Lìù tə ba nə kʋ̀nɩ̀ ba kə ʋ nii nə yɩjʋnɩ
109
1 Gwàgá yáá tíú gwaran. Davidə gwaran.
Ooo à tíú Yɩɩ, n mʋ̀ Yɩɩ tə à nə bwɩ n nə,
dàn ká pú n nii!
2 Cɩ́gá, lɩ̀à swɩ̀n wʋlʋŋʋ sʋ̀ràn,
də gɩgɩra sʋ̀ràn ba zɩga à nə.
Ba kʋ̀nɩ̀ kʋkʋn ba kə à nii nə.
3 Ba swɩ̀n sʋlwana ba zɩga à nə,
tɩa mama, ba ga tɛ nə tʋtʋ.
4 À mʋ̀ pɩ̀à ba dabarɩ,
ba mʋ̀ ga tarɩ yìə̀n ba pɩn nə,
yá à mʋ̀ wulə à jʋnɩ Yɩɩ.
5 Ba ja lwanɩ ba ma ŋwɩ́n à zəni tə,
ba ga ja dʋŋɩ ba ma ŋwɩ́n à sonu tə.
6 Ba swɩ̀n à yoo, ba wʋ́:
«Á lɩa wʋlʋnyiən sə ʋ zɩgɩ ʋ nə,
lìù ʋ nə wá swɩ̀n ʋ zɩgɩ ʋ nə,
sə ʋ zɩgɩ ʋ jɩzən vàn nə.
7 Máŋá tə ba nə wá bʋ̀rɩ̀ ʋ bʋra,
sə bʋra ja wá,
sə ʋ yɩjʋnɩ jì cʋna,
8 sə ʋ mɩɩ dàn ká ya danɩ lʋʋ wa,
sə lìù don jon ʋ yuu nə,
9 sə ʋ bɩ̀á ya bitara,
sə ʋ kan jì kadənu,
10 sə ʋ bɩ̀á ya ləzwənywanan,
ba lòrì wiən bwálɩ́ nə,
kʋ nə ŋʋ́ná də ba dibwərən tə,
11 sə jɩŋɩ tíú jon ʋ jɩjə mama,
sə vərə vɩrɩ kʋ tə ʋ nə tʋn ʋ na,
12 sə lìù mama dàn ká tʋn wʋywaŋʋ* ʋ yɩra,
sə lìù mama dàn ká dəri ʋ bitara tə yinəgə,
13 sə ʋ dwíí tɩ kʋ kwa,
ba kʋ́ʋ̀ dàn ká bon ba yɩrɩ,
máŋá tə wa, ka nə bɩ̀àn,
14 sə Ba-Yígúrə́-Jə-Tiu lìí ʋ nyɩna-ba yolwan tə yoo máŋá mama,
sə ʋ nuu lwanɩ tə dàn ká sɩ̀n kʋ nan!
15 Ba-Yígúrə́-Jə-Tiu wá lìí tə yoo máŋá mama,
yá ʋ wá pa ba yɩrɩ nyʋn tɩa yuu wa!
16 Cɩ́gá, bɛɛ təntə wà lìí, sə ʋ tʋn wʋywaŋʋ,
ʋ fɩfɩn zʋrʋ də yinənyiən,
yá ʋ ken lìù tə ʋ pùə́ nə cʋ̀gʋ̀ càn wa,
kʋ va kʋ yí kʋ tíú tɩan.
17 Ʋ sóní zɩra,
yá zɩra pìí ka ja ʋ tətə.
Ʋ wà sóní sə ʋ lòrì, sə Yɩɩ fwa zəni,
yá zəni fwaŋʋ vəli yiŋʋnɩ də wá.
18 Ʋ zʋa zɩra, ndə ganzwɩʋ nə,
yá tə zʋa ʋ waa, ndə nɩ́á nə,
tə lɛ tə zʋ ʋ nandaran wa, ndə nʋga nə.
19 Tə wá jì ndə gansara nə, tə piri wá,
tə ga ya ndə ʋ tàŋá voru nə, máŋá mama wuuu!»
20 Mə nətʋ nə, Ba-Yígúrə́-Jə-Tiu wá ŋwɩ́n
lɩ̀à tə nə swɩ̀n ba zɩga à nə,
də ba tə nə swɩ̀n sʋlwana ba pɩn nə!
21 Yá n mʋ̀ Yuu-Tiu Ba-Yígúrə́-Jə-Tiu,
n dàń taa n tətə yɩrɩ, n ga san nə.
Jon nə, n wʋywaŋʋ tə nə dáá yɩrɩ.
22 À yɩ zʋrʋ, à ga yɩ yinənyiən,
yá à pùə́ cʋ̀gʋ̀ zənzən.
23 À mɩɩ tə kɛ̀ń ndə yɩywara nə kɛ̀ń nətʋ,
ba dɩŋɩ nə, ndə ba nə dɩŋɩ jə̀rə̀n nətʋ.
24 À vwə nii kʋ dán, à kʋ́ʋ̀ wàrɩ̀ yɩɩ nə à zɩga,
à bwànɩ́ zənzən, à nə ba wodiu də́ yɩrɩ.
25 À jìgə̀ lìù, lɩ̀à nə fʋfʋlɩ.
Ba nə nɩ nə, ba yàá zwɩn ba yuu wa.
26 Ba-Yígúrə́-Jə-Tiu, à tíú Yɩɩ, bà n san nə!
Jon nə də n wʋywaŋʋ tə!
27 Pa ba yəni də n mʋ̀ jɩɩn nə tʋn kʋ,
n mʋ̀ Ba-Yígúrə́-Jə-Tiu nə tʋn kʋ nətʋ tə, n pa nə.
28 Ba mʋ̀ zɩrɩ ba kəni lɩ̀à nə,
yá n mʋ̀ fwa zəni lɩ̀à yɩra.
Ba nə zàn ba zɩgɩ à nə, ba yàá də́ cavɩra,
yá à mʋ̀ n tʋtʋnʋ tə jwɛ.
29 Pa ba tə nə swɩ̀n ba zɩga à nə də́ cavɩra,
pa ba cavɩra tə piri ba yuu nə, ndə gànʋ̀ nə!
30 À wá zɩ̀n à kori yɩɩ nə, à ma bʋ Ba-Yígúrə́-Jə-Tiu nə.
À wá siən wá lalʋʋ tə titəŋi wa.
31 Cɩ́gá, ʋ zɩga yinənyiən jɩzən vàn yuu,
sə ʋ jon wá lɩ̀à tə jɩɩn wa,
ba nə wá bʋ̀rɩ̀ ba pa bʋra ja wá.