Lìù tə nə wà yoo cʋ̀gʋ̀ yɩjʋnɩ
17
1 Davidə yɩjʋnɩ
Ba-Yígúrə́-Jə-Tiu, à lòrì mʋ́, sə n cʋgʋ cɩ́gá yoo!
Guni n zɩɩn, n cʋgʋ à bubwiə tə,
súrí n zɩan, n cʋgʋ à yɩjʋnɩ tə.
Cɩ́gá, gɩgɩra tə̀lə́ à nii sʋgʋ wa.
2 N mʋ̀ yáá con nə, à bʋra wá bʋ̀rɩ̀,
yá n tətə dàń wá na bwálɩ́ tə, cɩ́gá nə wulə!
3 N zəən à bɩcan tə,
tɩtɩn də tətə nə, n yə̀ə́ à pubʋŋɩ.
N mɩlɩ nə, yá n wà yolwan mama nɩ.
À tà lìù tə, à nii sʋgʋ də à pubʋŋa nə ba duən twá.
4 À nə nɩ ləzoni tʋtʋnɛɛ nə yɩ nətʋ,
à mʋ̀ zìlí n nii sʋ̀ràn tə,
yá tə san nə, à wà wʋlʋnyɩna tʋtʋnɛɛ nə twá.
5 À vəli n coŋi tə wa zəni,
à nɛɛ ba vɩvaga.
6 À tíú Yɩɩ, à boŋə à kəni n nə, n nə yàá le nə yɩrɩ!
Guni n zɩɩn n kə à con, n cʋgʋ à sʋgʋ tə!
7 Bɩrɩ n wʋywaŋʋ* tə nə jə fɩra nətʋ.
Cɩ́gá, n mʋ̀ nə joŋə lɩ̀à tə, ba nə pɩ̀à yisəgə bwálɩ́.
N jɩzən vàn tə joŋə ba, ba dʋŋa jɩɩn wa.
8 Ywàń à yuu, ndə n yicalɩbiu nə.
Səgə nə, n vànà də̀ń ywárɩ́ tə wa,
9 wʋlʋnyɩna tə yáá nə, ba nə kəni nə càn wa,
də à dʋŋa tə yáá nə, ba nə kɩkarɩ nə, sə ba gʋ.
10 Ba bɩcan ba ləzwənə yinəgə dəri,
ba nii ga swɩ̀n fwìə́ sʋ̀ràn.
11 Ba púə́ à kwa, ba dɩŋɩ.
Nə̀ń ba nə, ba kɩkarɩ nə.
Ba fin ba yɩ́á, ba kə à yuu,
sə ba mà nə, ba dɩ tɩa.
12 Ba yɩ ndə gəru nə,
kʋ nə bɩbarɩ, sə kʋ van kʋ vuri.
Ba yɩ ndə gəbala nə,
ka nə səgə ka yipaa bwálɩ́ nə.
13 Ba-Yígúrə́-Jə-Tiu, à lòrì sə n zàn, n ta n jəri ba,
n ga jə̀ń ba, ba nadwana nii nə!
Jon nə wʋlʋnyiən jɩɩn wa, də n kwatara sɩ̀ʋ́ tə.
14 Ba-Yígúrə́-Jə-Tiu, jon nə ləzoni təntə jɩɩn wa, də n jɩɩn dɩ̀àn.
Jon nə lʋʋ kʋ tə ləzoni tə jɩɩn wa.
Pa sə ba tori ya tɩa yuu mɩɩ kʋ tə cɩcɩ wa.
Nyɩn ba də wiən tə, n nə tanɩ, n tún ba nə.
Pa ba bɩ̀á sú tə,
ba ga tə gɩganɩ ba tún ba də bɩ̀á nə.
15 À mʋ̀ yɩ kʋ wá twá də cɩ́gá, à ma na n yáá.
Yá à nə zàn dwiən nə, à wá sú də n nyɩnyɩga tə.