À pɩ̀à sə à zɩ̀n tɩbɩlakʋnʋ dwiən nə
108
1 Nuŋə. Davidə gwaran.
2 Ooo à tíú Yɩɩ, à bɩcan dàn!
À wá nun, à wá siən!
Kʋ mʋ̀ nə yɩ à dun!
3 Zàn dwiən nə à bànʋ́ də à kwànʋ́!
Cɩ́gá, à mɛ sə zɩ̀n tɩbɩlakʋnʋ dwiən nə.
4 Ba-Yígúrə́-Jə-Tiu, à wá nun à ma bʋ n nə, dwíə́ tə wa,
à ga siən mʋ́, dwíə́ nəkaran* tə titəŋi wa.
5 Cɩ́gá, n wʋywaŋʋ tə dɩga kʋ kɛ̀ń lanworu,
n cɩ́gá tə ga dɩ̀ ka yí bakwan wa.
6 Ooo à tíú Yɩɩ, bɩrɩ n dánɩ́ tə nə dwə lanworu nətʋ!
Pa n dun tə ya tɩa yuu mama wa!
7 Jon nə mʋ̀ lɩ̀à tə n nə swə,
də n jɩzən vàn tə, n ga le nə.
8 Yɩɩ swɩ̀n ʋ wúlú bwálɩ́ tə wa, ʋ wʋ́:
«À mʋ̀ nə dí dɩ̀àn,
à wá tara Siswɛmə tɩʋ tə,
à ga wá man Sukotə vara tə.
9 Galadə yɩ à mʋ̀ nə tɩ,
Manase də yɩ à mʋ̀ nə tɩ,
Efərayimə yɩ à yukoli,
yá Zwida yɩ à pàrɩ̀ dafɩla.
10 Mʋabə yɩ à naswɩa canbo,
Edomə yɩ bwálɩ́, à nə túŋə́ à natɩra lá.
À mà kʋ̀ʋ̀ cə̀rə́ à kəni Filisi lʋʋ nii tə nə!»
11 Wàà nə wá ja nə ʋ va tɩʋ tə wa,
ba nə lwə̀ ba kɩkarɩ də biritaŋʋ?
Wàà nə wá ja nə ʋ va Edomə wa?
12 Kʋ yɩ n mʋ̀ à tíú Yɩɩ cɩcɩ.
Yá n dàń vɩga nəba n dʋgʋ,
n kʋ́ʋ̀ ba tɛ n pɩn nə kwatara púlə́ tə nə.
13 Bà san nəba, n ta nə jarɩduən tə!
Cɩ́gá, ləzoni sáŋʋ́ yɩ tʋtʋ.
14 Yɩɩ wulə də nəba, nə wá də́ dɩ̀àn.
Ʋ mʋ̀ nə wá tɩtaga nə jarɩduən tə.