Bonu nii sagɩ
(Gwaran 107—150)
Ba-Yígúrə́-Jə-Tiu mɛ də bʋra, ʋ nə yɩ jonu yɩrɩ
107
1 Á bwɩa Ba-Yígúrə́-Jə-Tiu nə, cɩ́gá, ʋ ziən,ʋ wʋywaŋʋ tə ga wulə máŋá mama wuuu.
2 Lɩ̀à tə Ba-Yígúrə́-Jə-Tiu nə jon, swɩan kʋ də ba bwɛ́.
Ba mʋ̀ lɩ̀à tə ʋ nə yəə ʋ jon ba jarɩduən jɩɩn wa,
3 ʋ ja nan lʋʋ níə́ tə mama wa,
yɩɩ yipɩan con, də yɩɩ yizwɩa con,
də jɩzən saparʋ con, də jɩgwiə saparʋ con,
ʋ bà ʋ kə duən yáá nə.
4 Ba duən yà jɛ́n kasɔɔ lanworu wa,
ba wà tɩʋ nɩ, lɩ̀à nə wulə kʋ wa.
5 Niən də nanyʋnɩ jɩn ba,
ba mɩɩ pɩ̀à kʋ nan.
6 Ba bubwi ba kə Ba-Yígúrə́-Jə-Tiu nə, ba jɩgwarʋ tə wa,
yá ʋ jon ba, ba yojanʋ tə wa.
7 Ʋ ken ba cwəŋə wa, ka nə yɩ mənəmənə,
sə ba va ba nan tɩʋ nə, lɩ̀à nə wulə kʋ wa.
8 Ba bwɩa Ba-Yígúrə́-Jə-Tiu nə, ʋ wʋywaŋʋ tə yɩrɩ,
də ʋ yomɩlan tə yɩrɩ, ʋ nə tʋŋa ʋ pɩn ləzoni nə!
9 Cɩ́gá, ʋ pɩn lɩ̀à tə nanyʋnɩ nə jə, nyʋn nɩ́á ba sú,
ʋ ga pa ba tə niən nə jə, də́ ba sú.
10 Ba duən yà wulə yikunu də tɩan yɩywara wa.
Yá ba dàń yà yɩ ndə bandiə lɩ̀à nə,
ba nə wulə yinəgə wa, ba ga vwa ba də banzala,
11 ba nə vɩga Yɩɩ nii,
ba ga vɩ Baan Yɩɩ kwìə̀ tə.
12 Ʋ twá càn nə, ʋ ma mun ba,
ba tʋa, lìù ga tə̀lə́ sə ʋ san ba.
13 Ba dàń bubwi ba kə Ba-Yígúrə́-Jə-Tiu nə, ba jɩgwarʋ tə wa,
yá ʋ jon ba, ba yojanʋ tə wa.
14 Ʋ van ba ʋ lɩ yikunu də tɩan yɩywara wa,
ʋ ga karɩ ba banzala tə.
15 Ba bwɩa Ba-Yígúrə́-Jə-Tiu nə, ʋ wʋywaŋʋ tə yɩrɩ,
də ʋ yomɩlan tə yɩrɩ, ʋ nə tʋŋa ʋ pɩn ləzoni nə!
16 Cɩ́gá, ʋ nyʋnyʋgʋ cɩnɩan bwə̀rə̀n tə,
ʋ ga kɛ́n lugu boruswaran tə.
17 Lɩ̀à duən yɩ ləyirən, yá ba ləyiri tʋ̀tʋ̀nán tə,
də ba yolwana tə pɩn ba jì yinənyɩna.
18 Ba waa nan wodiu mama,
ba mɩɩ ga wulə tɩan jɩɩn wa.
19 Ba dàń bubwi ba kə Ba-Yígúrə́-Jə-Tiu nə, ba jɩgwarʋ tə wa,
yá ʋ jon ba, ba yojanʋ tə wa.
20 Ʋ pɩn ʋ sʋgʋ tə pa ba yazurə,
ʋ ga van ba ʋ lɩ tɩan bʋʋ wa.
21 Ba dàń bwɩa Ba-Yígúrə́-Jə-Tiu nə, ʋ wʋywaŋʋ tə yɩrɩ,
də ʋ yomɩlan tə yɩrɩ, ʋ nə tʋŋa ʋ pɩn ləzoni nə!
