Yɩzərayɛlə lɩ̀à yɩ pwìí bələ tɩ̀án
106
1 Á sənə Ba-Yígúrə́-Jə-Tiu!Á bwɩa Ba-Yígúrə́-Jə-Tiu nə,
ʋ nə yɩ sonu tíú yɩrɩ!
Cɩ́gá, ʋ wʋywaŋʋ* tə wulə wuuu, kʋ ba zwɛ̀!
2 Wàà nə wàá Ba-Yígúrə́-Jə-Tiu dɩ̀àn tə máŋá ʋ maŋa,
ʋ ga pɩn ba nì ʋ nə mɛ də bʋra nətʋ?
3 Pupwən lɩ̀à nə yɩ lɩ̀à tə
nə twá kʋ tə nə yɩ mənəmənə nə,
ba ga tʋŋa kʋ tə nə tì cɩ́gá cwəŋə, máŋá mama!
4 Ba-Yígúrə́-Jə-Tiu, lìí à yoo,
n nə pɩn n lɩ̀à tə na yuywaŋʋ yɩrɩ.
Taa n nə yɩ jonu tə yɩrɩ, n bà n san nə.
5 Pa sə à yii dì lɩ̀à tə n nə kúrí ywánɩ́ tə,
pa sə à twá n lɩ̀à tə nə, à fwa pupwən,
pa sə à twá lɩ̀à tə nə,
ba nə yɩ n mʋ̀ nə tɩ, à jwɛ.
6 Nə tʋn cʋna ndə nə nɩbara-ba nə,
nə dwá nə tɩ̀àn, nə tʋn yolwan.
7 Nə nyɩna-ba nə yɩn Ezwipətə nə,
ba wà n yomɩlan tə də̀ń lwarɩ.
Ba swɛ̀ɛ́ n wʋywaŋʋ tə mama yoo,
ba ga vɩ n nii mʋʋ tə nii nə,
Mɩncanɩ mʋʋ tə nii nə.
8 Yá ʋ jon ba,
sə ʋ ma pa dun ʋ yɩrɩ tə nə,
sə ʋ ga pa ba lwarɩ ʋ dɩ̀àn tə.
9 Ʋ caga Mɩncanɩ mʋʋ tə nii nə, kʋ ga kʋ̀,
ʋ pɩn nə nɩbara-ba twá kʋ wa ba nan,
ndə ba nə twá kasɔɔ lanworu wa.
10 Ʋ jon ba lɩ̀à tə jɩɩn wa, ba nə culi ba,
ʋ lɩ ba ba dʋŋa jɩɩn wa.
11 Nɩ́á tə púə́ ba jarɩduən tə yuu nə,
ba lìù mama wà gɛ.
12 Nə nyɩna-ba dàń pɩn cɩ́gá ʋ sʋ̀ràn tə nə,
ba ga nun ba bʋ ʋ nə.
13 Yá ba swɛ̀ɛ́ ʋ yogwaran təntə yoo lala,
ba wà kʋ tə ʋ nə pɩ̀à sə ʋ tʋn tə dàn,
sə kʋ nii sú.
14 Ba pɩn wiən fɩra ja ba,
kasɔɔ lanworu tə wa,
ba ga dídə́n Yɩɩ digə tɩa wa.
15 Ʋ pɩn ba wodiu tə ba nə lòrì,
yá ba dí ba sú,
kʋ ga pìí kʋ jì yayɩgʋ ba yɩra.
16 Ba tʋn wʋgwɩʋ Moyizə də Aron yɩra,
ba dəkuu bwálɩ́ tə wa,
yá Aron yà yɩ bɛɛ tə Ba-Yígúrə́-Jə-Tiu nə kúrí,
ʋ tún vàn nə, sə ʋ ya ʋ tʋtʋnʋ.
17 Tɩa tə dàń súrí ka nii, ka lìrə̀ Datan,
ka pìí ka pú Abiramə də ʋ kwa lɩ̀à tə yuu nə.
18 Mən dí ba kwa lɩ̀à tə,
mənvwə dí wʋlʋnyɩna təntə.
19 Ɔrɛbə paan tə yuu wa, ba nyɩan lugu,
ba ma fwa nabiə nyɩnyɩga,
ba ga tʋ ba nadwana yuu lugu təntə yáá con,
ba pa kʋ dun.
20 Ba ja vànɩ́ tə nə də́ gaʋ nyɩnyɩga,
ba ma lárɩ́ Yɩɩ yuu nə, ʋ nə yɩ ba dun.
21 Ba swɛ̀ɛ́ Yɩɩ yoo ʋ nə yɩ ba jonu,
ʋ nə tʋn yofaran Ezwipətə nə,
22 də yomɩlan Swamə lʋʋ nii tə wa,
də yogwaran Mɩncanɩ mʋʋ tə nii nə.
23 Yɩɩ yà pɩ̀à sə ʋ cʋ̀gʋ̀ ba, ʋ pa ba nyʋn lá,
ʋ ga yá Moyizə cɩcɩ, ʋ nə kúrí.
Ʋ mʋ̀ nə zɩgɩ Yɩɩ yáá con,
ʋ cɩ̀ sə Yɩɩ lɩŋa tə dàn ká cʋ̀gʋ̀ ba.
