Zɔbə bɩrɩ də Yɩɩ dɩ̀àn dwə wá zənzən
9
1 Zɔbə le Bilədadə, ʋ wʋ́:2 «Cɩ́gá, à yə̀ə́ zəni, də kʋ yɩ nətʋ!
Nətə nə ləzwənə wá twá,
ʋ ma ya cɩ́gá tíú Yɩɩ yáá con?
3 Ləzwənə nə pɩ̀à ʋ tʋ́tʋ̀nɩ́ də Yɩɩ,
Yɩɩ nə bwe wá yìə̀n mʋ̀rʋ̀,
ʋ bá wànɩ́ ʋ le kʋ nədʋ tətəa.
4 Yɩɩ jə wʋbʋŋa, ʋ ga jə dɩ̀àn zənzən.
Wàà nə wàá ʋ yáá nə ʋ zɩga,
yoo ga ba wá yí?
5 Ʋ tì pɛɛn ʋ túŋə́ bwálá duən nə,
yá tə yəri, ʋ gwìń tə ʋ lwɛ́ də lɩŋa.
6 Ʋ pɩn tɩa tə vuvugə, ka dəkuu wa,
yá ka ywəŋə tə gùrì.
7 Ʋ pɩn nii yɩcaʋ tə nə, sə kʋ dàn ká pɛ́n,
yá yɩcaʋ tə wà pɛ́n.
Ʋ púə́ kacɩlacɛɛ tə yuu nə.
8 Ʋ mʋ̀ cɩcɩ nə larɩ lanworu tə,
ʋ ga vəli mʋʋ tə nakulə yuu wa.
9 Ʋ mʋ̀ nə fwa zara tə,
də yɩdɩɩn mɩmɩnʋ,
də tɩpwən mɩmɩnʋ lanworu tə wa,
də jɩgwiə saparʋ con kacɩlacɛɛ tə.
10 Ʋ tʋŋa yofaran tə də̀ń nə wàrɩ̀ kʋ lwarɩ,
də yomɩlan tə nə wàrɩ̀ tə gàlɩ̀.
11 Ʋ twá à səpuni nə ʋ kɛ̀ń,
yá à ba wá na.
Ʋ vìrí, yá à yəri.
12 Ʋ nə jon won,
wàà nə wàá ʋ pɩn
ʋ pìí ʋ kwànɩ́ kʋ ʋ pɩn?
Wàà nə wàá wá ʋ bwe, ʋ wʋ́:
“Bɛ̀ɛ̀ nə n fwa nətən?”
13 Yɩɩ lɩŋa nə zàn,
ʋ ba pìí ʋ kəni ʋ kwa.
Mʋʋ wojijiru tə ba nə boŋə Rahabə*
kwa lɩ̀à tə cúə́ ba tɩ̀àn tɩa, Yɩɩ yáá con.
14 À mʋ̀ dàń nə yɩ wàà, à ma le ʋ nii wa?
Bɛ̀ɛ̀ sʋ̀ràn nə à wàá à swɩ̀n ʋ yáá con?
15 À nə swə à jə cɩ́gá, à bá le.
À yɩ à wá lòrì ʋ mʋ̀ lìù tə
ʋ nə bʋ̀rɩ̀ à bʋra, sə ʋ dəri à yinəgə.
16 À nə swə à bon à kə ʋ nə, yá ʋ le nə,
à tə bá kə waa, də ʋ sɛ̀ ʋ cʋgʋ à kori.
17 Kʋ yɩ ndə ʋ nə ja dwavʋʋ ʋ ma tɛ nə,
yá ʋ caŋɩ nə, ʋ tún nʋran kapʋpʋ à yɩra tʋtʋ.
18 Ʋ ba yá ʋ pɩn vʋʋ mà à mɩɩ nə.
Cɩ́gá, ʋ pɩn à də́ càn zənzən.
19 Kʋ nə yɩ dɩ̀àn, ʋ mʋ̀ nə yɩ dɩ̀àn tíú.
Kʋ nə kʋ́ʋ̀ yɩ bʋra bwálɩ́ nə,
wàà nə wàá ʋ pɩn ʋ túŋə́ ʋ nii?
20 À yà nə swə à wà yoo cʋ̀gʋ̀ də,
à tətə nii tə wá kə nə yoo wa.
À yà nə swə à yɩ təgətəgə də,
tə wá jon cɩ́gá à con.
21 À nə yɩ təgətəgə, à mʋ̀ yəri.
À waa nan lʋʋ.
22 Kʋ mama yɩ won nədʋ,
kʋ mʋ̀ nə pɩn à swɩ̀n də,
Yɩɩ cʋ̀gà lìù tə nə yɩ təgətəgə
də wʋlʋnyiən mɛ.
23 Cʋcʋran nə twi tə gʋ lɩ̀à tə dɩ̀ ba yuu,
Yɩɩ yàá mʋŋa lɩ̀à tə nə wà yoo cʋ̀gʋ̀ yojanʋ!
24 Lʋʋ nii nə tʋa wʋlʋnyiən jɩɩn wa,
Yɩɩ yàá pú kʋ lɩ̀à tə nə bʋ̀rɩ̀ bʋra yɩ́á nə.
Kʋ yɩ wàà, də kʋ nə tà ʋ mʋ̀?
25 Yá à dɩan tə dəri lala tə doni lìù tə nə dəri,
tə dəri tə vìrí, yá à wà ywánɩ́ dí,
26 tə kɛ̀ń lala ndə nɩ́á yuu borə nə,
ba nə fwa də gʋnmʋʋ,
ndə zənpuu nə cwi nàŋʋ́ yuu wa.
27 À nə swɩ̀n də à wá swɛ̀ɛ́ à ŋʋŋwɩan tə,
də à wá yá à pucʋnɩ tə, à ga poli à yáá,
28 à càn tə mama yàá kə fən à waa,
yá à yə̀ə́ də n bá jələ nə ndə lìù nə,
ʋ nə wà yoo cʋ̀gʋ̀.
29 À mʋ̀ nə yɩ cʋna lìù tə!
Bɛ̀ɛ̀ yɩrɩ nə à kʋ́ʋ̀ wá man tɩa
à gwàrɩ̀ à tɩ̀àn tʋtʋ?
30 À nə swə à swɛ à yɩra də canfɩnɩ,
à ga sɩ̀n à jɩ̀àn də səpwalʋ,
31 n tə wá kə nə bʋʋ wa,
yá à gànàn tətə wá zʋ̀nɩ̀ nə.
32 Cɩ́gá, Yɩɩ tà ləzwənə ndə à nə, sə à le wá,
nə à yə̀ə́ sə nə jəri duən bʋra bwálɩ́ nə.
33 Lìù tə̀lə́ nə pwə́rə́ wa,
ʋ nə wá tún ʋ jɩɩn nə bələ tə yuu wa,
ʋ ma bʋ̀rɩ̀ nə bʋra.
34 Kʋ tíú yà wá cɩ̀,
sə Yɩɩ kʋ́ʋ̀ dàn ká mà nə də ʋ dàʋ̀ tə,
sə ʋ fən tə kʋ́ʋ̀ dàn ká kə bɩcapuri à nə.
35 Yá à dàń wá wànɩ́ à swɩ̀n də wá,
à kʋ́ʋ̀ bá dəri ʋ fən.
Yá kʋ tà nətʋ, à ga ba kʋ dɩ̀àn jə.»