Zɔbə bɩrɩ də ʋ jɩrɩmʋ lìù tə wá san wá
19
1 Zɔbə le, ʋ wʋ́:2 «Á wá cʋ̀gʋ̀ à pùə́ nə də á sʋ̀ràn tə,
á pa kʋ yɩ̀ nə, kʋ dán kʋ mɛ nətə?
3 Á twɩn nə, kʋ yí nɛɛ fugə.
Cavɩra ba aba jə, sə á fɩfɩn nə?
4 Də à cɩ́gá nə ga də,
à gɩʋ tə yɩ à mʋ̀ cɩcɩ nə kʋ ywàŋá.
5 Cɩ́gá mama, kʋ nə yɩ á muŋə nə,
sə á ma pa dun á tɩ̀àn nə,
yá á caga à nii nə, à cavɩra tə yɩrɩ,
6 á yənə də kʋ yɩ Yɩɩ nə fɩfɩn nə,
ʋ mʋ̀ nə pipini nə də ʋ gəgəlu.
*
7 À nə bubwi, à swɩ̀n də
ba tʋŋa dɩ̀àn à yɩra,
lìù mama ba à con taŋa!
À nə bubwi à pɩ̀à sáŋʋ́,
lìù mama ba bʋ̀rɩ̀ ʋ pɩn nə!
8 Yɩɩ cɩ̀gà à yáá nə, à wàrɩ̀ à kɛ̀ń,
ʋ ken yikunu à coŋi yuu wa.
9 Ʋ jon à dun ʋ yá nə,
ʋ súrí à payupuu à yuu nə.
10 Ʋ pʋpʋgʋ à mama, kʋ pa à sori à twɩ.
Ʋ van à yala tə ʋ mùrí, ndə tɩ̀ʋ́ nə.
11 Ʋ lɩŋa zàn à yuu wa,
yá ʋ dàń jələ nə, ndə ʋ jarɩdon nə.
12 Ʋ kwatara tə twá duən ba bɩ̀àn,
ba tún cwəŋə ba ja bɩ̀àn à nə.
Ba ken ba dəkuu bwálɩ́,
ba ja kɩkarɩ à gansili.
*
13 Yɩɩ pɩn à də à nubɩa ŋʋ́ná də duən,
yá à jìgə̀ vee à pa lɩ̀à tə nə,
ba yà nə yə̀ə́ nə.
14 À dwíí tɩ̀án vɩga nə ba dʋgʋ,
yá à ləyənə swɛ̀ɛ́ à yoo.
15 À dìə̀ vərə, də à tʋtʋnbwɩɩ də tətə
jələ nə, ndə vee nə,
à jìgə̀ lìù ba nə yəri.
16 À nə bon à tʋtʋnbiu, ʋ ba nə le,
yá kʋ yɩ à yàá lòrì wá pwəpwə.
17 À kan na də à nii lwá,
yá à tətə nuu pùə́ bɩ̀á tə zʋ̀nɩ̀ nə.
18 Bisɩmajɩmurinywɩ də tətə culi nə:
À nə zàn yɩɩ nə, ba yàá cəgi nə.
19 À fààn lɩ̀à tətə zʋnɩ nə,
yá lɩ̀à tə à yà nə swə,
pìí ba zɩga à nə.
20 À yatana tə kʋa ka marɩ à kurən yɩra,
yá mancɩn nə ga də à gwɩ̀n à mɩɩ.
*
21 Á dərə à yinəgə, á dərə à yinəgə,
á mʋ̀ à dabara tə!
Cɩ́gá, Yɩɩ jɩɩn nə mà nə!
22 Bɛ̀ɛ̀ nə pɩn á də ma kəni càn à nə, ndə Yɩɩ nə?
Á wà nə fɩfɩn á sú naaa?
23 Aaa! À yà swə də à sʋ̀ràn tə yà nə wàá tə pʋ́pʋ́nɩ́,
tə yà nə wàá tə bɩ̀rɩ̀ tə túŋə́ sagɩ wa!
24 À yà wá pa ba ja lugu mɩ̀ʋ́n də kwamɔɔ,
ba ma bɩ̀rɩ̀ tə, ba tún pɩ̀ʋ̀ yuu wa,
sə tə ya lá máŋá mama wuuu!
*
25 À mʋ̀ yə̀ə́ zəni, də à jonu tə wulə,
yá ʋ mʋ̀ nə wá ya talɩkwa lìù,
ʋ zàn ʋ zɩgɩ tɩa yuu wa.
26 Yá à yatana tə nə wá cʋ̀gʋ̀ kwa nə,
à wá zɩgɩ à yatanaŋʋ tə wa, à na Yɩɩ.
27 À mʋ̀ tətə yii wá dì wá,
ʋ mʋ̀ nə à wá na, kʋ tà lìù don.
À pɩ́nɩ́, à ma dànɩ̀ kʋ máŋá təntə, də à waa mama.
28 Á bwe á tɩ̀àn sə á jə́n:
“Bɛ̀ɛ̀ yɩrɩ nə, nə wá kə càn ʋ nə?”
Yá á pɩ̀à sə á na yolwan tə dəkuu,
kʋ nə pɩn à də́ càn.
29 Á cɩa á tɩ̀àn nə, kwatara sɩ̀ʋ́ yɩrɩ:
Cɩ́gá, fɩfɩʋn yɩ yolwan,
ba nə kwɛn də kwatara sɩ̀ʋ́.
Yá á dàń wá lwarɩ də, Yɩɩ bʋ̀rɩ̀ bʋra,
ʋ pɩn ka twá cɩ́gá cwəŋə nə.»