Bilədadə təntən sʋgʋ, ʋ nə swɩ̀n Zɔbə con
8
1 Bilədadə, ʋ nə nan Swuwa tì sʋgʋ, yá ʋ swɩ̀n Zɔbə con, ʋ wʋ́:2 «N wá swɩ̀n sʋ̀ràn tə tə yiri,
kʋ dán kʋ mɛ nətə?
N nii sʋ̀ràn tə nə yɩ ndə vʋʋ nəfarʋ nə,
wá dán kʋ mɛ nətə?
3 Yɩɩ yàá lwàń yoo tə
nə yɩ mənəmənə naaa?
Yɩɩ tə nə wulə tə mɛ yuu wa
yàá gugurə cɩ́gá cwəŋə naaa?
4 Kʋ wàá də n bɩ̀á tə tʋn cʋna
ba zɩgɩ Yɩɩ nə,
kʋ mʋ̀ nə pɩn ʋ ŋwɩ́n
ba yolwana tə jɩŋɩ ba yɩra.
5 Yá n mʋ̀ dàń nə pɩ̀à Yɩɩ,
n nə lòrì Yɩɩ tə nə wulə tə mɛ yuu wa pwəpwə,
6 n nə yɩ təgətəgə, n ga yɩ mənəmənə,
cɩ́gá mama, ʋ wá ywàń n yuu,
ʋ pa yazurə pìí tə ya n sàń tə wa,
ʋ ga pa kʋ sú də cɩ́gá cwəŋə.
7 Nətʋ tə n nə yɩn kʋ də̀ń laŋʋ wa,
bá ja funə n yáá con,
n nə wá jì dun nəfarʋ tíú,
máŋá wa ka nə bɩ̀àn yɩrɩ.
8 À lòrì mʋ́ sə n bwe
lɩ̀à tə nə dí yáá ba ya lá,
n ga cʋgʋ kʋ tə zəni,
ba nɩbara-ba nə nɩ.
9 Cɩ́gá, nə yɩ dɩ̀ɩ̀n bɩ̀á, nə yəri won mama.
Nə dɩan tɩa yuu wa yɩ ndə ywárɩ́ nə.
10 Ba mʋ̀ wá kàrɩ̀ mʋ́,
ba ga bɩrɩ mʋ́ yìə̀n tə ba nə nɩ.
Yìə̀n təntə yɩ ba wá lɩ ba bɩcan wa:
11 Gʋnmʋʋ pɛ́n bwálɩ́ don nə,
də kʋ nə tà buu nii nə naaa?
Mɩncanɩ wàá kʋ bori bwálɩ́ nə,
nɩ́á nə tə̀lə́ naaa?
12 Yá kʋ yàá də́ garan tə duən tə mama yáá kʋ kʋ̀,
də kʋ yɩra tə zurə, də ba tə wà kʋ gan.
13 Mə yoo təntə nə yàá yí
lɩ̀à tə mama nə swɛ̀ɛ́ Yɩɩ yoo,
yá lìù tə nə ba Yɩɩ fən dəri,
yala wá nyʋn lá.
14 Won tə yuu wa ʋ nə jələ kɛ́n,
kʋ yɩ ndə ʋ nə ken ʋ yala nənanʋ pwalʋ nə.
15 Ʋ nə jələ ʋ dìə̀ yuu wa,
ka bá zɩgɩ yɩɩ nə.
Ʋ nə vwə ʋ tɩ̀àn ka nə,
ka wá buburi duən yuu.
16 Ʋ yɩ ndə tɩ̀ʋ́ nə,
kʋ nə zɩga yɩcaʋ wa, kʋ yɩra ga zurə.
Kʋ tɩɩn kʋ naywalan tɩ̀án kárá tə yuu con.
17 Kʋ ŋʋnan gɩra duən wa, kapana púlí wa,
tə zwɩ tə balɩ kapana gungwərən.
18 Yá ba nə mùrí kʋ bwálɩ́ tə nə kʋ yà nə wulə,
bwálɩ́ təntə wá swɩ̀n kʋ wʋ́:
“À wà dí yáá à na mʋ́ mɩ́ámɩ́án!”
19 Mə kʋ cwəŋə tə ywánɩ́ nə nətʋ.
Yá pùrú təntə wa nə,
tɩ̀án duən wá pìí tə pɛ́n.
20 Ɔn ɔn, Yɩɩ ba lìù tə nə yɩ təgətəgə vɩ ʋ dʋga,
ʋ ma ba yolwafwana jɩɩn dàŋà.
21 Ʋ kʋ́ʋ̀ wá pa n nii sú də mʋmʋn,
ʋ ga pa n nipənən mà pupwən cə̀rí.
22 Lɩ̀à tə nə culi mʋ́ wá də́ cavɩra,
yá wʋlʋnyɩna gansili wá nyʋn lá.»