Lanworu tə bɩrɩ Yɩɩ dun tə nə mɛ nətʋ
19
1 Gwàgá yáá tíú gwaran. Davidə gwaran.
2 Lanworu tə bɩrɩ Yɩɩ dun tə nə mɛ nətʋ.
Yá wiən tə nə wulə kʋ wa bɩrɩ ʋ jɩɩn tʋ̀tʋ̀nán nə yɩ nətʋ.
3 Dɩɩn mama swɩ̀n Yɩɩ dun tə yoo, kʋ bɩrɩ kʋ don nə,
yá tɩtɩn də mama bɩrɩ Yɩɩ yənu kʋ don tɩtɩn nə.
4 Kʋ tà yomaŋʋ, kʋ ma tà nii tuŋu yoo.
Tə nii ba sʋgʋ swɩ̀n.
5 Yá tə ŋwɛn vəli kʋ yí tɩa yuu, bwálɩ́ mama wa,
ba ga swɩ̀n tə sʋgʋ bwálɩ́ mama nə, lʋʋ wa.
Yɩɩ púə́ gansili lá nə, lanworu tə wa, ʋ pa yɩcaʋ tə nə.
6 Yá jɩjʋ nə, yɩcaʋ tə dàń yàá naŋa ndə kadʋrʋ barɩ nə naŋa ʋ dìə̀ wa.
Kʋ yàá tì kʋ cwəŋə, kʋ ga làrɩ̀ ndə babɩa nə.
7 Kʋ yàá nan lanworu tə nii don nə,
kʋ va kʋ yí kʋ nii tə don,
yá won mama ba kʋ lɩŋɩ tə yáá nə jɛ́n.
8 Ba-Yígúrə́-Jə-Tiu nii tə wa ba yolwan jə.
Ʋ nii tə pɩn mɩɩ lɩ̀à nə.
Ba-Yígúrə́-Jə-Tiu nii yìə̀n tə yɩ cɩ́gá cɩcɩ,
tə pɩn wʋbʋŋa lìù tə nə, ʋ nə yəri yoo də̀ń.
9 Yìə̀n tə Ba-Yígúrə́-Jə-Tiu nə pɩn nii tə yuu wa yɩ mənəmənə,
tə ga poli pùə́.
Yoo tə Ba-Yígúrə́-Jə-Tiu nə pɩn nii, kʋ yuu wa yɩ nəpon,
kʋ ga pori yɩ́á.
10 Ka dəri Ba-Yígúrə́-Jə-Tiu fən yɩ yozəŋu,
kʋ ga jə nywarɩ máŋá mama wuuu.
Yìə̀n tə Ba-Yígúrə́-Jə-Tiu nə bɩrɩ sə tə tʋn, jə də̀ń,
tə mama ga tì cɩ́gá cwəŋə.
11 Tə jə funə tə doni sɩ́án.
Tə funə dwə sɩ́án tə nə ba durən jə tətə.
Tə ywán tə doni tʋ̀ràn.
Tə ywánɩ́ dwə tʋnʋga tə nə pàlɩ̀ ka naŋa tʋnyɩnɩ wa tətə.
12 Tə pɩn kwìə̀ n tʋtʋnʋ tə də nə.
Tə jə nywarɩ zənzən tə pa lìù tə nə, ʋ nə zìlí tə nii.
13 Wàà nə yə̀ə́ yolwana tə ʋ nə tʋn də ʋ yəri?
À kəni yìə́n n nə à yolwana tə yɩrɩ, tə nə səgə à yáá nə.
14 Cɩ̀ n tʋtʋnʋ tə də nə, də yɩdɩʋ yìə̀n,
sə tə dàn ká də́ dɩ̀àn à yuu wa,
yá kʋ nətʋ dàń wá pa à ya təgətəgə,
tɩan cʋna ga bá ya à yuu wa.
15 Ba-Yígúrə́-Jə-Tiu, à lòrì sə à nii sʋ̀ràn tə,
də à bɩcan pubʋŋɩ tə ja fɩra n yáá con.
Cɩ́gá, n yɩ ndə pɩ̀ʋ̀ nə à yáá con,
n mʋ̀ ga nə yɩ à jonu.