʋ́rɩ́ wá,
yá càn dàń wá kə lɛɛ ʋ nə.
23 Máŋá tə ʋ nə wá pùrì ʋ swí ʋ pùə́,
Yɩɩ wá pa ʋ lɩŋa pupwin ʋ yuu wa,
yá tə wá nà ʋ yatana wa, ndə dwà nə.
24 Ʋ nə dəri sə ʋ jɛ́n lugu kwatarɩ zɩla yáá nə,
cɩnɩan cɩɩn nə wá ta wá kʋ cʋ̀rɩ̀.
25 Ʋ nə van cɩɩn tə ʋ cʋ̀rɩ̀,
ʋ nə lɩ cɩɩn lugu tə nə pɩpɩlɩ, ʋ cɩɩn tə wa,
tɩan fən nə wá zʋ wá.
*
26 Yikunu tə mama səgə tə dànɩ̀ wá.
Mən, lìù mama nə wà sʋ̀rɩ́, wá də́ wá,
tə wá də́ won tə mama nə wá ga ʋ gansili wa.
27 Lanworu wá nyɩn ʋ yolwan tə,
yá tɩa wá zàn ka zɩgɩ ʋ nə.
28 Ʋ dìə̀ jɩjə wiən mama wá nyʋn lá,
Yɩɩ lɩŋa tə wá cori tə, ndə navoo nə.
29 Mə ŋwɩ́rán nə, Yɩɩ nə tún wʋlʋnyiən nə,
mə tori nə, Yɩɩ nə kàn nii sə ʋ pa wá!»