Yɩjʋnɩ, pɩ̀ʋ́ sáŋʋ́ yɩrɩ
20
1 Gwàgá yáá tíú gwaran. Davidə gwaran.
2 Ba-Yígúrə́-Jə-Tiu wá san mʋ́ jɩgwarʋ dɩɩn nə!
Zwakɔbə Yɩɩ tə wá pú n yuu nə!
3 Ʋ wá zɩgɩ ʋ wúlú bwálɩ́ tə nə, ʋ tʋn sáŋʋ́ n nə!
Ʋ wá zɩgɩ Siyon* tɩʋ tə wa, ʋ dàn n jɩɩn!
4 Ʋ wá bʋ́n n zìlə́ wiən* tə mama yoo,
yá ʋ wá sɛ̀ ʋ jon n jwəŋə tə, n nə sʋ̀rɩ́*! Zɩgɩ síí bwálɩ́.
5 Ʋ wá pa mʋ́ kʋ tə, n bɩcan nə pɩ̀à,
ʋ ga pa n pubʋŋa yìə̀n mama nii sú!
6 Yá nə dàń wá mà pupwən cə̀rí, n nə dí dɩ̀àn yɩrɩ,
nə ga zɩ̀n dɩrapo yɩɩ nə, nə ma pa dun nə tíú Yɩɩ tə nə.
Ba-Yígúrə́-Jə-Tiu wá pa mʋ́ won tə mama, n nə lòrì ʋ con.
7 Sɩ́ʋ́n nə, à dàń yə̀ə́ də,
Ba-Yígúrə́-Jə-Tiu joŋə pɩ̀ʋ́ tə ʋ nə kúrí*.
Ʋ zɩgɩ ʋ wúlú bwálɩ́ tə wa yɩɩ nə,
ʋ ja ʋ jɩzən dɩ̀àn sáŋʋ́, ʋ ma le wá.
8 Lɩ̀à duən yɩ ba səsen kòrə̀n yuu wa ba jələ,
ba duən də ga yɩ ba səsen yuu wa ba jələ,
yá nə mʋ̀ yɩ nə boŋə nə kəni Ba-Yígúrə́-Jə-Tiu,
ʋ nə yɩ nə tíú Yɩɩ, yɩrɩ tə nə.
9 Ba mʋ̀ sori ba twɩ,
yá nə mʋ̀ zɩga yɩɩ nə də dɩ̀àn.
10 Pa sə pɩ̀ʋ́ tə də́ dɩ̀àn, Ba-Yígúrə́-Jə-Tiu!
Nə lòrì sə n san nəba,
dɩɩn tə nə, nə bon nə kə n nə!