Pɩ̀ʋ́ Davidə bwɩ Ba-Yígúrə́-Jə-Tiu nə, ʋ nə pɩn ʋ də́ dɩ̀àn, ʋ dʋŋa yuu wa yɩrɩ
18
1 Gwàgá yáá tíú gwaran. Ba-Yígúrə́-Jə-Tiu tʋtʋnʋ Davidə nə dɩga gwaran tə tə, ʋ ma bʋ Ba-Yígúrə́-Jə-Tiu nə, máŋá tə wa, Ba-Yígúrə́-Jə-Tiu nə jon wá ʋ dʋŋa mama jɩɩn wa, də pɩ̀ʋ́ Sayulə jɩɩn wa.
2 Ʋ swɩ̀n, ʋ wʋ́:
«À swə mʋ́ Ba-Yígúrə́-Jə-Tiu,
n mʋ̀ nə yɩ à dɩ̀àn!
3 Ba-Yígúrə́-Jə-Tiu yɩ ndə pɩ̀ʋ̀ nə à yáá con.
Ʋ yɩ à dɩ̀àn dəkuu bwálɩ́.
Ʋ mʋ̀ nə yɩ à jonu!
À tíú Yɩɩ yɩ ndə à pɩ̀ʋ̀ kòlú nə,
à nə zwɩ à kwálɩ́ à yuu kʋ wa!
Ʋ yɩ ndə à nàtànà nə, ʋ cɩ̀ à nə.
Ʋ mʋ̀ nə yɩ à dɩ̀àn tíú, ʋ joŋə nə.
Ʋ yɩ à dɩ̀àn dəkuu bwálɩ́!
4 À bubwi à kəni Ba-Yígúrə́-Jə-Tiu nə, à pɩn wá dun!
Yá ʋ yàá jon nə, à dʋŋa jɩɩn wa.
5 Tɩan jɩɩn yà zʋa nə tə zwɛ̀, ndə navoo nə,
yá cʋcʋran nacorən yà ken fən à waa.
6 Ciru ŋoni yà kɩkarɩ nə,
yá tɩan dàń yà yɩ ndə nyalɩ nə, à yáá con.
7 À jɩgwarʋ tə wa, à bon à kə Ba-Yígúrə́-Jə-Tiu nə.
À bubwi à kə à tíú Yɩɩ nə.
À bubwiə tə tʋa ʋ zɩan wa,
yá ʋ zɩgɩ ʋ sàń tə wa, ʋ nì à kori.
8 Tɩa tə vuvugu ka ga sisigi.
Pɛɛn dəkurən didigi, tə ga vuvugu,
Ba-Yígúrə́-Jə-Tiu lɩŋa yà nə zàn zənzən yɩrɩ.
9 Ŋwɩn yà naŋa ʋ mɩbʋran wa,
mənvwə də məncala ga naŋa ʋ nii wa.
10 Ʋ jɩn lanworu tə, ʋ guni, ʋ ga cú,
də bakwan lələru, ʋ nɛɛ də̀ń nə.
11 Ʋ yà jə̀ə́ Yɩɩ sàń wonəŋu yuu, ba nə boŋə kerubə*,
kʋ ga ja wá kʋ piri,
Kʋ yà yɩ ndə ʋ nə jə̀ə́ vʋʋ vànà yuu wa, ʋ yɩyarɩ.
12 Ʋ jɩn yikunu tə nə kɩkarɩ wá, ʋ ma fwa ʋ gansili, ʋ wulə kʋ wa.
Tə yà yɩ yikunu nəzonu ndə dwà bakwan nə.
13 Poni yà pɩpɩlɩ ʋ yáá con,
bakwan, də dwakafɩna, də məncala ga naŋa lá.
14 Ba-Yígúrə́-Jə-Tiu baa lanworu tə wa.
Baan Yɩɩ pɩn ba nì ʋ kori,
Ʋ pɩn dwà pɩpɩlɩ tɩa mama, ʋ ma gugurə ba.
16 Ba-Yígúrə́-Jə-Tiu, n bagʋ də n mɩɩ vʋʋ pɩn,
mʋʋ də̀ń gwìń kʋ nan poni nə,
yá lʋʋ dəkurən nyɩn poni nə.
