Lìù tə nə pɩ̀à sáŋʋ́ Yɩɩ con bubwiə
22
1 Gwàgá yáá tíú gwaran, ba nuŋə «Jɩjʋ naŋa» nə yɩ nətʋ yuu wa. Davidə gwaran.
2 À tíú Yɩɩ, à tíú Yɩɩ,
bɛ̀ɛ̀ nə pɩn, n ma vɩ nə n dʋgʋ?
À bubwi, yá n ba twi n joŋə nə.
3 À tíú Yɩɩ, à bubwi yɩcaʋ wa, yá n ba nə le.
Tɩtɩn də nə, à ba à nii pwí, yá à tə ba sìə́ jə.
4 Yá n ga yɩ Yɩɩ tə n nə yɩ parɩ.
N jə̀ə́ n padaʋ tə yuu, n də́ pàrɩ̀,
Yɩzərayɛlə lɩ̀à bʋra titəŋi wa.
5 N mʋ̀ yuu wa nə, nə nɩbara-ba yà jələ.
Ba yà jələ n yuu wa, yá n joŋə ba.
6 Ba yà bubwi ba kəni n nə,
yá n yàá jon ba yojanan wa.
Ba yà jələ n yuu wa, yá ba ba cavɩra də́.
7 Yá à mʋ̀ dàń yɩ ndə zʋnzʋgʋ nə, à kʋ́ʋ̀ tà lìù.
À yɩ ləzoni twɩn, yá lalʋʋ fʋfʋlɩ.
8 Ba tə mama, ba nə na nə yàá mʋŋa nə,
ba cʋrɩ, də ba zɛ ba vaparan.
9 Ba swɩ̀n à yoo, ba wʋ́: «Ʋ yá ʋ tɩ̀àn Ba-Yígúrə́-Jə-Tiu jɩɩn wa!
Ba-Yígúrə́-Jə-Tiu wá jon wá, sə nə na!
Ʋ bʋŋa də ʋ mʋ̀ nə ʋ swə,
ʋ wá jon wá yojanan wa, sə nə na!»
10 Cɩ́gá, n mʋ̀ nə van nə n lɩ à nuu pùə́ wa,
n ga ywàń à yuu máŋá tə wa, à nə ŋʋ̀à yɩlɩ, à nuu nyʋnɩ nə.
11 À yɩn n mʋ̀ nyiən, kʋ nə zɩgɩ à lɩrʋ máŋá wa,
yá n yɩn à Yɩɩ, də à tə wulə à nuu pùə́ wa.
12 Dàn ká ya yiŋʋnɩ də nə,
cɩ́gá, jɩgwarʋ pɩ̀à kʋ zʋ nə,
yá lìù tə̀lə́ sə ʋ san nə!
13 À dʋŋa cɩ̀gà nə ba kə, ndə nabɩran kapʋpʋ nə.
Ba kɩkarɩ nə, ndə Baswan tɩ̀án nabɩran nə.
14 Ba kàń ba nii ba kə à con,
ndə gəru nə, kʋ nə vuri nàŋʋ́ də kʋ baa.
15 À dɩ̀àn wulə tə zwɛ̀ ndə nɩ́á nə, tə nə lwɛ́,
yá à kurən tə mama wulə tə sori duən wa.
À bɩcan tə nyɩnɩ à waa, ndə tʋ̀ràn mɔɔ nə.
16 À kələru kʋa ndə daʋ nə,
yá à nəndəli marɩ à nipaa wa.
N tún nə tɩan pùrú wa.
17 Cɩ́gá, yolwafwana cɩ̀gà nə ba kə.
Ba kɩkarɩ nə, ndə kukuri nə.
Ba pórí à jɩ̀àn də à nɛɛ.
18 À wàá à kurən tə mama à galɩ.
À dʋŋa yàá mɩnɩ nə, ba ga ywàŋá nə zəən.
19 Ba tarɩ à gànàn tə,
ba ga tá kwɛ́ ba ma tì à ganzwɩdarʋ tə.
20 Ba-Yígúrə́-Jə-Tiu, dàn ká ya yiŋʋnɩ!
Cɩ́gá, n mʋ̀ nə yɩ à dɩ̀àn!
À lòrì mʋ́ sə n bà lala, n san nə!
21 Jon à jə̀rə́ tə kwatara sɩ̀ʋ́ nii wa.
Jon à mɩɩ tə kukuri tə yelə wa!
22 Jon nə gəru nii wa,
də ganaʋ nyʋran wa!
Yá n le nə!
23 À wá swɩ̀n n yɩrɩ tə yoo, à bɩrɩ à nubɩa nə,
yá à wá bʋ n nə, n púlí tə titəŋi wa.
24 Á mʋ̀ lɩ̀à tə, á nə dəri Ba-Yígúrə́-Jə-Tiu fən,
á bwɩa ʋ nə!
Á mʋ̀ Zwakɔbə dwíí tə mama,
á pɩan wá dun!
Á vɩvaga ʋ yáá con,
á mʋ̀ Yɩzərayɛlə dwíí tə mama!
25 Cɩ́gá, ʋ ba yinənyiən gònì,
ʋ ma ba wá zʋ̀nɩ̀ ʋ yinəgə tə wa.
Ʋ ba ʋ kwa viviri ʋ ma sɛ̀ wá.
Yá ʋ yàá cʋgʋ ʋ con, də ʋ nə bubwi ʋ kə ʋ nə.
26 À wá bʋ n nə, n púlí nəfarʋ tə titəŋi wa,
kʋ tə yɩrɩ n nə fwa n pa nə.
À wá pa à nipwələ tə nii sú lɩ̀à tə yáá con, ba nə dəri n fən.
27 Labwana wá də́ ba sú,
yá lɩ̀à tə nə pɩ̀à Ba-Yígúrə́-Jə-Tiu wá bʋ ʋ nə.
Yɩɩ wá pa aba bɩcan sìə́ máŋá mama wuuu!
28 Tɩa yuu ləzoni tə mama lɩ̀à wá lìí Ba-Yígúrə́-Jə-Tiu yoo,
ba ga pìí ba bà ʋ con.
Lʋʋ dwíə́ tə mama lɩ̀à wá tʋ ba nadwana yuu, ʋ yáá con,
ba pa wá dun.
29 Cɩ́gá, Ba-Yígúrə́-Jə-Tiu nə yɩ pɩ̀ʋ́,
ʋ də́ pàrɩ̀ lʋʋ dwíə́ tə yuu wa.
30 Tɩa yuu ladɩra tə mama wá də́,
ba də ga tʋ ba nadwana yuu,
ba pa wá dun.
Lɩ̀à tə mama tɩa nə wá də́ ba, wá kwá ʋ yáá con.
Ba yɩ lɩ̀à tə, ba mɩɩ nə wàrɩ̀ lʋʋ wa kʋ mɛn.
31 Ba dwíí tə ba nə wá kə lʋʋ wa,
nə wá zàn ba tʋn ba pa Ba-Yígúrə́-Jə-Tiu nə.
Lɩ̀à wá swɩ̀n Yuu-Tiu yoo ba bɩrɩ dwíí təntə nə.
32 Ba wá bà, ba swɩ̀n ʋ cɩ́gá tə yoo ba bɩrɩ,
ba ga tún kʋ tə mama ʋ nə tʋn,
ba bɩrɩ lɩ̀à nə, ba tə nə wà ba lɩrɩ.