Zɔbə pɩ̀à sə ʋ tətə ve də Yɩɩ
13
1 Zɔbə tə swɩ̀n, ʋ súrí lá, ʋ wʋ́:«Nə̀ń, à yii dìgə̀ yìə̀n təntə mama.
À zɩɩn nì tə, à ga nì tə də̀ń.
2 Kʋ tə á nə yə̀ə́ tə, à də yə̀ə́ kʋ,
á də bá nə dwə.
3 Yá à mʋ̀ yɩ Yɩɩ tə nə wulə tə mɛ
yuu wa yáá con nə, à pɩ̀à sə à swɩ̀n,
Yɩɩ yáá con nə, à pɩ̀à sə à tún à nii.
4 Cɩ́gá, á mʋ̀ yɩ kʋ̀nkʋ̀n nə á kʋ̀nɩ̀,
á ma pwí cɩ́gá yuu nə,
á mama yɩ kʋ̀nkʋ̀n dɩmʋtʋra.
5 Á yà nə púə́ á nii,
á yà wá ya ndə wʋbʋnyɩna nə!
6 À lòrì sə á cʋgʋ, sə à tún à nii,
á zurə á yɩra á cʋgʋ à nii sʋ̀ràn tə.
7 Á wá sɛ̀ á swɩ̀n yoo tə nə tà cɩ́gá,
á ma san Yɩɩ nə naaa?
Á wá sɛ̀ á kʋna kʋ̀nkʋ̀n, à ma san wá?
8 Á pɩ̀à sə á kə á nii Yɩɩ kwa naaa?
Á pɩ̀à sə á bʋ̀rɩ̀ á pa wá naaa?
9 Kʋ wá ya zəni kʋ pa aba,
də ʋ nə zəən aba naaa?
Nə à yə̀ə́ á wá gɩgarɩ wá,
ndə ba nə gɩgarɩ ləzwənə nətʋ naaa?
10 Cɩ́gá mama, ʋ wá caga á nii nə,
də á nə wulə ʋ kwa də pwìí bələ.
11 Á ba Yɩɩ pàrɩ̀ dun tə fən dəri?
Ʋ nə jə fən tə ba aba swì naaa?
12 Á zwansɩsarɩ yɩ ndə tʋnan nə,
tə ba funə jə.
Á nii sʋ̀ràn tə á nə ma cɩ̀ á tɩ̀àn nə,
yɩ ndə daʋ wiən nə, tə ba dɩ̀àn jə.
13 Á pwíə́ á nii, á yágá nə!
À mʋ̀ nə wá swɩ̀n,
kʋ tə kʋ nə wá ya, sə kʋ ya!
14 Bɛ̀ɛ̀ nə pɩn à ma dɩŋɩ à yatanaŋʋ à yelə wa,
à ga lɩ à mɩɩ à janɩ à jɩɩn wa?
15 Yɩɩ nə swə sə ʋ gʋ nə,
ʋ mʋ̀ yuu wa nə à tə jələ,
yá ʋ mʋ̀ yáá con nə à wá tún à nii.
16 Kʋ nətʋ tə tətə wá jon nə.
Cɩ́gá, lìù tə nə ba Yɩɩ fən dəri,
wàrɩ̀ ʋ yáá con ʋ twi.
17 Á cʋga, á cʋga sə à tún à nii,
sə à sʋgʋ tə zʋ á zɩan zəni.
18 Á nəŋə, à tanɩ à tɩ̀àn sə à tún à nii,
yá à yə̀ə́ də à mʋ̀ nə wá na cɩ́gá.
19 Wàà nə wá swɩ̀n ʋ zɩgɩ à nə?
Kʋ tíú nə swɩ̀n nə ʋ dɩ,
à wá pú à nii à ga tɩ.
20 À dàń nə lòrì mʋ́ á tíú Yɩɩ,
sə n cɩ̀ à nə də yìə̀n bələ cɩcɩ,
yá à bá səgə à tɩ̀àn n yáá nə:
21 Pa n jɩɩn tə ya ŋʋ́nɩ́ də nə,
yá dàn ká pa n fən tə gən nə.
22 Yá kʋ kwa nə, n nə bon nə, à wá sɛ̀,
nə à yə̀ə́ à wá swɩ̀n, n ga le nə.
23 À yolwana tə də à cʋna tə yɩ bagalɩ?
Bɩrɩ nə à lwanɩ tə də à cʋna tə.
24 Bɛ̀ɛ̀ nə pɩn n ma viviri n yáá n kə kwa,
n ga jələ nə ndə n dʋŋʋ nə?
25 N pɩ̀à n dɩŋa tɩ̀ʋ́ vʋʋ kwa, vʋʋ nə jànɩ̀?
N pɩ̀à n pú gakʋrʋ kwa, n dɩŋa?
26 Cɩ́gá, n pʋ́pʋ́nɩ́ yìə̀n tə nə cà
kwalʋkwalʋ, n ja zɩga à nə,
n pɩn à zandʋan yolwana tə yoo zɩŋa nə.
27 Yá n dàń ken banzala à nɛɛ nə,
n ywàŋá à napɩrɩ vəli mama yuu,
n ga mɩ̀nɩ̀ à nɛɛ bwálɩ́.
28 Yá ləzwənə yàá bwànɩ̀,
ʋ sori ʋ tʋ ndə dàpʋ́pʋ́nʋ́ nə,
nə à yə̀ə́ ndə gànʋ̀ nə, tʋ́á nə dí.»