24 Ba vɩga lʋʋ nii tə nə jə fɩra,
ba wà cɩ́gá pɩn Yɩɩ nikanɩ tə nə.
25 Ba ŋʋŋwɩn ba gansilə wa,
ba ga wà Ba-Yígúrə́-Jə-Tiu sʋgʋ tə nii zìlí.
26 Ʋ dàń zɩ̀n ʋ jɩɩn yɩɩ nə, ʋ ga dù,
də ʋ wá pa ba tɩ kasɔɔ lanworu tə wa,
27 ʋ wá pa ba dwíə́ tə, ba nə wá kə lʋʋ wa
laga duən yáá nə, lʋʋ níə́ tə mama wa,
ʋ ga pa ba tɩ dwíə́ nəkaran* tə wa.
28 Ba pugu ba zʋ Baalə* woŋwanʋ tə
jwəŋə fwaŋʋ wa, Pewɔrə nə,
yá ba dí jwəŋə nàŋʋ́,
ba nə gʋa ba pa cirə nə.
29 Ba tʋtʋnɛɛ tə zɩ̀n Ba-Yígúrə́-Jə-Tiu lɩŋa,
yá càn dàń tʋa ba yuu wa.
30 Fineyasə dàń zàn,
ʋ kwɛn yoo tə,
yá càn tə cən tə zɩgɩ.
31 Kʋ nətʋ pɩn ʋ jì cɩ́gá tíú,
máŋá də máŋá mama wuuu.
32 Meriba nɩ́á tə nii nə,
ba zɩ̀n Ba-Yígúrə́-Jə-Tiu lɩŋa,
yá kʋ nətʋ tə pɩn càn yí Moyizə.
33 Cɩ́gá, ba zɩ̀n Moyizə lɩŋa,
kʋ pa ʋ swɩ̀n də ʋ wà bʋ́n.
34 Ba wà dwíə́ tə mama gwɩ,
Ba-Yígúrə́-Jə-Tiu nə bɩrɩ ba.
35 Ba gùlí ba tɩ̀àn dwíə́ nəkaran tə wa,
ba twá ba tʋŋa ba yofwamɩnan tə.
36 Ba pɩn dun dwíə́ nəkaran woŋwanan tə nə,
yá tə jìgə̀ ndə nyalɩ nə, tə ja ba.
37 Ba ja ba bɩ̀á də ba bwɩ̀ɩ́,
ba ma fwa jwəŋə, ba pa zinə nə.
38 Ba lwá lɩ̀à tə nə wà yoo cʋ̀gʋ̀ jana,
tə yɩ ba bɩ̀á də ba bwɩ̀ɩ́ jana,
ba nə ma fwa jwəŋə,
ba pa Kanaan tɩ̀án woŋwanan tə nə,
yá jana təntə dàń ken durən lʋʋ nii tə wa.
39 Ba tʋtʋnɛɛ təntə pɩn ba jì durən lɩ̀à,
ba ga jì pwìí bələ tɩ̀án, ndə kacwarʋ nə.
40 Ba-Yígúrə́-Jə-Tiu lɩŋa dàń zàn,
tə pupwin ndə mən nə, ʋ lɩ̀à tə yuu wa,
yá ʋ waa dàń nan ba mʋ̀ lɩ̀à tə, ʋ nə tɩ.
41 Ʋ ken ba dwíə́ nəkaran jɩɩn wa,
yá ba jarɩduən dí dɩ̀àn ba yuu wa.
42 Ba dʋŋa fɩfɩn ba,
yá ba dí cavɩra ba jɩɩn wa.
43 Nɛɛ kapʋpʋ, Ba-Yígúrə́-Jə-Tiu yàá jon ba,
yá ba tə vɩ ʋ nii,
ba ga kwɛn ba tʋŋa ba yolwana tə wuuu.
44 Ʋ jələ ba jɩgwarʋ tə,
máŋá tə ʋ nə nì ba bubwiə tə.
45 Ʋ lìí ʋ nimarʋ tə yoo, ʋ nə tún də ba,
yá ba yinəgə jɩn wá,
ʋ nə yɩ wʋywaŋʋ nəfarʋ tíú yɩrɩ.
46 Ʋ pɩn lɩ̀à tə mama nə jɩn ba,
ba ma fwa ywə́ŋə́, dəri ba yinəgə.
47 Ba-Yígúrə́-Jə-Tiu, nə tíú Yɩɩ, jon nəba!
Ja nəba n kə duən yáá, dwíə́ nəkaran tə titəŋi wa,
sə nə bʋ n yɩrɩ tə nə, kʋ nə yɩ parɩ.
Yá bʋra tə nə nə pɩn mʋ́ dàń wá ya nə dun won.
48 Nə bwɩa Ba-Yígúrə́-Jə-Tiu nə,
ʋ nə yɩ Yɩzərayɛlə lɩ̀à Yɩɩ,
máŋá də máŋá mama wuuu!
Yá lalʋʋ tə mama swɩan, ba wʋ́:
«Amɩɩna! Nə bwɩa Ba-Yígúrə́-Jə-Tiu nə!»