Sofarə bon Zɔbə, sə ʋ pìí ʋ bà Yɩɩ con
11
1 Sofarə, ʋ nə nan Naama tì sʋgʋ, yá ʋ swɩ̀n Zɔbə con, ʋ wʋ́:2 «Lìù mama bá le sʋ̀ràn kapʋpʋ tə tə mama naaa?
Kʋ yɩ lìù tə nə yə̀ə́ sʋgʋ yáá nə jə cɩ́gá naaa?
3 N sʋvɛɛ tə wàá tə pɩn lɩ̀à pwí ba nii naaa?
N wá pwɛ́ lɩ̀à, ba ga ba n nii nə caga naaa?
4 N swɩ̀n də n yənu tə wa ba durən jə,
yá n yɩ təgətəgə Yɩɩ yáá con!
5 Aaa! Yɩɩ tətə yà nə wá sɛ̀ ʋ swɩ̀n,
ʋ yà nə sɛ̀ ʋ súrí ʋ nii, ʋ swɩ̀n n con,
6 ʋ yà wá bɩrɩ mʋ́ yìə̀n tə nə səgə wʋbʋŋa wa,
tə nə dwə ləzwənə pubʋŋa zənzən,
yá n dàń yà wá lwarɩ də
Yɩɩ yɩ ʋ ba n yolwana tə duən taŋa.
7 N wàá Yɩɩ də̀ń nə lu nətʋ n lwarɩ naaa?
Nə à yə̀ə́ n wàá n lwarɩ Yɩɩ tə nə wulə
tə mɛ yuu wa zəni nə mɛ nətʋ naaa?
8 Ʋ wʋbʋŋa tə wulə baan
kʋ doni lanworu tə:
Bɛ̀ɛ̀ nə n wàá n fwa?
Ka də̀ń lu kʋ doni ciru:
Bɛ̀ɛ̀ nə n wàá n lwarɩ?
9 Ʋ wʋbʋŋa tə danɩ dwə tɩa tə,
ka wanɩ dwə mʋʋ tə.
10 Yɩɩ nə pɩn nii sə ba kə lìù bandiə wa,
ʋ nə bon lìù bʋra bwálɩ́ nə,
wàà nə wàá ʋ yáá nə ʋ cɩ̀?
11 Cɩ́gá, Yɩɩ yə̀ə́ gɩgɩrɩnyɩna swɩ́án,
ʋ na kʋ̀nkʋ̀n yìə̀n tə, də ʋ nə swə
ʋ wà ʋ yɩra zuri ʋ zəən zəni.
12 Yuboo tíú wá jì wʋbʋnyiən máŋá tə wa,
də gaʋ bɩ̀nà də lwàń ka jì sàń bɩ̀nà.
13 N mʋ̀ nə viviri n bɩcan n te Yɩɩ con,
n nə zɩ̀n n jɩpɩra n te ʋ con,
14 n nə cɩ̀gà n jɩɩn nə də yolwan fwaŋʋ,
n ga cɩ̀ sə kʋ̀nkʋ̀n yoo dàn ká ya n dìə̀ wa,
15 n wá wànɩ́ n zɩ̀n n yuu yɩɩ nə,
yá cavɩra bá ja mʋ́.
N wá zɩgɩ zəni, yá fən ba ja mʋ́.
16 Cɩ́gá, n wá swɛ̀ɛ́ n càn tə,
n kʋ́ʋ̀ bá lìí tə yoo,
ndə nɩ́á nə, tə nə dəri tə kɛ̀ń.
17 N lʋʋ wúlú poni wá doni yɩcɔɔ gùlú poni,
yá yikunu wá ya ndə jɩjʋ nə, kʋ pa mʋ́.
18 N jɩɩn wá dàn, yala nə wulə yɩrɩ,
yá n wá pə̀ń n dwɛ̀ də yazurə,
yoo mama nə bá wʋwalɩ mʋ́ yɩrɩ.
19 N wá pə̀ń, lìù mama ga bá wʋwalɩ mʋ́.
Yá lɩ̀à zənzən wá lòrì n sáŋʋ́.
20 Yá wʋlʋnyɩna mʋ̀ yɩ́á wá gwàrɩ̀,
yá ba bá na yuu yikwala bwálɩ́.
Tɩan cɩcɩ nə yɩ ba yala.»