Lìù tə, ʋ pùə́ nə poli Yɩɩ yuu wa sʋ̀ràn
16
1 Davidə pupwən gwaran.
À tíú Yɩɩ, ywàń à yuu nə!
Cɩ́gá, n mʋ̀ con nə à kwálɩ́ à yuu.
2 À swɩ̀n Ba-Yígúrə́-Jə-Tiu con, à wʋ́:
«N mʋ̀ nə yɩ à Yuu-Tiu.
Won don tə̀lə́, kʋ nə dwə mʋ́, kʋ nə pɩn à də́ ywánɩ́!
3 À swə Yɩɩ lɩ̀à tə ba nə wulə lʋʋ nii tə wa,
də ladɩra tə,
də à waa mama.
4 Lɩ̀à tə ba nə pɩ̀à yɩa duən sáŋʋ́,
yɩ ba kwɛn ba kəni ba tɩ̀àn càn wa.
À mʋ̀ bá ja vànɩ́, à ma fwa joŋi, à pa tə,
à ga bá bon tə yɩrɩ də tətə, à nii wa.
5 Ba-Yígúrə́-Jə-Tiu, n mʋ̀ nə yɩ à tori,
ʋ mʋ̀ ga nə zuri à bɩcan.
N mʋ̀ nə yə̀ə́ à yoo.
6 À nɩ tori, kʋ nə ywán zənzən.
Kʋ yɩ tori tə, kʋ nə jə fɩra.
7 À bwɩ Ba-Yígúrə́-Jə-Tiu nə, ʋ nə pɩn nə kwìə̀.
Tɩtɩn də tətə nə, à bɩcan yàá kàrɩ̀ nə.
8 À yàá balɩ Ba-Yígúrə́-Jə-Tiu máŋá mama, à yáá con,
yá ʋ nə wulə à səpuni nə, yoo ba nə gwárɩ́.
9 Kʋ mʋ̀ nə pɩn, à jə pupwən à bɩcan wa, à ga jwɛ.
Yá à yatana tə də tətə dàń jə yazurə.
10 Cɩ́gá, n bá sɛ̀, n vɩ à jə̀rə́ tə, n dʋgʋ ciru* nə.
N bá sɛ̀, n pa à mʋ̀ lìù tə, n nə swə, pʋ libəri wa.
11 N wá pa à lwarɩ cwəŋə tə, ka nə pɩn mɩɩ.
Pupwən nəfarʋ wulə n yáá con,
ywánɩ́, kʋ nə ba zwɛ̀, ga wulə n jɩzən vàn yuu.