17 Ʋ jə̀ń lanworu wa, ʋ larɩ ʋ jɩɩn, ʋ ja nə,
ʋ van ʋ lɩ naluŋə wa.
18 Ʋ jon nə, à dʋŋʋ ladɩa jɩɩn wa.
Ʋ jon nə, ba tə nə culi nə, ba dɩ̀àn də ga dwə nə, jɩɩn wa.
19 À dʋŋa tə ta nə, à yobɩbɩlʋ dɩɩn nə,
yá Ba-Yígúrə́-Jə-Tiu yɩn à sáŋʋ́.
20 Ʋ van nə ʋ lɩ, ʋ pa à tɩ à tɩ̀àn.
Ʋ jon nə, ʋ nə swə nə yɩrɩ.
21 Ba-Yígúrə́-Jə-Tiu tʋn kʋ nətʋ tə à yɩra,
à nə twá cɩ́gá nə, ndə kʋ nə mɛ nətʋ tə yɩrɩ.
Ʋ pɩn nə ŋwɩ́rán, à jɩ̀àn nə ba durən yìə̀n tʋŋa yɩrɩ.
22 Cɩ́gá, à twá Ba-Yígúrə́-Jə-Tiu cwəŋə tə zəni,
yá à wà yərijwɩan lìù yɩn, sə à pìí à yá à tíú Yɩɩ tə.
23 Ʋ yìə̀n tə mama ʋ nə bɩrɩ sə tə tʋn, wulə à yáá con,
à ga ba ʋ yìə̀n tə də, ʋ nə pɩn tə pʋ́pʋ́nɩ́ tə tún, vɩ à dʋga.
24 À yɩn təgətəgə, ʋ yáá con,
à ga cɩ̀ à tɩ̀àn nə də yolwan fwaŋʋ.
25 Yá Ba-Yígúrə́-Jə-Tiu dàń pɩn nə ŋwɩ́rán,
à nə twá cɩ́gá nə, ndə kʋ nə mɛ nətʋ,
ʋ ga na də, à jɩ̀àn ba durən yìə̀n tʋŋa tə yɩrɩ.
26 Lìù nə twá cɩ́gá nə, ndə kʋ nə mɛ nətʋ,
n yàá bɩrɩ kʋ tíú, də n yɩ cɩ́gá tíú.
Yá lìù nə yɩ təgətəgə,
n yàá bɩrɩ kʋ tíú, də n yɩ təgətəgə.
27 Lìù nə ba durən yìə̀n tʋŋa,
n yàá bɩrɩ kʋ tíú, də n ba durən yìə̀n tʋŋa.
Yá lìù nə tʋŋa yutəlu yìə̀n,
n yàá bɩrɩ kʋ tíú, də n yɩ wʋbʋnyiən.
28 Cɩ́gá, n mʋ̀ nə joŋə lɩ̀à tə nə muŋə ba tɩ̀àn,
n ga pɩn yidanyɩna ziri ba yun tɩa.
29 N mʋ̀ Ba-Yígúrə́-Jə-Tiu yɩ ndə cànʋ́ nə, kʋ nə sʋ̀rɩ́, kʋ pa nə.
À tíú Yɩɩ pɩ̀rɩ̀ à yikunu tə də poni.
30 N mʋ̀ dɩ̀àn nə, à ma tɛ dʋŋa, à də́.
À tíú Yɩɩ dɩ̀àn nə, à ma faŋa biritaŋʋ, à galɩ.
31 Yɩɩ coŋi tə wa ba yolwan mama jə.
Ba-Yígúrə́-Jə-Tiu sʋgʋ tə yɩ cɩ́gá cɩcɩ,
kʋ ba tʋ́tʋ̀ná jə.
Ʋ yɩ ndə nàtànà nə,
ʋ cɩ̀ lɩ̀à tə mama nə, ba nə kwálɩ́ ba yuu ʋ con.
32 Cɩ́gá, wàà nə yɩ Yɩɩ, də kʋ nə tà Ba-Yígúrə́-Jə-Tiu?
Yá wàà nə dà ndə pɩ̀ʋ̀ nə, də kʋ nə tà nə tíú Yɩɩ tə?
