Zɔbə bɩrɩ Sofarə, də Yɩɩ ba yinəgə dəri
12
1 Kʋ kwa nə, Zɔbə tì sʋgʋ, yá ʋ le, ʋ wʋ́:2 «Cɩ́gá mama, á mʋ̀ jə ləzoni yənu tə mama,
yá á mʋ̀ nə tɩga, wʋbʋŋa də tɩga!
3 À də jə pubʋŋa ndə á nə,
á də ba nə dwə.
Wàà nə yəri yìə̀n təntə á nə swɩ̀n?
4 À jìgə̀ mʋmʋn won à pa à dabara nə,
à mʋ̀ lìù tə nə boŋə à kəni Yɩɩ nə, sə ʋ le nə!
À mʋ̀ lìù tə nə yɩ cɩ́gá tíú,
à ga yɩ təgətəgə, jìgə̀ mʋmʋn won!
5 Lɩ̀à tə won mama yoo nə ba ba wʋwalɩ,
bʋŋa də yinənyiən nə mɛ də fʋfʋlʋ!
Kʋ yɩ ndə ba nə yigə lɩ̀à tə
nə mà ba nɛɛ, sə ba dɩ.
6 Ŋwɩna wulə dìì wa sənbwen,
won mama ba ba wʋwalɩ.
Lɩ̀à tə nə zɩ̀n Yɩɩ lɩŋa jə yazurə,
ba vagoo nə yɩ ba Yɩɩ.
7 Yá à lòrì sə n bwe vàná tə,
yá tə wá kàrɩ̀ mʋ́.
Bwe lanworu zuŋi tə,
yá tə wá bɩrɩ mʋ́ yìə̀n n nə yəri.
8 Ve də tɩa tə, yá ka wá kàrɩ̀ mʋ́.
Mʋʋ wa filə tə wá man yìə̀n tə bɩrɩ mʋ́.
9 Tə mʋ̀ wiən təntə mama wa,
won kwà tətə nə yəri də
Ba-Yígúrə́-Jə-Tiu jɩɩn nə fwa won mama?
10 Ʋ mʋ̀ nə jə won mama mɩɩ ʋ jɩɩn wa,
ləzwənə mama siŋu wulə ʋ jɩɩn wa.
11 Zɩɩn tʋtʋŋɩ nə yɩ,
sə kʋ mɩ̀àn sʋ̀ràn, kʋ nì tə də̀ń,
ndə nipaa də tʋtʋŋɩ nə yɩ,
sə kʋ mɩ̀àn wodirən,
kʋ lwarɩ tə ywánɩ́.
12 Wʋbʋŋa wulə bazʋnan con,
yá mɩdarɩ pɩn pubʋnzəŋu.
13 Wʋbʋŋa də dɩ̀àn yɩ tə naŋa Yɩɩ con.
Kwìə̀ də pubʋnzəŋu yɩ ʋ mʋ̀ nə tɩ.
14 Ʋ nə gwɛrɩ,
lìù tə̀lə́ ʋ nə wàá ʋ pìí lwè.
Ʋ nə ken lìù bandiə,
lìù tə̀lə́ ʋ nə wàá wá ʋ lɩ.
15 Ʋ nə cɩ̀gà dwà nə,
won mama yàá kʋ̀,
yá ʋ nə yá ka ʋ pa ka cú,
ka yàá cʋ̀gʋ̀ tɩa tə mama.
16 Dɩ̀àn də pubʋnzəŋu wulə ʋ con.
Lìù tə nə jɛ́n, də lìù tə nə pɩn
lɩ̀à jɛ́n mɛ yɩ ʋ mʋ̀ nə tɩ.
17 Ʋ pɩn dʋŋa janɩ pɛ̀gá kwenə
ba vəli yongaʋ də napɩrɩ sòlí,
ʋ ga pɩn lɩ̀à tə nə bʋ̀rɩ̀ bʋra viviə.
18 Ʋ joŋə pɛ̀gá pàrɩ̀ ʋ yá ba,
ʋ ga vwe ŋwənə ba tàŋá nə.
19 Ʋ pɩn dʋŋa janɩ joŋwana
ba vəli yongaʋ də napɩrɩ sòlí,
ʋ ga joŋə dɩ̀àn yáá tɩ̀án con,
ba yà nə wulə kʋ máŋá ba yigə.
20 Ʋ joŋə sʋgʋ lɩ̀à tə con,
ba nii nə yə̀ə́ sʋgʋ,
ʋ ga lɩ pubʋnzəŋu ʋ yá bazʋnan.
21 Ʋ pɩn ba fʋfʋlɩ dun tɩ̀án,
ʋ ga kukoli dɩ̀àn tɩ̀án kwatara voru.
22 Ʋ gwìń yikunu də̀ń ʋ kəni poni nə,
ʋ ga pɩn yikunu bìrə̀n lwànɩ́ kʋ jì poni.
23 Ʋ pɩn lʋʋ dwíə́ pùlì, ʋ ga pɩn ba tɩ.
Ʋ yàá wàlɩ̀ ba, ʋ pa ba va yiŋʋnɩ.
24 Ʋ lɩ lʋʋ lɩ̀à yáá tɩ̀án tə pubʋŋa,
ʋ ga yá ba ʋ pa ba ywaŋa,
ndə ba wulə kasɔɔ lanworu wa,
cwəŋə nə tə̀lə́ lá.
25 Ba tɩtɛ yikunu wa, poni nə tə̀lə́:
Ʋ pɩn ba ywaŋa ndə lɩ̀à nə,
ba nə nyʋan sana ba bʋbʋnɩ.»