Pɩ̀ʋ́ wàá Ba-Yígúrə́-Jə-Tiu yuu wa ʋ jələ
21
1 Gwàgá yáá tíú gwaran. Davidə gwaran.2 Ba-Yígúrə́-Jə-Tiu, pɩ̀ʋ́ tə làrɩ̀ n dɩ̀àn tə yɩrɩ.
N sáŋʋ́ tə súə́ wá də pupwən!
3 N pɩn wá won tə, ʋ bɩcan nə pɩ̀à,
n ga wà wá voŋi kʋ tə, ʋ nii nə lòrì. Zɩgɩ sìí bwálɩ́.
4 Cɩ́gá, n jəri wá də zìlə́ wiən tə nə jə fɩra.
N púə́ sɩ́án tə nə ba durən jə payupuu ʋ yuu nə.
5 Ʋ lòrì mɩɩ n con, yá n pɩn kʋ wá.
N pɩn wá mɩdarɩ kʋ nə ba zwɛ̀, də mama.
6 N sáŋʋ́ tə pɩn ʋ dun dáá zənzən.
N zɩ̀n ʋ yuu yɩɩ nə, n pa ʋ gwɩ̀n pàrɩ̀.
7 N tʋŋa zəni ʋ yɩra máŋá mama wuuu.
N pɩn ʋ sú də pupwən n yáá con.
8 Cɩ́gá, pɩ̀ʋ́ tə jələ Ba-Yígúrə́-Jə-Tiu yuu wa,
yá Baan Yɩɩ wʋywaŋʋ* tə pɩn ʋ jə̀ə́ zəni.
9 N wá ja n dʋŋa tə mama, n kə n jɩɩn wa.
N wá ja ba tə nə culi mʋ́, n kə n jɩzən wa.
10 Dɩɩn tə n nə wá bà,
n wá pa ba jì ndə mənbəlabɔ wa won nə.
Ba-Yígúrə́-Jə-Tiu wá cʋ̀gʋ̀ ba də lɩŋa,
yá mən wá də́ ba.
11 N wá pa ba bɩ̀á tɩ ba zwɛ̀ tɩa yuu wa,
ba dwíí ga jɛ́n ləzoni pwə́rə́ wa.
12 Ba nə vʋrɩ sə ba tʋn yolwan n yɩra,
ba nə bʋŋa sə ba kə mʋ́ yoo wa,
ba bá wànɩ́ kaka ba tʋn.
13 Cɩ́gá, n wá ta ba də n twan tə,
yá n wá pa ba pìí ba pa kwa.
14 Zàn yɩɩ nə, n bɩrɩ n dɩ̀àn tə, Ba-Yígúrə́-Jə-Tiu!
Nə pɩ̀à nə nun nə ma siən mʋ́, n dɩ̀àn tə yɩrɩ.