Zɔbə bɩrɩ də Yɩɩ yɩ ʋ pɩn ba lɩra wá, sə ʋ cʋ̀gʋ̀ wá
10
1 Zɔbə swɩ̀n ʋ súrí lá, ʋ wʋ́:«À waa nan lʋʋ!
À kʋ́ʋ̀ bá yá à ŋʋŋwɩan tə,
yoo tə yɩrɩ kʋ nə yí nə,
à wá caga, à pùə́ nə cʋ̀gʋ̀ zənzən yɩrɩ.
2 À wá swɩ̀n Yɩɩ con, à wʋ́:
“Dàn ká kə càn à nə, ndə cʋna lìù nə!
N dàń nə pa à lwarɩ yoo tə,
n nə swɩ̀n n zɩga à nə kʋ yɩrɩ!
3 N na də kʋ mɛ sə n fɩfɩn nə,
sə n vɩ à mʋ̀ lìù tə n jɩɩn nə fwa n dʋgʋ,
n ga pa wʋlʋnyɩna vʋ́rá jì naaa?
4 Yatanaŋʋ yɩ́á nə wulə n con naaa?
n na ndə ləzwənə nə na nətʋ naaa?
5 N dɩan yɩ ndə ləzwənə dɩan nə naaa?
N bɩna yɩ ndə ləzwənə bɩna nə naaa?
6 Bɛ̀ɛ̀ nə pɩn n twarɩ sə n lwarɩ à yolwan tə,
n ga kəni dɩ̀àn sə n yəni à cʋna tə?
7 N yə̀ə́ zəni də à wà yoo cʋ̀gʋ̀,
n nə wá kə nə càn wa kʋ yɩrɩ,
yá lìù wàrɩ̀ nə ʋ joŋə n jɩɩn wa.
8 N mʋ̀ jɩ̀àn nə ma nə, tə mʋ̀ nə fwa nə,
yá tə dàń kàŋɩ̀ nə, n pɩ̀à sə n cʋ̀gʋ̀ nə.
9 À lòrì mʋ̀ sə n lìí n tɩ̀àn də à yɩ n ma nə,
ndə ba nə ja daʋ ba ma won nətʋ.
N yɩ n pɩ̀à n pìí n kə nə pùrú tə wa naaa?
10 N lwá nə à nuu pùə́ ndə nayɩla nə,
n ga cilə nə ndə nayɩlɩ cilə nə.
11 N sʋa à kurən tə də à ŋʋnan tə,
n ga ja yatanaŋʋ də tànʋ̀ n ma zʋ nə.
12 N pɩn nə mɩɩ,
n fwa pubwanʋ* à yɩra,
n ga ywàń à siŋu tə yuu zəni.
13 Yá nə̀ń yoo tə n yà nə səgə n bɩcan wa,
à yə̀ə́ də kʋ mʋ̀ nə n yà tanɩ n pubʋŋa wa:
14 N mɩ̀nɩ̀ nə, də à tʋŋa lwanɩ,
yá à nə tʋn yolwan, n bá jələ nə
ndə lìù nə, ʋ nə wà yoo cʋ̀gʋ̀.
15 À nə cʋ̀gʋ̀ yoo, lɛɛ yí nə!
À ma kʋ́ʋ̀ nə yɩ cɩ́gá tíú də,
à tə wàrɩ̀ à yuu yɩɩ nə à zɩ̀n!
À dí cavɩra də yinəgə à ja lɛ tɩa nə.
16 Yá à nə zɩ̀n à yuu yɩɩ nə,
n yàá dɩŋɩ nə sə n ja ndə gəru nə,
n tʋŋa dɩ̀àn mɩmɩnan à yɩra zənzən.
17 N pɩn dansɩa lɩ̀à lwànɩ́ duən yuu nə,
ba ma swɩ̀n ba zɩga à nə,
n lɩŋa tə kwɛn tə zaŋa à yuu wa,
kwatara púlə́ tɛ nə, ba joŋə duən yuu nə.
18 Bɛ̀ɛ̀ nə pɩn n ma pa à nan à nuu pùə́ wa?
À yà nə tɩga lá, kʋ yà kʋ́kwà!
Kʋ yà nə yɩn nətʋ,
lìù mama yii yà bá dì nə.
19 Ba yà wá lɩ nə à nuu pùə́ wa,
ba ja va ba kə libəri wa,
yá kʋ dàń yà wá ya ndə,
à nə wà lʋʋ twi mɩ́ámɩ́án.
20 Ʋ yá nə!
À dɩan tətə yɩ bagalɩ lʋʋ wa?
Ʋ nan kwa ʋ ga yá nə,
sə à nì ywánɩ́ mancɩn,
21 à dàń ga zɩgɩ lá à va yikunu
də tɩan yɩywara lʋʋ nii tə wa,
yá à kʋ́ʋ̀ bá pìí à bà.
22 Kʋ yɩ yikunu bìrə̀n
də tɩan yɩywara lʋʋ nii,
yoo mama nə tà kʋ yáá wa.
Poni də tətə yɩ ndə yikunu nə.”»