Bilədadə bɩrɩ də nyalɩ wulə, kʋ nə janɩ wʋlʋnyiən
18
1 Bilədadə, ʋ nə nan Swua tì sʋgʋ, yá ʋ swɩ̀n ʋ wʋ́:2 «Máŋá kwà wa nə, á wá yá sʋyirə təntə swɩʋn nə?
Á dí yáá á pɩ̀à pubʋŋa á pa á tɩ̀àn nə,
yá kʋ kwa nə, nə dàń wá ve də duən.
3 Bɛ̀ɛ̀ nə pɩn ba ma jələ nəba ndə vàná nə?
Bɛ̀ɛ̀ nə pɩn nə ma yɩ ndə ləyirən nə, á yáá con?
4 N mʋ̀ lìù tə, n lɩŋa tə nə pɩn n yɩra wiri,
n bʋŋa də tɩa tə wá taa n yɩrɩ,
ka jì kasɔɔ lanworu,
nə à yə̀ə́ sə pɩ̀ràn taa n yɩrɩ,
tə fàrɩ́ tə yá tə yipaa bwálɩ́ naaa?
*
5 Kʋ yɩ cɩ́gá, wʋlʋnyiən poni wá də̀ŋə̀,
yá ʋ mənvoo tə kʋ́ʋ̀ bá pɩ̀rɩ̀ bwálɩ́.
6 Poni wá jɛ́n ʋ gansili də̀ń nə,
yá ʋ cànʋ́ tə wá də̀ŋə̀ ʋ yuu con.
7 Ʋ dɩ̀àn nagalan tə wá jì pɩpɩan,
yá ʋ tətə pubʋŋa yìə̀n nə wá pa ʋ tʋ.
8 Cɩ́gá, ʋ nɛɛ ja wá tə va tə dɩ gəgəlu wa,
yá ʋ dàń wulə kʋ titəŋi wa ʋ vəli.
9 Nyalɩ jɩn ʋ nakuri nə,
yá ŋoni tʋ̀rɩ́ wá.
10 Ʋ ŋwənə səgə tɩa tə wa, ka dànɩ̀ wá,
vɩnvan tə nə wá ja wá wulə ʋ cwəŋə yuu.
11 Bɩcapuri wulə ʋ kwa kʋ dɩŋɩ tɩa mama,
kʋ pa fən gən wá.
*
12 Niən pɩn ʋ dɩ̀àn tə zwɛ̀,
yá lɛɛ dàń nə wá ya ʋ nii wodiu.
13 Ʋ yatana tə mama dí,
tɩan təntən bìú tə dí ʋ nandaran tə mama.
14 Ba lɩ wá ʋ gansili tə wa,
ʋ yà nə wulə də yazurə,
ba ja va ba pa bɩcapuri pɩ̀ʋ́ nə.
15 Lìù don wàá ʋ gansili tə wa ʋ yanɩ,
kʋ kʋ́ʋ̀ tà ʋ mʋ̀ nyiən.
Ba wá lwá jiribu ʋ sàń tə wa.
16 Tɩa con, ʋ ŋʋnan kwɩ,
yá yuu con, ʋ naywalan pɩ̀nɩ̀.
*
17 Ba wá swɛ̀ɛ́ ʋ yoo tɩa yuu wa,
yá ʋ kʋ́ʋ̀ bá ja yɩrɩ ba bon kàrá wa.
18 Ba yigu wá ba lɩ poni wa,
ba kə yikunu wa.
Ba dɩŋɩ wá ba lɩ lʋʋ ləzoni wa.
19 Ʋ ba bìú jə,
ʋ ma ba dwíí də jə ʋ lʋʋ lɩ̀à tə wa,
yá lìù mama bá tɩ ʋ ga bwálɩ́ tə wa,
ʋ yà nə twá ʋ wulə.
20 Cʋcʋran tə nə wá yí wá,
wá kələ yɩɩ yizʋa con lɩ̀à,
tə ga gən yɩɩ yipɩan con lɩ̀à də fən.
21 Mə lìù tə nə tà cɩ́gá tíú sànɩ́ wá jì nətʋ,
lìù tə nə yəri Yɩɩ bwálɩ́ wá ya nətʋ!»