Pɩ̀ʋ́ tə də Yɩɩ joŋwana tə yoo
110
1 Davidə gwaran.
Ba-Yígúrə́-Jə-Tiu nii sʋgʋ nə,
ʋ nə swɩ̀n à Yuu-Tiu con:
«Bà jə̀ń à jɩzən vàna nə,
sə à kə n dʋŋa n nɛɛ də̀ń,
à pa n nɩŋa ba.»
2 Ba-Yígúrə́-Jə-Tiu wá zɩgɩ Siyon* tɩʋ tə wa,
ʋ pa n padaʋ tə dɩ̀àn súrí:
N mʋ̀ dàń də́ pàrɩ̀ n dʋŋa titəŋi wa!
3 N lalʋʋ tə wá sɛ̀ ba ya n kwa, dɩɩn tə nə,
n nə wá kə n kwatara tə duən yáá.
N balandʋra tə wá bà n con,
Yɩɩ pɛɛn tə yuu wa, ndə tɩbɩlakʋnʋ nyʋ̀nʋ̀ nə!
4 Ba-Yígúrə́-Jə-Tiu dùə̀ ʋ ma swɩ̀n kʋ,
yá ʋ bá pìí ʋ kwàń ʋ nii tə.
«N yɩ Yɩɩ joŋwanʋ máŋá mama wuuu, ndə Mɛləkisedɛkə nəb.»
5 Yuu-Tiu wulə n jɩzən vàn nə:
Ʋ wá tɩtaga pɛ̀gá, lɩŋa tə zaŋʋ dɩɩn nə.
6 Ʋ wá bʋ̀rɩ̀ dwíə́ nəkaran* tə bʋra, ʋ zɩgɩ ba nə.
Ʋ wá tɩtaga yun tɩ̀án, tɩa yuu bwálɩ́ mama nə,
yá tɩga wá sú tɩa.
7 Cwəŋə wa, pɩ̀ʋ́ tə wá nyʋn nɩ́á nacwəŋə wa,
yá kʋ kwa nə, ʋ dàń wá zɩ̀n ʋ yuu yɩɩ nə.