33 Yɩɩ nə pɩn nə dɩ̀àn,
yá ʋ mʋ̀ nə kwɛn à cwəŋə,
ʋ pɩn ka yanɩ zəni.
34 Ʋ pɩn à nɛɛ lɩŋa tɩa, ndə naŋa nə,
yá ʋ pɩn à zɩga pɛɛn yuu wa.
35 Ʋ mʋ̀ nə kwè nə kʋ̀ʋ̀ tɛgʋ,
kʋ pa à wàá cɩnɩan twan, à vaŋa à dɩ̀.
36 N yɩ ndə nàtànà nə, n cɩ̀ à nə, n ga joŋə nə.
N jɩzən tə saŋa nə,
yá n sáŋʋ́ tə pɩn à jì dun tíú.
37 N pɩn à wàá à dəri zənzən,
yá à nacɩga ba gʋgʋnɩ.
38 À yàá dɩŋa à dʋŋa à ja,
yá à ba pìí à kəni à kwa,
də à nə wà ba gwɩ à zwɛ̀.
39 À yàá gʋ ba, à tɩtaga,
yá ba kʋ́ʋ̀ ba pìí ba zaŋa.
Ba twɩ ba tɩ à nɛɛ də̀ń.
40 N pɩn nə dɩ̀àn, sə à ma ta kʋ̀ʋ̀,
yá n pɩn à jarɩduən twɩ ba tɩ à nɛɛ də̀ń.
41 N pɩn à na à dʋŋa kwa,
yá à pɩn lɩ̀à tə nə culi nə, nyʋn lá.
42 Ba yàá bubwi, ba pɩ̀à sáŋʋ́,
yá lìù mama ba twi ʋ joŋə ba.
Ba bubwi ba kəni Ba-Yígúrə́-Jə-Tiu nə, yá ʋ ba ba le!
43 À yàá tɩtaga ba, à pa ba jì ndə pùrú nə, vʋʋ nə janɩ,
à ga nɩŋa ba, ndə coŋi yuu tɩtɛɛ nə.
44 N jon nə à lʋʋ lɩ̀à tə jɩɩn wa,
ba nə zàn ba zɩga à nə,
n pa à də́ pàrɩ̀ dwíə́ nəkaran* yuu wa.
Yá dwíí tə à yà nə yəri, dàń tʋŋa ba pɩn nə.
45 Dwíə́ nəkaran lɩ̀à də́ à dabarɩ.
À nə zə́n à pa nii,
ba yàá zìlí kʋ lala.
46 Dwíə́ nəkaran tə jɩ̀àn gwarɩ,
yá ba dàń naŋa ba dɩ̀àn dəkurən bwálá wa, də ba vɩvaga.
47 Ba-Yígúrə́-Jə-Tiu wulə!
À bwɩ Yɩɩ tə nə, ʋ nə yɩ ndə pɩ̀ʋ̀ nə, à yáá con!
Ʋ mʋ̀ Yɩɩ tə, ʋ nə yɩ à jonu, mɛ də dun!
48 Ʋ yɩ Yɩɩ tə, ʋ nə pɩn à fwi à lɩŋa,
ʋ ga pɩn à də́ pàrɩ̀ dwíə́ nəkaran yuu wa.
49 N joŋə nə à dʋŋa jɩɩn wa!
N zɩ̀n nə n kə yɩɩ nə, à jarɩduən yuu con,
yá n joŋə nə wʋlʋnyɩna jɩɩn wa.
50 Kʋ mʋ̀ nə pɩn, à ma wá bʋ n nə,
dwíə́ nəkaran tə titəŋi wa, Ba-Yígúrə́-Jə-Tiu!
À wá dɩ gwaran à ma siən mʋ́.
51 Ba-Yígúrə́-Jə-Tiu pɩn pɩ̀ʋ́ tə ʋ nə tún, də́ dɩ̀àn zənzən.
Ʋ tʋŋa wʋywaŋʋ* pɩ̀ʋ́ tə yɩra, ʋ nə kúrí*.
Ʋ tʋŋa kʋ nətʋ tə pɩ̀ʋ́ Davidə də ʋ dwíí tə yɩra,
máŋá mama wuuu.