Nuŋə, ka nə lìí Ba-Yígúrə́-Jə-Tiu yomɩlan tə yoo
111
1 Á bwɩa Ba-Yígúrə́-Jə-Tiu nə!À wá siən Ba-Yígúrə́-Jə-Tiu də à waa mama,
cɩ́gá tɩ̀án tə də lalʋʋ tə titəŋi wa,
ba nə kun duən nə.
2 Ba-Yígúrə́-Jə-Tiu tʋ̀tʋ̀nán tə yɩ tʋtʋnfaran,
lɩ̀à tə mama nə swə tə, yàá bʋŋa tə yoo.
3 Ʋ tʋ̀tʋ̀nán tə jə poni də dun,
ʋ cɩ́gá cwəŋə tə ga wulə máŋá mama wuuu.
4 Ʋ pɩ̀à sə ba lìí ʋ yomɩlan tə yoo.
Ba-Yígúrə́-Jə-Tiu yɩ pubwanʋ tíú,
ʋ ga dəri lɩ̀à yinəgə.
5 Ʋ pɩn wodiu lɩ̀à tə nə ba nə dəri ʋ fən,
ʋ yàá lìí ʋ nimarʋ* tə yoo máŋá mama wuuu.
6 Ʋ bɩrɩ ʋ dɩ̀àn tʋ̀tʋ̀nán ʋ lalʋʋ tə nə,
kʋ twá ʋ nə pɩn ba dwíə́ nəkaran* lʋʋ nii tə.
7 Ʋ jɩ̀àn tʋ̀tʋ̀nán tə yɩ cɩ́gá, tə ga yɩ mənəmənə.
Ʋ yìə̀n tə mama, ʋ nə pɩn nii tə yuu wa, ba tʋ́tʋ̀ná jə.
8 Tə wulə máŋá mama wuuu,
tə yɩ cɩ́gá, tə ga yɩ mənəmənə.
9 Ʋ jon ʋ lalʋʋ tə,
ʋ nə tún nimarʋ də ba, máŋá mama wuuu.
Ʋ yɩrɩ tə yɩ parɩ, kʋ ga bà kamandon jə.
10 Ká dəri Ba-Yígúrə́-Jə-Tiu fən,
nə yɩ wʋbʋŋa də̀ń laŋʋ.
Lɩ̀à tə mama nə tʋŋa kʋ nətʋ tə yɩ swɩan tɩ̀án.
Ʋ mɛ də bʋra, máŋá mama wuuu.