22 Ba fwaga jwii kenu jwəŋə*, ba ma bʋ ʋ nə,
ba ga mà pupwən cə̀rí ʋ yuu nə, ʋ tʋ̀tʋ̀nán tə yɩrɩ!
23 Lɩ̀à tə yà nə zʋa nɩ́á yuu borə,
ba va mʋʋ titəŋi wa, ba tʋŋa lá,
24 nɩ Ba-Yígúrə́-Jə-Tiu tʋ̀tʋ̀nán tə,
də ʋ yomɩlan tə, mʋʋ tə titəŋi wa.
25 Ʋ nii sʋgʋ pɩn dwavʋʋ bà,
kʋ zɩ̀n nakulə.
26 Nakulə tə yàá zɩ̀n nɩ́á yuu borə tə yɩɩ nə,
tə ga pìí tə ja tə tə cú mʋʋ tə yuu wa,
yá nɩ́á yuu borə tə wa lɩ̀à tə mɩɩ pɩ̀à kʋ nan,
lɛɛ tə yɩrɩ tə nə wá yí ba, mʋʋ tə wa.
27 Yiviru jɩn ba, ba tətəli,
ndə lɩ̀à nə nyʋan sana ba bʋbʋnɩ,
ba wʋbʋŋa mama ga jɛ́n.
28 Ba bubwi ba kə Ba-Yígúrə́-Jə-Tiu nə, ba jɩgwarʋ tə wa,
yá ʋ jon ba, ba yojanʋ tə wa.
29 Ʋ pɩn dwavʋʋ tə cən kʋ zɩgɩ siii,
nakulə tə ga pìí tə tʋ.
30 Ba pùə́ dàń poli, mʋʋ tə nə pìí kʋ jì səgisəgi tə yɩrɩ,
Yɩɩ ga ja ba, ʋ va ʋ yí bwálɩ́ tə ba nə pɩ̀à.
31 Ba bwɩa Ba-Yígúrə́-Jə-Tiu nə, ʋ wʋywaŋʋ tə yɩrɩ,
də ʋ yomɩlan tə yɩrɩ, ʋ nə tʋŋa ʋ pɩn ləzoni nə!
32 Ba sənə wá, lalʋʋ tə púlí tə wa,
ba ga bʋ ʋ nə, nəkwɩna tə jə́rə́ wa.
33 Ʋ lwànɩ́ mʋnɛɛ, ʋ pɩn tə jì kasɔɔ lanworu,
ʋ ga pɩn nabuliyɩa jì tɩkʋrʋ.
34 Ʋ pɩn tɩa tə nə ywán jì tɩtɩgʋ,
ka tɩ̀án wʋlʋŋʋ yɩrɩ.
35 Ʋ lwànɩ́ kasɔɔ lanworu,
ʋ pɩn kʋ jì nɩ́á bwálɩ́,
ʋ ga pɩn tɩkʋrʋ jì nabuliyɩa.
36 Yá ʋ pɩn lɩ̀à tə niən nə jə,
bà ba lwà tɩʋ lá, ba wulə kʋ wa.
37 Ba dɩ kárɩ́, ba cwɛn divɛn tɩ̀án,
tə ləni tə pɩn ba.
38 Ʋ fwa zəni ba yɩra, ʋ pa ba pùlì zənzən,
ʋ wà yá sə ba vàná tɩ, tə mun.
39 Yá fɩfɩan, də càn, də pucʋnɩ pɩn
ba duən nii dánɩ́ pìí kʋ mun, ba ga fʋlɩ.
40 Ba-Yígúrə́-Jə-Tiu yàá pa fʋfʋlʋ yí yáá tɩ̀án tə,
ʋ ga yá ʋ pa ba ywan kasɔɔ lanworu wa,
kʋ nə ba cwəŋə jə.
41 Yá ʋ yàá lɩ zʋra mʋ̀ yinəgə wa,
ʋ pɩn ba dìə̀ lɩ̀à pùlì zənzən, ndə vàná nə.
42 Lɩ̀à tə nə yɩ mənəmənə nɩ kʋ, ba ga fwa pupwən,
yá ba tə mama nə tə̀lə́ cɩ́gá cwəŋə wa, pwí ba nii.
43 Lìù tə nə yɩ wʋbʋnyiən,
mɛ sə ʋ cɩ̀ ʋ tɩ̀àn nə də yìə̀n təntə mama,
ʋ ga lwarɩ Ba-Yígúrə́-Jə-Tiu wʋywaŋʋ tʋ̀tʋ̀nán tə.